Ennaan An Ritōl an Eria
Liāp Kōn Kōjeraam̧m̧an ko Indeeo Kōn Bujen ko Ad ippān Irooj
“Bwe kōn an Anij yokwe laļ, Ear letok juon wōt Nejin Ear keotak, bwe jabdewōt eo ej lōke E en jab jako, a en mour indeeo” (Jon 3:16).
Ekanooj ļap aō kam̧m̧oolol n̄an Jemedwōj Ilan̄ kōn iakwe eo eweeppān An n̄an aolep ajri ro Nejin.
Elōn̄ iaad jej dipuk jet apan̄ ko reppen ilo mour in. Juon iaan men ko reļļap tata an men kein ej n̄e juon eo ejitōn bōro ej mej ālkin ekanooj lōn̄ iiō ko kōn iien ko rekam̧ōņōņō ippān doon. Menin emaron̄ en̄jake āinwōt jab jouj jān Anij, bōtaab ilo m̧ool, ej juon mālijjon̄ ekwojarjar an mour jān juon Jemedwōj Ilan̄ eo ej iakwe me ekōņaan bwe jen eddōkļo̧k ilo tōmak bwe jen maron̄ erom āinwōt E.
Ad Irooj Jisōs Kraist eaar kwaļo̧k Ankilan n̄an rikanaan Josep Smith, eo eaar en̄jake ebbweer ilo inepata ko ad reppen ke eaar jijet, kalbuuj ilo Liberty jail:
“Im eļan̄n̄e renaaj joļo̧k eok ilo ron̄ eo, ak ilo pein riuror ro, im jem̧ļo̧k in mej ej likūt ioom; eļan̄n̄e renaaj joļo̧k eok ilo m̧wilaļ eo; elan̄n̄e ņo̧ n̄irn̄ir ko rej pepe ņae eok; eļan̄n̄e kōto kajoor ko rej erom am rikōjdāt; eļan̄n̄e lan̄ ko rej nijōkļo̧k, im aolep lan̄ in kobban rej koba n̄an pinej iaļ eo; im ilōn̄ in aolep, eļan̄n̄e atlaļ im atlōn̄ ko in hell rej kanooj eļļan̄ ilokam̧, kwōn jeļā, nejū m̧aan, bwe aolep men kein otemjeļo̧k renaaj lewōj n̄an eok imminene, im naaj n̄an em̧m̧anļo̧k eo am.
“Eo Nejin Armej eaar wanlaļļo̧k ium̧wier aolep. Kwe kwo ļapļo̧k jān E ke?
“Kōn menin, pād wōt ilo iaļ eo am, im priesthood eo enaaj pād wōt ippam̧; . . . jab mijak ta armej emaron̄ kōm̧m̧an, bwe Anij enaaj pād ippam̧ indeeo im indeeo” (Katak im Bujen ko 122:7–9).
Ilo juon iien loļo̧k an jerbal in karejar, kōm kar ilo̧k n̄an juon em̧ ijo ļeo pālele eaar mej; eaar jerbal tiljek āinwōt juon ritōl an Kabun̄ in. Lio pāleen jitōn bōro kar mālijjon̄ ilo en̄jake n̄an juon jon̄an eo me liin eaar jidik kōn jidik jerwane tōmak eo an im ikdeelel eo n̄an etal n̄an Kabun̄; ajri ro nejin raar ļoor eo jinier n̄an jāniknik. Ke kōm kar koba ippān baam̧le in ilo jibbon̄ in eo kōm kar loļo̧k, leddik ro nejin im ajri ro jibūn raar koba, kōm kar kwaļo̧k iakwe eo an Jemedwōj Ilan̄ im Jisōs Kraist n̄an kajjojo iaer.
Kōm kar kakeememej sister eo ejitōnbōro kōn bujen ko rekwojarjar e im ļeo pāleen raar kōm̧m̧ani jet iiō ko m̧oktaļo̧k ilo tampeļ eo ekwojarjar an Irooj. Naan in kaenōm̧m̧an ko am, kar rejtaki jān pād eo em̧m̧an an Jetōb Kwojarjar eo im iakwe eo am em̧ool n̄an e āinwōt būratōr ro an ilo gospel eo, kar kōmeraik būruwōn im liin eaar lan̄lōn̄ ke ememļo̧kjeņ ko rem̧m̧an kōn liāp eo an ilo tampeļ eaar kobrak ļōmņak eo an im būruwōn.
Kain̄i in tampeļ ko ad im bujen ko em̧wilaļ aer ekwojarjar im rej lukkuun in kwaļo̧k in iakwe eo an Jemedwōj Ilan̄ n̄an kōj. Kōjeraam̧m̧an ko raiboojoj kar kallim̧uri kōj kaki kōn bujen kein rekwojarjar renaaj kūrm̧ool wōt ilo ad pād wōt ilo tiljek m̧ae jem̧ļo̧kin.
