Fa’aturara’a i tōna i’oa
Ma te ihota’ata o te fafaura’a ’e te rirora’a ’ei melo, ’ua pi’ihia tātou ma te i’oa o Iesu Mesia.
’A tīa’i noa ai nā metua ma te fa’a’oroma’i i te fānaura’a o te hō’ē tama, tei ia rāua te hōpoi’a nō te mā’iti i te i’oa nō tā rāua ’aiu fānau ’āpī. Penei a’e i tō ’outou fānaura’ahia, ’ua fāri’i ’outou i te hō’ē i’oa tei hōro’ahia i roto i tō ’outou fēti’i mai tera u’i ’e tera u’i. ’Aore rā penei a’e te i’oa tei hōro’ahia nō ’outou, ’ua tu’i te ro’o i roto i te matahiti ’aore rā i te tuha’a fenua i reira ’outou i te fānaura’ahia.
’Ua hōro’a te peropheta Helamana ’e tōna hoa vahine i te mau i’oa fēti’i faufa’a tumu mau nō tā rāua nā tamāroa na’ina’i ’o Lehi ’e ’o Nephi. ’Ua parau i muri a’e ’o Helemana i tāna nā tamaiti :
« I topa atu vau ia ’ōrua i te i’oa o tō tātou tau metua … ’a ha’amana’o ai ’ōrua i tō ’ōrua ra tau i’oa ’ia ha’amana’o ’ōrua ia rāua ra ; ’e ’ia ha’amana’o ’ōrua ia rāua ra, ’a ha’amana’o ato’a i tā rāua ra mau ’ohipa ; ’ia ’ite ato’a i tei parauhia ’e tei pāpa’ihia ho’i, ’e tau ta’ata maitata’i rāua ».
« Nō reira, e tā’u pu’e tamari’i nei, ’ia rave ’ōrua i tei maita’i ra ».1
Te i’oa ’o Nephi ’e ’o Lehi, ’ua tauturu ia rāua ’ia ha’amana’o i te mau ’ohipa maita’i tā tō rātou tau tupuna, ’e ’ua fa’aitoito ia rāua ’ia nā reira ato’a.
Te mau tuahine, noa atu te vāhi tā tātou e noho nei, te reo tā tātou e parau nei, e 8 ānei matahiti tō tātou ’aore rā hau atu, tē mau nei tātou i te hō’ē i’oa e hō’ē ā fā tō te reira.
« O (tātou) ato’a ho’i tei bāpetizohia i roto i te Mesia, ’ua ’ahu ïa i tā te Mesia ra… hō’ē ā ho’i (tātou) i roto i te Mesia ra ia Iesu ».2
’Ei mero nō Te ’Ēkālesia a Iesu Mesia i te Feiā Mo’a i te mau Mahana Hope’a nei, « ’ua pūpū mātāmua atu tātou i tō tātou hina’aro ’ia rave i ni’a ia tātou iho te i’oa o te Mesia, nā roto te ’ōro’a nō te bāpetizora’a ».3 Nā roto i teie fafaura’a, ’ua tapu tātou ’ia ha’amana’o noa iāna, ’ia ha’apa’o i tāna mau fa’auera’a, ’e ’ia tāvini ia vetahi ’ē. Tō tātou hina’aro ’ia ha’apa’o i teie fafaura’a, ’ua fa’a’āpīhia ïa i te mahana sābati ato’a ’a rave ai tātou i te ’ōro’a mo’a ’e ’a ’oa’oa fa’ahou ai i roto i te ha’amaita’ira’a nō « te ta’ahira’a i roto i te hō’ē orara’a ’āpī ».4
Te i’oa tei hōro’ahia nō tātou i te fānaura’a e fa’a’ite mai te reira i tō tātou ihota’ata tāta’itahi ’e e hōro’a mai ia tātou i te rirora’a ’ei melo nō tō tātou ’utuāfare i te tāhuti nei. ’Āre’a rā, ’ia « fānau-fa’ahou-hia » tātou nā roto i te bāpetizora’a, e fa’arahihia tō tātou hāro’aro’ara’a ’o vai mau tātou. « Nō te faufa’a tā ’outou i fafau mai ra, ’e parauhia ai ’outou i te tamari’i a te Mesia… inaha ho’i… i fa’afānau-vārua-hia ai ’outou e āna ; nō te mea tē nā ō mai ra ’outou, ’ua fa’ahuru-’ē-hia tō ’outou ’ā’au nā roto i te fa’aro’o i tōna ra i’oa ; nō reira i fa’afānauhia ai ’outou e āna ».5
Nō reira, ma te ihota’ata o te fafaura’a ’e te rirora’a ’ei melo, ’ua pi’ihia tātou ma te i’oa o Iesu Mesia. ’E « ’aita atu e i’oa, ’aita ho’i e ’ē’a, ’aita ho’i e rāve’a e fa’a’itehia mai, e tae mai ai te ora i te tamari’i a te ta’ata nei, i roto ana’e rā, ’e nā roto ana’e ho’i i te i’oa o te Mesia, te Fatu Pūai Hope ».6
’Ua ’itehia te i’oa o Iesu hou tōna fānaura’ahia. I te ari’i Beniamina, ’ua tohu te hō’ē melahi, « ’E e ma’irihia tōna i’oa, ’o Iesu Mesia, te Tamaiti a te Atua… ’e e ma’irihia tōna metua vahine i te i’oa ra ia Maria ».7 Tāna ’ohipa nō « te aroha fa’aora »8 ’ua fa’a’ite-ato’a-hia i te mau tamari’i a te Atua i te mau taime ato’a ’a vai noa mai ai te ’evanelia i ni’a i te fenua nei, mai Adamu rāua o ’Eva mai ā e tae roa mai i tō tātou nei mahana, ’ia ’ite ho’i rātou « i te tumu ’e hi’ohia atu e rātou nō te matarara’a i tā rātou mau hara ».9
