E mau pipi mau nā te Fa’aora
E nehenehe tātou e fāri’i i te ’oa’oa vai maoro ’ia riro ana’e tō tātou Fa’aora ’e tāna ’evanelia ’ei vāhi i reira tātou e patu ai i tō tātou orara’a.
Hunari’ihia i roto i te buka a Hagai nō te Faufa’a Tahito, te hō’ē ïa fa’a’itera’a nō te hō’ē pupu ta’ata ’o tē nehenehe e fa’a’ohipa i te a’o a Elder Holland. ’Ua hape rā rātou i te mea ē, ’aita rātou i tu’u i te Mesia i rōpū i tō rātou orara’a ’e tā rātou tāvinira’a. ’Ua pāpa’i Hagai i te tahi mau ta’o ’o tē ha’aferuri, ’a ’avau ai ’oia i teie mau ta’ata e pārahi noa ra ma te au māite i tō rātou mau fare, ’aita i haere e patu i te hiero o te Fatu :
« E mea au ānei ia ’outou, e te mau ta’ata nei, ’ia pārahi i roto i tō ’outou mau fare ’āpapahia ra, ’e e vaiiho noa ānei i teie nei fare ?
« Tē nā ’ō mai ra Iehova Sabaota ra ; e ha’amana’o māite na i tō ’outou na mau haere’a.
« E rahi tā ’outou i ueue, e iti rā tei hōpoihia mai ; ’ua ’amu ’outou, ’aita rā i pa’ia ; ’ua inu ’outou, ’aita rā ’outou i ’ī i tei inuhia ra ; ’ua ’ahu ’outou i te ’ahu, ’aita rā te hō’ē māhanahana i te reira ; ’e tei noa’a iāna te utu’a ra, i noa’a ïa nō te pūtē motumotu ra.
« Tē nā ’ō mai ra Iehova Sabaota ra, e ha’amana’o māite i tō ’outou mau haere’a ».1
’Aita ānei ’outou e au ra i terā huru tātarara’a nō te faufa’a ’ore o te fa’arirora’a i te mau mea ’aore e hōpe’ara’a mure ’ore ’ei mau mea faufa’a a’e, nā ni’a a’e i te mau mea a te Atua ?
Tei roto vau i te hō’ē purera’a ’ōro’a ’aita i maoro a’enei, ’ua fa’aro’o vau i te hō’ē misiōnare tei ho’i mai, i te fa’ahitira’a i te parau a te hō’ē metua tāne i tāna mau tamari’i : « Tā tātou e hina’aro i’ō nei, e fa’aiti i te WIFI, e fa’arahi i te Nephi »
’Ua ora vau i Afirita to’o’a o te rā e pae matahiti, ’e ’ua ’ite au e rave rahi mau ta’ata tei ha’apa’o nā mua roa i te ’evanelia ma te ’ōhie ’e te ha’amā ’ore. Hō’ē hi’ora’a, ’o te i’oa ïa o te hō’ē taiete tātā’i pa’a huira ’e te fa’afāito i te huira pere’o’o i Ghana. ’Ua topa te fatu i te i’oa o te reira taiete « Te fa’a’āfarora’a i tō ’oe hina’aro ».
E nehenehe tātou e fāri’i i te ’oa’oa vai maoro2 ’ia riro ana’e tō tātou Fa’aora ’e tāna ’evanelia ’ei vāhi i reira tātou e patu ai i tō tātou orara’a. Terā rā, e mea ’ōhie roa nō te reira vāhi ’ia riro ’ei mau mea nō te ao nei, i reira te ’evanelia e riro ai ’ei mea hau nō te mā’iti, ’aore rā, ’ei haerera’a noa i te purera’a e piti hora te maoro i te mau sābati. Mai te mea ē, mai te reira te huru, e au ïa ē, tē tu’u ra tātou i tā tātou faufa’a i roto i « te hō’ē pūtē ’āpo’opo’o ».
Tē parau nei Hagai ia tātou ’ia fafau ia tātou iho—’ia riro, mai tā mātou e parau nei i Auteraria ē, ’ei ta’ata « fair dinkum » (pāpū) nō ni’a i te orara’a i te ’evanelia. Te ta’ata fair dinkum, ’o te ta’ata ē, tāna e parau nōna iho, ’o te reira mau.
’Ua ha’api’i ri’i mai au nō ni’a i te rirora’a ’ei ta’ata fair dinkum ’e te pūpūra’a iā’u iho, nā roto i te ha’utira’a i te fa’ahoro pōpō. ’Ua ha’api’i mai au ē, ’ia ha’uti ana’e au ma te pūai, ’ia hōro’a ana’e au i tō’u pūai ato’a, ’ua rahi atu ā tō’u ’oa’oa nō te ha’uti.
