Te ’aravihi pae vārua
Ei pipi ha’apa’o maita’i nā Iesu Mesia, e nehenehe ’outou e fāri’i i te fa’aurura’a ’e te heheura’a nō ’outou iho mai te au i tāna mau fa’auera’a tei fa’ata’ahia nā ’outou.
’A fa’aru’e ai au i te pūhapara’a a te feiā ’āpī tamāhine i teie tau ve’ave’a i ma’iri iho nei, hōro’a mai ra te hō’ē tamāhine nehenehe i te hō’ē nota. I roto i te reira, tē ui ra ’oia, « nāhea vau e ’ite ai ē, tē tāmata nei te Atua i te parau mai iā’u i te hō’ē mea ? » ’Ua au roa vau i tāna uira’a. Tē hina’aro nei tō tātou vārua i te hō’ē tū’atira’a i tō tātou fare i te ra’i ra. Tē hina’aro nei tātou ’ia ’ite e mea hina’arohia ’e e mea hina’aro-mau-hia tātou. Terā rā, i te tahi taime, tē ’aro nei tātou nō te fa’ata’a i tō tātou iho mau mana’o ’e te mau mana’o marū o te Vārua. ’Ua ha’api’i te mau peropheta i tahito ra ’e i teie tau ē, « o te mau mea ato’a ho’i tē tītau mai ’ia rave i te maita’i, nō ’ō mai ïa i te Mesia ra ».1
’Ua tu’u mai te peresideni Russell M. Nelson i te hō’ē tītau-manihini-ra’a ’ōhie ’e te pūai : « E au mau taea’e e au mau tuahine here ē, tē tāparu atu nei au ia ’outou ’ia fa’arahi i tō ’outou ’aravihi pae vārua nō te fāri’i i te heheura’a. ’A mā’iti ’ia rave i te ’ohipa pae vārua e tītauhia nō te fāna’o i te hōro’a o te Vārua Maita’i ’e nō te fa’aro’o pinepine a’e ’e te pāpū a’e, i te reo o te Vārua ».2
Tē hina’aro nei au i teie po’ipo’i e paraparau atu ia ’outou mai roto atu i tō’u ’ā’au nō ni’a e maha rāve’a nō te fa’arahi i tō ’outou ’aravihi pae vārua nō te fāri’i i te heheura’a.
1. ’Ia riro ’ei ta’ata nō te fa’ata’a i te taime ’e te vāhi nō te fa’aro’o i te reo o te Atua
’A fa’a’ohipa ai ’outou i tō ’outou taime vata nō te fāna’o i te taime i te mau mahana ato’a nō te ha’afātata atu ia ’outou i te reo o te Atua, i roto iho ā rā i te Buka a Moromona, i te roara’a o te tau, e māramarama maita’i mai tōna reo ’e e mātau hau atu ’outou i te reira.
’Āre’a te mau fa’a’areareara’a ’e te māniania ’o tē fa’a’ī nei i te ao ’e i tō tātou fare ’e i tō tātou orara’a, e nehenehe te reira e ha’afifi ia tātou ’ia fa’aro’o i tōna reo. E nehenehe teie mau fa’a’areareara’a e fa’a’ī i tō tātou ferurira’a ’e tō tātou ’ā’au ’e e’ita tātou e vaiiho i te hō’ē vāhi nō te mau muhumuhu marū a te Vārua Maita’i.
’Ua ha’api’i mai te peropheta Iosepha Semita ē, i te rahira’a o te taime e pinepine te Atua i tē fa’a’ite mai iāna iho « i te ta’ata i te vāhi mo’emo’e, i roto i tō rātou piha ; i te medebara ’aore rā te mau fa’a’apu, ’e i te rahira’a o te taime, ma te māniania ’ore ’e te ’ārepurepu ’ore ».3
Hina’aro Sātane e fa’ata’a ’ē ia tātou i te reo o te Atua nā roto i te ’īritira’a mai ia tātou mai roto atu i terā mau vāhi maniania ’ore. Mai te mea ē, e paraparau mai te Atua ma te reo marū ’e te ha’iha’i, tītauhia ia ’outou ’e iā’u ’ia ha’afātata nō te fa’aro’o iāna. ’A feruri nā i te mea e tupu mai, ’āhiri ē, ’ua natihia tātou i te ra’i ma te hina’aro mau, mai ia tātou i nati-tāmau-hia i te rēni tāniuniu ’ore [Wi-Fi]. ’A rave i te hō’ē taime ’e te hō’ē vāhi ’e ’a fa’aro’o i te reo o te Atua i te mau mahana ato’a. ’E ’a ha’apa’o pāpū i te reira fārereira’a mo’a, nō te mea ’ua rau te mau mea e tupu mai nā roto mai i te reira !