I te matahiti i ma’iri, ’ua fa’atae mai te peresideni Russell M. Nelson i te hō’ē ti’a’orora’a tohu i te mau tuahine ato’a ’ia « hāmani i te ananahi nā roto i te tauturura’a ’ia ha’aputuputu mai ia Iseraela tei ha’apurarahia ». ’Ua ani manihini mai ’oia ia tātou ’ia tai’o i te Buka a Moromona ’e ’ia « tāpa’o i te mau ’īrava tāta’itahi ’o tē parau nei nō ’aore ra tē fa’ahiti nei nō te Fa’aora. ’Ua ’ani ato’a mai ’oia ē « ’ia vai te hina’aro pāpū e paraparau nō te Mesia, e ’oa’oa i te Mesia ’e e poro i te Mesia i tō (tātou) ’utuāfare ’e te mau hoa ». Penei a’e ’ua ha’amata ’outou i te ’itea i te mau hotu o tāna parau tapu ē, « ’o ’outou ’e ’o ratou, e ha’afātatahia atu i te Fa’aora… ’E ’ei reira ho’i te mau tauira’a, te mau temeio ato’a ’e ha’amata ai i te tupu mai ».10
E hōro’a mai tā tātou fafaura’a, ’ia ha’amana’o tāmau noa i te Fa’aora, i te pūai nō te pāruru i te parau mau ’e te parau-ti’a, i rotopū i te hō’ē naho’a ta’ata ānei, ’aore rā i roto i tō tātou mau vāhi mo’emo’e, i te hō’ē vāhi ’aita roa te hō’ē ta’ata e ’ite i tā tātou mau ravera’a maoti te Atua ana’e. ’Ia ha’amana’o ana’e tātou iāna ’e tōna i’oa tā tātou e rave nei i ni’a iho ia tātou, ’aita roa e vāhi nā te mau fa’aaura’a vi’ivii ’aore rā nō te mau ha’avara’a teiaha. Ma tō tātou mata i ni’a i te Fa’aora, e ’ite tātou iho ’o vai mau tātou---hō’ē tamari’i here-mau-hia na te Atua.
E tauihia tā tātou fafaura’a, ’ia ha’amana’o ’ia tāmarū i te mau ha’ape’ape’ara’a o te ao nei, i te fe’a’a ’ei itoito ’e e hōro’a mai i te tīa’ira’a i te mau taime tāmatara’a.
’E ’ia hi’a ’e ’ia topa ana’e tātou i roto i tō tātou haerera’a i mua i ni’a i te ’ē’a nō te fafaura’a, e mata na tātou i te ha’amana’o i tōna i’oa ’e i tōna hāmani maita’i ia tātou. « Tei iāna ho’i te mana hope, ’e te pa’ari ato’a, ’e te ’ite ato’a ; tē hāro’aro’a ra ’oia i te mau mea ato’a ra, ’o te Atua aroha ’oia… ia rātou ’o te tātarahapa ’e te fa’aro’o i tōna ra i’oa ».11 ’Oia mau, ’aita e ta’i huru marū a’e ’oia ho’i te i’oa o Iesu Mesia nō te feiā ato’a e ’ā’au paruparu ’e te ’oto, ’o tē ’imi nei « ’ia rave maita’i a’e ’e ’ia riro ’ei mea maita’i a’e ».12
’Ua ha’api’i mai peresideni Nelson ē : « ’Ua topa te mahana i te taime e pārahi noa ’oe mai te hō’ē keresetiano muhu noa ’e te fana’o ho’i ». Tā ’oe ha’apa’ora’a e ’ere noa ïa i te fa’a’ite-tino-ra’a ia ’oe i te purera’a i te sābati. Maoti ra, ’o te fa’a’itera’a ia ’oe ’ei pipi mau mai te sābati po’ipoi ’e tae roa atu i te mahana mā’a pō. ’Aita re’a mea i ’iteāhia ’ei pipi ’āfa taime ra te huru na te Fatu Iesu Mesia ».13
Tō tātou hina’aro ’ia rave i te i’oa o te Mesia i ni’a ia tātou ’ua riro hau atu i te hō’ē ’aitauira’a parau pāpū. E ’ere i te hō’ē fafaura’a e fa’ata’oto ’aore rā te hō’ē fa’anahora’a ihotumu. E ’ere i te hō’ē peu nō te tomora’a ’aore rā te hō’ē tāreta i’oa tei pinehia i ni’a ia tātou. E ’ere i te hō’ē parau pāpa’i ’o tā tātou e tu’u ’ōhie noa atu i ni’a i te pa’epa’e ’aore rā e fa’atautau i ni’a i te papa’i. Tōnā i’oa ’ua « tu’uhia »,14, ’ua pāpa’ihia i roto i tō tātou ’ā’au, ’e ’ua « ’ō’otihia i ni’a i tō (tātou) ra mata ».15
E ti’a ’ia ha’amana’o-tāmau-hia te tusia tara’ehara a te Fa’aora i roto i tō tātou ferurira’a, tā tātou mau ’ohipa, ’e tō tātou mau auhoara’a ia vetahi ’ē. ’Aita ’oia i ha’amana’o noa i tō tātou i’oa, ’ua ha’amana’o tāmau rā ’oia ia tātou. ’Ua parau te Fa’aora ē :
« E mo’e ānei i te ’aiū i te metua vahine mau iho ; ’e ’aita atu ra e ’ite i te aroha i te tamaiti nō tōna iho ’ōpu ? ’Ē, e mo’e ā ïa iāna, e’ita rā ’oe ’e mo’e iā’u ».