Tā’u matahiti ha’uti fa’ahoro pōpō au roa a’e, ’o te matahiti ïa i muri a’e i te ha’api’ira’a tuarua. E pupu ’aravihi ’e te pāpū te pupu tei roto vau i te ha’utira’a. ’O mātou te pupu ’aito i taua matahiti ra. Terā rā, i te hō’ē mahana, e ha’uti mātou i ni’a i te hō’ē pupu e ’ere i te mea pūai roa, ’e i muri iho i te ha’utira’a, ’ua noa’a mai tō mātou ’āpiti nō te haere i te ’orira’a rahi matahiti a te fare ha’api’ira’a. ’Ua feruri au ē, e ha’utira’a ’ōhie teie, nō reira, e tāmata vau i te pāruru iā’u ’eiaha vau ’ia pēpē, e nehenehe ïa vau e ’ārearea maita’i. I roto i te ha’utira’a, ’aita mātou i ha’uti pāpū maita’i i roto i te mau fa’aūra’a pūai mai tei tītauhia, ’e ’ua pau mātou. Te mea ’ino roa atu, i te hope’a o te ha’utira’a, ’ua ’oru roa tō’u ’utu, e ’ere roa atu i te mea nehenehe nō terā ’orira’a rahi. Tītauhia paha ’ia ha’api’i mai au i te hō’ē ha’api’ira’a.
’Ua tupu te hō’ē ’ohipa ta’a ’ē roa atu i roto i te hō’ē ha’utira’a i muri roa mai, ’e ’ua ha’uti pāpū vau i reira. I te hō’ē taime, ’ua horo pāpū vau i roto i te hō’ē fa’aūra’a ; i terā iho ā taime, ’ua māuiui tō’u hōho’a mata. ’E nō te mea ’ua ha’api’i tō’u metua tāne iā’u ē, ’eiaha roa atu vau e fa’a’ite ē, ’ua pēpē au, ’ua tāmau noa vau i te ha’uti. I taua pō ra, ’a tāmata ai au e ’amu i te mā’a, ’ite a’era vau ē, ’aita tā’u e nehenehe e hōhoni. I te po’ipo’i a’e, ’ua haere au i te fare ma’i, ’e ’ua fa’a’ite mai te ratio ē, ’ua fati tō’u ta’a. ’Ua tāpirihia tō’u vaha e ono hepetoma te maoro.
’Ua ha’api’i mai au i te tahi mau ha’api’ira’a nā roto mai i teie parabole o te ’utu ’oru ’e te ta’a fati. Noa atu terā roara’a e ono hepetoma ’aita i ’amu a’e i te mā’a pa’ari, e mā’a pape noa rā, ’aita vau e tātarahapa nei nō tō’u ta’a fati, nō te mea, e tāpa’o terā nō tō’u hōro’ara’a iā’u ma te pūai hope. Terā rā, tē tātarahapa nei au nō tō’u ’utu ’oru, nō te mea, e tāpa’o te reira nō tō’u ’ōtohetohera’a.
E ’ere te hōro’ara’a ’ia tātou ma te pūai hope i te tāpa’o nō te fāri’i-tāmau-ra’a i te mau mea maita’i ’aore rā, te manuia tāmau. Tōna rā aura’a, maori rā, e fāri’i tātou i te ’oa’oa. E ’ere te ’oa’oa i te navenave mōrohi haere noa, ’aore rā te pōpou tau poto. E vai maoro te ’oa’oa, ’e ’ua niuhia i ni’a i tā tātou tauto’ora’a ’ia fāri’ihia mai tātou e te Fatu.3
Hō’ē hi’ora’a nō te reira fāri’ira’a, o te ’ā’amu ïa o Oliver Granger. Mai tā te peresideni Boyd K. Packer i parau ra : « I te ti’avarura’ahia te feiā mo’a i rāpae ia Keterani… ’ua vaiihohia ’o Oliver i muri nō te ho’o i tō rātou mau fenua, ha’apa’o i te roa’a mai iāna. E ’ere roa atu te mea pāpū ē, e manuia ’oia. ’E ’aita iho ā ’oia i manuia ! » 4 I fa’auehia ’oia e te Peresidenira’a Mātāmua ’ia rave i te hō’ē ’ohipa fifi roa, e ’ohipa paha ïa e’ita iho ā e haere. Terā rā, ’ua ha’apōpou te Fatu iāna nō tāna mau tauto’ora’a, noa atu ē ’ia hi’ohia, ’aita i manuia, ’e teie tāna mau parau :
« Tē ha’amana’o nei au i tā’u tāvini ra ’o Oliver Granger ; inaha, ’oia mau tā’u e parau atu nei iāna e vai noa tōna i’oa i roto i te ha’amana’ora’a mo’a mai terā u’i atu i terā u’i ra, ē a muri ē a muri noa atu, tē nā reira mai nei te Fatu.