2. E ha’a ma te fa’ataime ’ore
’Ia fāri’i ana’e ’outou i te muhumuhu ’e ’ia ’ohipa ma te hina’aro mau, e nehenehe te Fatu e fa’a’ohipa ia ’outou. Rahi noa atu ’outou te ’ohipara’a, rahi noa ato’a atu te mātaura’a i te reo o te Vārua. E rahi noa atu ā tō ’outou ’itera’a i te arata’ira’a a te Atua ’e « tōna hina’aro e heheu mai i tōna mana’o ’e tōna hina’aro ».4 ’Ia fa’ataime ’outou, e riro i te mo’ehia ia ’outou te muhumuhu ’aore rā, te fāna’ora’a ’ia tauturu i te ta’ata nō te Atua.
3. ’A fāri’i mai i tā ’outou ’ohipa mai ō mai i te Fatu ra
Te pure tā te Metua i te ao ra e pāhono pāpū mai, o tā tātou ïa tāparura’a ’ia arata’ihia tātou i mua i te hō’ē ta’ata tei hina’aro i tā tātou tauturu. ’Ua ha’api’i mai te peresideni Henry B. Eyring ia tātou ’ia ’imi i te heheura’a nā roto i te uira’a i te Atua o vai tā tātou e nehenehe e tauturu nōna. « Mai te mea e ui ’outou i te mau uira’a mai te reira te huru, e haere mai te Vārua Maita’i, ’e e ’ite ’outou i te tahi fa’aurura’a nō ni’a i te mau mea e nehenehe ’outou e rave nō te tahi atu mau ta’ata. ’Ia haere ana’e ’outou e rave i terā mau ’ohipa, tei roto ïa ’outou i te ’ohipa a te Fatu, ’e mai te mea ē, tei roto ’outou i te ’ohipa a te Fatu, e ti’a ïa ia ’outou ’ia fāri’i i te hōro’a a te Vārua Maita’i ».5
E nehenehe ’outou e pure ’e e ani i te Fatu i te hō’ē ’ohipa. Mai te mea ē, e nā reira ’outou, e nehenehe ’oia e fa’a’ohipa i tō ’outou mau ’ite ha’iha’i nō te fa’atupu i tāna mau ’ohipa fa’ahiahia.
Tō’u pāpā rū’au [pae māmā], o Fritz Hjalmar Lundgren, ’ua haere mai ’oia nā Suede mai i te 19ra’a tōna matahiti. ’Ua tae mai ’oia i Amerika ’oia ana’e, hō’ē ’āfata ’ahu ’e e ono ana’e matahiti ha’api’ira’a. Ma te ’ite ’ore i te parau Peretāne, ’ua haere ’oia i Oregon ’e ’ua rave i te ’ohipa i reira ’ei ta’ata tāpū rā’au, ’e ’ua tomo mai i roto i te ’Ēkālesia ’e tō’u māmā rū’au [pae māmā] ’e tō’u metua vahine. ’Aita roa atu ’oia i fa’atere i te hō’ē pāroita, terā rā, e taea’e hāhaere ’utuāfare ha’apa’o ’oia, ’e ’ua hau atu i te 50 ’utuāfare tāna i fa’aho’i mai i roto i te ’Ēkālesia. Nāhea ’oia i te ravera’a i te reira ?
I muri a’e i te pohera’a o pāpā rū’au, ’ua pāheru vau i te hō’ē ’āfata nō tāna mau parau ’e ’ua ’itehia mai iā’u hō’ē rata tei pāpa’ihia e te hō’ē ta’ata tei ho’i fa’ahou mai i roto i te ’Ēkālesia maoti te here o papa rū’au. Tē nā ’ō ra te rata ē, « iā’u i mana’o, te ’ohipa mo’emo’e a te taea’e Fritz, maori rā, o te rave-noa-ra’a ïa i te ’ohipa a te Metua i te ao ra ».