Iaar kwaļo̧k ippān baam̧le eo bwe kiiō epaak ekar jako lio pāleō, im bwe eaar kanooj ļap aō on̄ kake e aolep raan. Jako in eļap ej juon inene eo inaaj aikuj in ineke m̧ae iien inaaj eļlāļo̧k n̄an mour eo tok juon bōtaab iaar kwaļo̧k ippāer kije eo aō n̄an wōnm̧aanļo̧k wōt in jerbal n̄an aō Rilo̧mo̧o̧r kōn aolepān būruwō m̧ae jem̧ļo̧kin, jeļā bwe juon raan, inaaj ioon lio pāleō ejitōnbōro bar juon alen im kōm naaj mour ippān doon kōn lan̄lōn̄ im m̧ōņōņō indeeo.
Ke kōm kar wōnm̧aanļo̧k wōt ilo jerbal in karejar eo ippān baam̧le in em̧m̧an, kōm kar kam̧ool kōn pein tūram̧o ko an Rilo̧mo̧o̧r eo rej erļo̧k, im kūr eo an n̄an er n̄an bar ro̧o̧ltok n̄an jar im lem̧ōņōņō kōn kōjeraam̧m̧an ko an gospel eo. Iaar oktakļo̧k n̄an kajjojo ro uwaan baam̧le eo, ijjino ippān eo jinen, im kar ba:
“Kwoj ke bōk kūr in jān ad Rilo̧mo̧o̧r?” Kwonaaj ke etal n̄an kweilo̧k in kwojkwoj eo ilo Jabōt ko?
Kajjojo iaer raar bōk kūr eo. Āinwōt rikarejeran ro rettā an Irooj, būruwōm ekar obrak kōn lan̄lōn̄ ke kōm kar kam̧oole an jetōb kein raar ukweļo̧k bōk bun̄tōn ko n̄an itok n̄an aer Rilo̧mo̧o̧r! Iaar en̄jake an lan̄ lem̧ōņōņō ippām ke kōm kar ekkejel ippān doon, jim̧or ilo mālijjon̄ im ilo tōmak.
Ejjab wōt ilo kōm̧m̧ani bujen ko rekwojarjar, ak wōnm̧aanļo̧k wōt ilo pokake er me rej lukōj kōm n̄an ro me rejitōn bōro ippām. Kilaan ko rekajoor an Pinmuur eo an ad Rilo̧mo̧o̧r im naajdik tōmak eo ad ejjab bōjrak kōn jar, ekkatak jeje ko rekwojarjar im jerbal in jipan̄ renaaj letok n̄an kōj kajoor eo jej aikuji n̄an jelm̧ae aolep apan̄ ko an mour.
Ad Rilo̧mo̧o̧r Jisōs Kraist ej ļōmņak kōn aolep ro rej en̄taan. Ejjab bōjrak An erļo̧k Pein tūraim̧o im iakwe eo An. Ij kūr aolep ro me rej jelm̧ae apan̄ ko reppen ilo mour ko aer, jekdo̧o̧n ta ro remaron̄ in, n̄an itok n̄an Rilo̧mo̧o̧r eo im lem̧ōņōņō kōn juon kwojkwoj ilo tebōl eo An ilo am̧ bōk m̧ōttan kwojkwoj eo kajjojo Jabōt, im kōm̧m̧an im kōjparok bujen ko rekwojarjar ilo tampeļ eo An ekwojarjar. Ilo am̧ kōm̧m̧ane menin, kallim̧ur in ej am̧:
“Kōn menin, jab mōk ilo kōm̧m̧an em̧m̧an, bwe kom̧ij likūt pedped in juon jerbal eļap. Im jān men ko reddik ej jebarļo̧k men eo eļap. Lo, Irooj ej aikuj bōro eo im ļōmņak eo em̧ōņōņō; im ro rem̧ōņōņō im pokake renaaj m̧ōn̄ā men ko rem̧m̧an jān āneen Zaion ilo raan kein āliktata” (Katak im Bujen ko 64:33–34).
Ij kam̧ool bwe bujen ko jej kōm̧m̧ani ilo iien peptaij, n̄e jej bōk priesthood eo ekwojarjar, im kain̄i ko kadedeļo̧ki ilo tampeļ eo, rej ekkejelļo̧k n̄an kōjeram̧m̧aan ko reļļap tata Irooj eaar kōpooji n̄an kōj. Kōn tiljek pokake eo ad n̄an bujen kein ilo ad niknik n̄an jem̧ļo̧kin, jenaaj bōk aolep kōjeraam̧m̧an ko kar kallim̧ur kaki an Irooj, ilo āt eo ekwojarjar etan ad Irooj Jisōs Kraist, amen.