Mau parau nō roto mai i te 189ra’a o te ’āmuira’a rahi nō ’Ātopa

’Ua fa’ahiti tāmau mai te feiā fa’atere o te ’Ēkālesia tei paraparau mai i te roara’a o te ’āmuira’a rahi, i te anira’a ’ia riro mai— ’ia riro mai ’ei mea ’oa’oa a’e, ’ia riro mai ’ei mea mo’a a’e, ’ia riro mai hau atu mai te Fa’aora, ’e ’ia tauturu ia vetahi ’ē ’ia nā reira ato’a.

Ta’a ’ē atu i te reira, ’ua ’imi rātou i te rāve’a ’ia ti’a i te tā’āto’ara’a ’ia rave i te reira tauira’a.

’Ua ha’api’i mai te peresideni Russell M. Nelson : « ’Ua hina’aro te Fatu ’ia fāri’i tāna mau tamari’i ato’a i te mau ha’amaita’ira’a mure ’ore e vai ra i roto i tōna hiero. Tītau-rahi-hia te fa’aineinera’a pae vārua nō te hō’ē ta’ata ’ia ti’amā nō te tomo i roto i te fare o te Fatu. Nā roto rā i te tauturu a te Fatu, ’aita e ’ohipa e ’ore e tupu ».

’Imira’a i te ’oa’oa ’e te mo’a

’Ua ani mai te peresideni Nelson ia tātou tāta’itahi ’ia fa’ata’ahia nō te mau ha’amaita’ira’a o te hiero (hi’o ’api 120).

’Ua tātara mai te peresideni Henry B. Eyring i te tū’atira’a i rotopu i te fa’arahira’a i te mo’ara’a ’e te fa’arahira’a i te ’oa’oa (hi’o ’api 100).

’Ua ha’api’i mai o Elder D. Todd Christofferson ia tātou nāhea ’ia ’ite mai « i te ’oa’oa o te feiā mo’a » (hi’o ’api 15).

Hō’ē anira’a ’ia here ’e ’ia fa’a’ite

’Ua ha’api’i mai te peresideni Nelson i te faufa’a rahi o te herera’a i tō tātou ta’ata tupu ’e ’ua fa’ata’a mai i te ’ohipa tauturu rahi a te ’Ēkālesia nā te ao nei (hi’o ’api 96).

’Ua tātara mai Elder Dieter F. Uchtdorf i te mana nō te anira’a ia vetahi ’ē « ’ia haere mai ’e ’ia hi’o » (hi’o ’api 86).

’Ua fa’ata’a mai te tuahine Cristina B. Franco i te ’oa’oa nō te fa’a’itera’a i te ’evanelia (hi’o ’api 83).

Ha’apūaira’a i te feiā ’āpī

’Ua ’ōmua mai te peropheta i te mau tauira’a nō te mau fa’anahora’a a te feiā ’āpī ’o tē fa’aitoito i te feiā ’āpī i roto i te mau peresidenira’a pupu autahu’ara’a ’e te mau peresidenira’a piha ’ia ti’a i ni’a ’e ’ia fa’atere (hi’o ’api 38).

’Ua vauvau mai o Elder Quentin L. Cook nāhea ’ia fa’atere i te Autahu’ara’a a Aarona (hi’o ’api 40).

’Ua fa’a’ite mai te tuahine Bonnie H. Cordon i te mau tauira’a i roto i te fa’anahora’a a te Feiā ’Āpī Tamāhine (hi’o ’api 67).

Patura’a te mau hiero; patura’a ia tātou

I roto i te tuha’a purera’a a te mau vahine, ’ua fa’aara mai te peresideni Nelson e va’u hiero ’āpī (hi’o ’api 120).

I te avatea sābati, ’ua ha’api’i mai ’oia nō ni’a ’ia fa’ata’ahia nō te tomo i roto i te hiero, ’e ’ua fa’a’ite mai i te mau uira’a tei fa’a’āfarohia nō te parau fa’ati’a o te hiero (hi’o ’api 120).