« Inaha, ’ua pāpa’i ha’amau vau ia ’oe i ni’a i tō’u ’apu rima ».16
’Ua ha’api’i mai peresideni George Albert Smith e, « ’A fa’atura i te mau i’oa tā ’outou e mau nei, nō te mea, ’ia tae i te hō’ē mahana, ’e hōro’ahia ia ’oe te taime ’e te hōpoi’a nō te parau-ti’a atu i te Fatu i te ra’i ra… e aha tā ’outou i rave i (tera) mau i’oa »,17
Mai te au i te mau i’oa o Nephi ’e o Lehi tei mā’iti-māite-hia, e ti’a ānei i te parauhia ’e i te pāpa’ihia nō tātou nei ’ei pipi mau tātou na te Fatu ra o Iesu Mesia ? Tē fa’ahanahana mau ra ānei tātou i te i’oa ’o Iesu Mesia mai tei au, ’o tā tātou ho’i i rave mai ma te hina’aro mau i ni’a ia tātou nei ? ’E ti’a ānei ia tātou ’ia pi’i-to’o-piti-hia ’ei « tahu’a ’e ’ei ’ite »18 nō tōna ra here-maita’i-mau ’e tōna pūai fa’aora ?
’Aita i maoro roa a’e nei, tē fa’aro’o ra vau i te tai’ora’a o te Buka a Moromona. ’Ia tae i te pene hope’a o Nephi 2, ’ua fa’aro’o vau ia Nephi i te paraura’a i te hō’ē mea, ’inaha ’aita vau i tai’o a’e nei mai te reira i muta’a iho ra. I roto i te tā’āto’ara’a o tāna mau pāpa’i, tē ha’api’i’ nei ’oia ’e tē fa’a’ite pāpū nei ’oia nō te « Fa’aora », i « Tei Mo’a i Iseraela ra », te « ’Arenio a te Fatu », ’e te « Mesia ». ’A ’ōpani ai ’oia i tāna pāpa’i, ’ua fa’aro’o vau iāna i te paraura’a i teie mau parau : « Tē ’oa’oa nei au i te parau pāpū ; tē ’oao’a nei au i te parau mau ra ; ’e tē ’oa’oa nei ho’i au i tō’u ra Iesu, nō te mea ’ua fa’aora ’oia i tō’u vārua ».19 I tō’u fa’aro’ora’a i teie mau parau, ’ua ’oa’oa roa tō’u ’ā’au ’e, ’ua tāmau atu vau i te fa’aro’o fa’ahou ā ’e na ni’a-iho-noa. ’Ua ’itehia iā’u ’e ’ua pāhonohia e teie nei ’īrava mai te au i tā’u i ’ite ’e i pāhono i tō’u iho i’oa.
’Ua parau a’e nei te Fatu, « ’oia ïa, ’e ao tō teie nei feiā tō tei hina’aro ’ia rave i tō’u ra i’oa ’ei i’oa nō rātou ; e ma’irihia ho’i rātou i tō’u i’oa, ’e nō’u ïa rātou ».20
’Ei mau melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei, ’ia « rave-’oa’oa-ato’a (i ni’a ia tātou) te i’oa ’o te Mesia 21 ma te fa’atura i tōna ra i’oa ma te here, te ’ā’au fa’aro’o ’e te mau ’ohipa maita’i. Tē fa’a’ite pāpū nei au, ’o ’oia te « ’Ārenio a te Atua, ’oia ïa, te Tamaiti a te Metua Mure ’Ore ra ».22 Nā roto i te i’oa o tāna ’aiu mo’a, ’o Iesu Mesia, ’āmene.