Nā te taea’e Wayne Simonis i pāpa’i i taua rata ra. ’Ua haere o pāpā rū’au e fārerei iāna ’e ’ua ’imi ’ia ’ite i te melo tāta’itahi o te ’utuāfare. I muri a’e, ’ua parau o pāpā rū’au ia rātou ē, tē hina’arohia ra rātou, ’e ’ua ani manihini ’oia ia rātou ’ia haere mai i te purera’a. Terā rā i taua sābati ra, ’ua ara mai te taea’e Simonis ma te mana’o tapitapi—’aita i oti te tāpo’i fare i te tāmauhia ’e te mana’ohia ra, e ūahia i taua hepetoma ra. ’Ua fa’aoti a’era ’oia ē, e haere ’oia i te fare purera’a, e aroha ’ia pāpā rū’au, ’e i muri iho, e ho’i mai i te fare nō te fa’aoti i te tāpo’i fare. E nehenehe tōna ’utuāfare e haere i te purera’a ’ōro’a ’aita ’ōna.
E mea ’āfaro maita’i tāna fa’anahora’a, e tae roa atu i ni’a i te tāpo’i fare, fa’aro’o a’era ’oia i te hō’ē ta’ata te ta’umara’a mai nā ni’a i te ’ē’a. Teie tāna parau : « I tō’u hi’ora’a atu, ’ite atu ra vau i te taea’e Fritz i te pae i ni’a o te ’ē’a. ’Ua ’ata’ata noa mai ’oia iā’u. I te ha’amatara’a, ’ua huru ’ē ri’i au, e au pa’i au mai te hō’ē tamari’i tei ’itehia i te ’apera’a i te ha’api’ira’a. I muri iho, ’ua riri au. [Terā rā, ’ua ’īriti a’era te taea’e Fritz] i tōna pereue ’e ’ua fa’atārere i ni’a i te ’ē’a. ’A firi ai ’oia i tōna rima ’ahu ’uo’uo, fāriu mai’ra ’oia i ni’a iā’u ’e nā ō mai ra, e te taea’e Simonis, e hāmara fa’ahou tā oe ? E ’ohipa faufa’a mau paha teie, ’āhiri ē, e ’ere, e’ita ïa ’oe e fa’aru’e i tō ’oe ’utuāfare, ’e mai te mea ē, e mea faufa’a, tē hina’aro nei au e tauturu ia ’oe.’ ’A hi’o ai au i roto i tōna mata, e marū ’e te here Mesia ana’e tā’u i ’ite atu. ’Ua ’ore tō’u riri. ’Ua vaiiho vau i tā’u mau mauiha’a i taua sābati ra ’e ’ua pe’e i tō’u hoa maita’i i raro i te ’ē’a ’e ho’i atu i te fare purera’a ».
’Ua fāri’i o pāpā rū’au i tāna ’ohipa nā roto mai i te Fatu, ’e ’ua ’ite ’oia ē, ’ua tītauhia iāna ’ia ’imi i te māmoe mo’e. Mai terā nā ta’ata e maha tei amo i tō rātou hoa hāpepa i ni’a i te tāpo’i fare ’e ’a tu’u mai ai iāna i raro ’ia fa’aorahia e Iesu,6 ’ua nā reira ato’a te ’ohipa a pāpā rū’au, ’ua ’āfa’i iāna i ni’a i te tāpo’i fare. E fa’atae mai te Fatu i te heheura’a i te feiā e ’imi ’ia tauturu ia vetahi ’ē.
4. Fa’aro’o ’e ti’aturi
’Aita i maoro a’e nei, ’ua tai’o vau nō ni’a i te hō’ē misiōnare rahi tei fāri’i i tāna ’ohipa nā ō mai i te Fatu. Tē ha’api’i ra o Aarona i te ari’i o te ’āti Lamana, tei ui ē, nō te aha ’aita o Amona, te taea’e o Aarona, i haere ato’a mai e ha’api’i iāna. « ’Ua parau atu ra Aarona i te ari’i : Inaha, ’ua tīpapa-’ē-hia oia e te Vārua o te Fatu ».7
’Ua paraparau mai ra te Vārua i tō’u ’ā’au : E misiōni ta’a ’ē tā tātou tāta’itahi e rave, ’e i te tahi taime e nehenehe te Vārua e « tīpapa ’ē » ia tātou. ’Ua rau te mau rāve’a nō te patu i te bāsileia o te Atua ’ei mau pipi fafau-rave e fafau-ha’apa’o nā Iesu Mesia. ’Ei pipi ha’apa’o maita’i nāna, e nehenehe ’outou e fāri’i i te fa’aurura’a ’e te heheura’a nō ’outou iho mai te au i tāna mau fa’auera’a tei fa’ata’ahia nā ’outou. E misiōni ’e e ’ohipa ta’a ’ē tā ’outou e rave i roto i te orara’a, ’e e fāri’i ’outou i te arata’ira’a ta’a ’ē nō te fa’aoti i te reira.