« Nō reira ’a tu’u atu iāna ’ia tītau itoito noa nō te fa’aorara’a mai i te Peresidenira’a Mātāmua nō tā’u ’Ēkālesia… ’e ’ia topa atu ’oia e ti’a fa’ahou mai ïa ’oia i ni’a, nō te mea e riro tāna tusia ’ei mea mo’a a’e iā’u nei i tāna ’āpī ra, tē nā reira mai nei te Fatu ». 5
E parau mau paha te reira nō tātou pā’āto’a—e ’ere tō tātou mau manuiara’a, ’o tā tātou rā fa’atusiara’a ’e te mau tauto’ora’a te mea faufa’a i te Fatu.
Te tahi atu hi’ora’a nō te hō’ē pipi mau nā Iesu Mesia, ’o te hō’ē ïa o tō māua hoa here i Côte d’Ivoire i Afirita tō’o’a o te rā. ’Ua fa’a’oroma’i maoro teie tuahine fa’ahiahia ’e te fa’aro’o i te mau hāmani-’ino-ra’a i te pae mānava ’e i te pae tino a tāna tāne, ’e i te pae hope’a ’ua ta’a rāua. ’Aita ’oia i ’āueue noa a’e i roto i tōna fa’aro’o ’e tōna maita’i, terā rā, nō te ’ino rahi o tāna tāne i ni’a iho iāna, ’ua pēpē roa ’oia nō te hō’ē tau roa. Teie tāna tātarara’a nō te ’ohipa i tupu :
« Noa atu tā’u parau ē, ’ua fa’a’ore au i tāna hapa, e ta’oto vau i te mau taime ato’a i roto i te pēpē ; e pau tō’u mau mahana ato’a i roto i taua pēpē ra. E au i te pēpē heve i tō’u ’ā’au. E rave rahi taime tō’u purera’a i te Fatu ’ia ’īriti i te reira, terā rā, nō te rahi te māuiui, ’ua ti’aturi pāpū vau ē, e vai noa vau mai te reira ē hope noa atu tō’u orara’a. ’Ua hau atu i te māuiui i te pohera’a tō’u māmā i tō’u ’āpīra’a ; ’ua hau atu i te māuiui i te pohera’a tō’u pāpā ’e tā’u tamaiti. E au ra ē, ’ua haere noa i te rahira’a ’e ’ua tāpo’i roa i tō’u ’ā’au, e au ra ē, e pohe au.
« I te tahi atu mau taime ’ua uiui noa vau iā’u iho ē, e aha tā te Fa’aora e rave i terā vaira’a, e pāhono rā vau : ‘’Ua rahi roa terā e te Fatu ē’.
« ’E i te hō’ē po’ipo’i ’ua ’imi au i terā māuiui i roto i tō’u ’ā’au nō te reira mau mea ato’a, ’e ’ua fa’ahōhonu ma te ’imi i te reira i roto i tō’u vārua. ’Aita i ’itehia mai. ’Ua hi’opo’a ’oi’oi tō’u ferurira’a i te mau tumu ato’a e tano ai ’ia tupu te mana’o pēpē, ’aita rā vau i ’ite i te māuiui. ’Ua tīa’i au i terā mahana tā’āto’a nō te hi’o ē, e ’ite ānei au i te māuiui i roto i tō’u ’ā’au ; ’aita i ’itehia mai. I reira, ’ua tūturi au i raro ’e ’ua ha’amāuruuru i te Atua nō te fa’a’ohipara’a i te tusia tāra’ehara a te Fatu nō’u ».6
I teienei tē ’oa’oa nei teie tuahine ’ua tā’atihia ’oia i te hō’ē ta’ata fa’ahiahia ’e te ha’apa’o maita’i tei here roa iāna.
Nō reira, e aha tō tātou huru e au ai mai te mea ē, e mau pipi mau tātou nā te Mesia ? ’E e aha te faufa’a o te ’evanelia nō tātou mai te mea ē, « e ha’amana’o māite [tātou] i tō [tātou] mau haere’a », mai tā Hagai e parau mai nei ?
E mea au roa nā’u te hi’ora’a nō te peu ti’a tei fa’a’itehia e te metua tāne o te ari’i Lamoni. Tē ha’amana’o ra ’outou i tōna riri mātāmua i tōna ’itera’a i tāna tamaiti tē ’āpe’ehia ra e Amona, hō’ē ’āti Nephi—hō’ē nūna’a ta’ata haehia e te ’āti Lamana. ’Ua huti mai ’oia i tāna ’o’e nō te ’aro ia Amona ’e ’aita i maoro, tei ni’a mai nei te ’o’e a Amona i tōna ’arapo’a. « E teienei, ’ua mata’u te ari’i ’o te pohe ’oia, i parau mai ai ’oia ē, ’ia fa’aherehere ’oe iā’u, e hōro’a atu vau ia ’oe i tā ’oe e ani, ’e tae noa atu i te ’āfara’a o te bāsileia nei ».7
’A hi’o na i tāna pūpūra’a—te ’āfara’a o te bāsileia nō tōna ora.
I muri a’e rā, i muri a’e i tōna māramaramara’a i te ’evanelia, ’ua rave ’oia i te tahi atu pūpūra’a. « ’Ua nā ō mai ra te ari’i : E nāfea atu vau ’ia roa’a mai iā’u taua ora mure ’ore ra tā ’oe i parau nei ? E nāhea atu ho’i au ’ia fānau-fa’ahou-hia vau i te Atua, ’ia mahiti-tumu-’ē-hia teie nei vārua ’ino i roto i tō’u nei ’ā’au, ’ia roa’a tōna ra Vārua, ’e ’ia fa’a’īhia ho’i au i te ’oa’oa, e ’ore ai au e ti’avaruhia ai i te mahana hope’a ra ? ’Ua parau ato’a mai ra ’oia, inaha, e fa’aru’e hua atu vau i tā’u ato’a ra faufa’a ; e fa’aru’e atu vau i tō’u nei bāsileia, ’ia roa’a ïa iā’u teie ’oa’oa rahi ra ».8
I teie taime, ’ua ineine ’oia nō te hōro’a i tōna bāsileia tā’āto’a, nō te mea, e mea faufa’a a’e te ’evanelia i te mau mea ato’a nāna ra ! ’Ua riro ’oia ’ei ta’ata fair dinkum (pāpū) nō te ’evanelia.
Nō reira, te uira’a nō tātou tāta’itahi ’oia ho’i, e mea fair dinkum (pāpū) ānei tātou nō te ’evanelia ? Mai te mea ē, e fafau ’āfa noa tātou, e ’ere ïa i te mea fair dinkum (pāpū) ! ’E tei ’itehia, e’ita te Atua e ha’apōpou i te ta’ata pāpū ’ore.9
’Aore e tao’a, ’aore e fa’a’ana’anataera’a, ’aore e ti’ara’a, ’aore e ha’apararera’a tōtiare, ’aore e ha’uti ’āfata teata, ’aore e tū’aro, ’aore e tā’atira’a ’e te hō’ē ta’ata tu’iro’o, ’aore hō’ē mea i ni’a i te fenua nei i hau atu i te faufa’a i te ora mure ’ore. Nō reira, teie te parau a’o a te Fatu i te mau ta’ata ato’a, « e ha’amana’o na i tō ’outou mau haere’a ».
’Ua fa’ahiti-maita’i-hia a’e tō’u mau mana’o i roto i te mau parau a Nephi : « Tē ’oa’oa nei au i te parau pāpū, tē ’oa’oa nei au i te parau mau ra, ’e tē ’oa’oa nei ho’i au i tō’u ra Iesu, nō te mea ’ua fa’aora ’oia i tō’u vārua ia hade ra ».10
E mau pipi mau ānei tātou nōna tei hōro’a i te tā’āto’ara’a nō tātou ? ’Oia tei riro ’ei Fa’aora nō tātou ’e tō tātou Ārai i mua i te Metua ? ’Oia ’o tei hōro’a hope roa iāna i roto i tāna tusia tāra’ehara ’e i teienei, tei roto i tōna here, tōna aroha, ’e tōna hina’aro ’ia roa’a tō tātou ’oa’oa mure ’ore ? Tē tāparu nei au i te feiā ato’a e fa’aro’o mai nei ’e e tai’o mai nei i teie mau parau : E tenāna, e tenāna, ’eiaha e fa’ataime i te tā’āto’ara’a o tā ’outou pūpūra’a ia ’outou nō te tīa’i i terā taime ta’a ’ore nō ananahi e rave ai i te reira. ’Ei ta’ata fair dinkum (pāpū) ’outou i teienei ’e ’a fāri’i i te ’oa’oa ! I te i’oa o Iesu Mesia, ’āmene.