Mai ia Nephi, te taea’e o Iareda, ’e tae noa atu ia Mose, e moana rahi tā rātou pā’āto’a i rātere nā ni’a iho—’e e mea ta’a ’ē tā te tahi rāterera’a i tā te tahi. ’Ua tarai o Nephi i « te mau rā’au, o te ’ohipa huru ’ē ».8 ’Ua hāmani te taea’e o Iareda i te mau pahī « piri maita’i mai te besine ra ».9 ’E o Mose « ’ua haere noa… nā rōpū i taua moana ra nā ni’a i te repo marō ».10
’Ua fāri’i rātou tāta’itahi i tā rātou iho arata’ira’a, tei fa’ata’ahia nō rātou, ’e ’ua ti’aturi ’e ’ua ’ohipa rātou tāta’itahi. E ha’ape’ape’a te Fatu nō te feiā ’o te ha’apa’o i tāna parau, ’e, ’ia au i te mau parau a Nephi, « e fa’aineine ’oia i te hō’ē rāve’a nō rātou, e ti’a ai ia rātou i te rave i te mea tāna i fa’aue mai ia rātou ra ».11 ’A ha’apa’o maita’i na i te parau a Nephi, « hō’ē rāve’a »—e ’ere « te rāve’a ».
E ma’iri ānei tātou ’aore rā e fa’a’ore ānei tātou i tā tātou mau ’ohipa nō ō mai i te Fatu ra nō te mea ē, ’ua fa’aineine ’oia i te « hō’ē rāve’a » ta’a ’ē atu i tā tātou e tīa’i nei ?
’Ua arata’ihia tō’u pāpā rū’au i te hō’ē vāhi mātaro-’ore-hia—i roto i te hō’ē pereue, i ni’a i te punu fare, i te hō’ē sābati. ’A ti’aturi i te Atua nō te arata’i ia ’outou, noa atu ē, e mea ta’a ’ē ri’i te reira ’ē’a i tā ’outou e tīa’i ra, ’aore rā e mea ta’a ’ē i te tahi atu.
’Ua rau te huru ’e te fāito o te feiā mo’a i te mau mahana hope’a nei, terā rā, « hō’ē ana’e tō te ta’ata ato’a ti’ara’a i mua i te Atua »—« te ta’ata ’ere’ere ’e te ’uo’uo, te tītī ’e te ti’amā, te tāne ’e te vahine », te ’ōtahi ’e tei fa’aipoipohia, tei veve ’e tei tao’a rahi, tei ’āpī ’e tei rū’au, tei melo maoro ’e tei fa’afāriu ’āpī-hia.12 Noa atu o vai ’outou ’aore rā e aha tā ’outou e fārerei nei, ’ua ani-manihini-hia ’outou i ni’a i te ’amura’a mā’a a te Fatu.13
’Ia riro ana’e te ’imira’a ’e te ravera’a i te hina’aro o te Metua ’ei ’ohipa nō tō ’outou orara’a i te mahana tāta’itahi, e arata’ihia ïa ’outou nō te taui ’e nō te tātarahapa.
’Ua patuhia te fa’anahora’a ’āpī a te ’Ēkālesia nō te mau tamari’i ’e nō te feiā ’āpī i ni’a i te niu o te ha’api’ira’a ’ia ’imi i te heheura’a, te ’itera’a e aha tā te Fatu e tītau ia tātou ’ia rave, ’e ’ia rave i taua arata’ira’a ra. E nehenehe tātou tāta’itahi, ta’a ’ē noa atu tō tātou matahiti ’e te huru orara’a, e tūtava ’ia ’imi, ’ia fāri’i, ’e ’ia rave. ’Ia pe’e ana’e ’outou i teie ’ē’a mure ’ore tei fa’ata’ahia nō tō tātou ’anotau, ’e ha’afātata atu ïa ’outou ia Iesu Mesia—tōna here, tōna māramarama, tāna arata’ira’a, tōna hau, ’e tāna fa’aorara’a ’e te mana fa’atupu. ’Ei reira ’outou e fa’arahi ai i tō ’outou ’aravihi pae vārua ’ia riro mai ’ei mauiha’a nō tōna rima nō te fa’atupu i tāna ’ohipa rahi i te mau mahana ato’a. I te i’oa o Iesu Mesia, ’āmene.