Mau ’ite, mau pupu Autahu’ara’a a Aarona, ’e mau piha ha’api’ira’a Feiā ’Āpī Tamāhine
Te mau tauira’a tā mātou e fa’a’ite atu i teienei, ’ua ’ōpuahia ïa nō te tauturu i te feiā ’āpī tamāroa ’e te feiā ’āpī tamāhine ’ia fa’ananea i tō rātou iho pūai mo’a.
E te mau taea’e ’e te mau tuahine here, e mea fa’ahiahia mau ’ia tae fa’ahou mai i rotopū ia ’outou i roto i te ’āmuira’a rahi. I te ’ōmuara’a o teie hepetoma, ’ua fa’ataehia te mau fa’aarara’a i te mau melo o te ’Ēkālesia nō ni’a i te mau tauira’a i roto i te fa’aturera’a nō ni’a i te ’itera’a ē, o vai te nehenehe e ti’a ’ei ’ite i roto i te mau ’ōro’a bāpetizora’a. Te hina’aro nei au e ha’apāpū i te reira nā tumu parau e toru.
-
E nehenehe te mau ta’ata ato’a e parau fa’ati’a mana tā rātou, ’e e parau fa’ati’a tā’ōti’ahia, e riro ’ei ’ite nō te bāpetizora’a mono o te hō’ē ta’ata pohe.
-
E nehenehe te mau melo ato’a e parau fa’ati’a nō te hiero tā rātou e tāvini ’ei ’ite nō te mau ’ōro’a tā’atira’a, nō te feiā ora ’e nō tei pohe.
-
E nehenehe te mau melo ato’a o te ’Ēkālesia tei bāpetizohia, e ti’a ’ei ’ite nō te bāpetizora’a o te hō’ē ta’ata ora. Nō te mau bāpetizora’a ato’a i rāpae i te hiero teie tauira’a.
E mau tauira’a ture teie nō ni’a i te ravera’a. ’Aita te mau ha’api’ira’a ’e te mau parau fafau i taui. Tē vai maita’i noa ra te reira i roto i te mau ’ōro’a ato’a. E ha’amaita’i rahi roa teie mau tauira’a i te ’āmuira’a mai te ’utuāfare i roto i teie mau ’ōro’a.
Tē hina’aro ato’a nei au e paraparau ia ’outou i teie taime nō te fa’a’ite atu i te mau tauira’a nō ni’a i tā tātou feiā ’āpī ’e tō rātou feiā fa’atere.
Tē ha’amana’o ra paha ’outou ē, ’ua ani manihini au i te feiā ’āpī o te ’Ēkālesia a Iesu Mesia i te Feiā Mo’a i te Mau Mahana Hope’a nei ’ia fa’aō i roto i te nu’u tāma’i feiā ’āpī a te Fatu nō te rave i te ’ohipa rahi roa a’e i ni’a i te fenua nei i teie mahana—te ha’aputuputura’a ’o Iseraela.1 ’Ua fa’atae au i teie anira’a manihini i tō tātou feiā ’āpī nō te mea e ’aravihi ta’a ’ē tō rātou nō te toro i te rima ia vetahi ’ē ’e ’ia fa’a’ite i tō rātou ti’aturira’a ma te pāpū maita’i. Te ’ohipa nō te ha’aputuputura’a, ’o te hō’ē ïa tuha’a faufa’a nō te tauturura’a ’ia fa’aineine i te ao nei ’e i tōna mau ta’ata nō te tae-piti-ra’a mai o te Fa’aora.
I roto i te pāroita tāta’itahi, nā te hō’ē ’episekōpo e fa’atere i te nu’u tāma’i feiā ’āpī a te Fatu, hō’ē tāvini ha’apa’o nā te Atua. Tāna hōpoi’a mātāmua roa o te ha’apa’ora’a ïa i te feiā ’āpī tamāroa ’e te feiā ’āpī tamāhine o tāna pāroita. Nā te ’episekōpo ’e tōna nā tauturu e arata’i i te ’ohipa a te mau pupu Autahu’ara’a a Aarona ’e a te mau piha ha’api’ira’a Feiā ’’Āpī Tamāhine i roto i te pāroita.
Te mau tauira’a tā mātou e fa’a’ite atu i teienei, ’ua ’ōpuahia ïa nō te tauturu i te feiā ’āpī tamāroa ’e te feiā ’āpī tamāhine ’ia fa’ananea i tō rātou iho pūai mo’a. Tē hina’aro ato’a nei mātou e ha’apūai i te mau pupu Autahu’ara’a a Aarona ’e te mau piha ha’api’ira’a Feiā ’Āpī Tamāhine, ’e ’ia hōro’a i te pāturura’a i te mau ’episekōpo ’e i te tahi atu feiā fa’atere ta’ata pa’ari, ’a tāvini ai rātou i te u’i e ti’a mai nei.
E paraparau atu o Elder Quentin L. Cook i teienei i te mau tauira’a nō ni’a i te feiā ’āpī tamāroa. ’E i teie pō, i roto i te tuha’a purera’a rahi nā te mau vahine, e paraparau te tuahine Bonnie H. Cordon, peresideni rahi nō te Feiā ’Āpī Tamāhine, i te mau tauira’a nō ni’a i te feiā ’āpī tamāhine.
’Ua tāhō’ē te Peresidenira’a Mātāmua ’e te Tino ’Ahuru Ma Piti i te turura’a i teie mau tauto’ora’a nō te ha’apūai i tō tātou feiā ’āpī. E here rahi tō mātou ia rātou ’e te pure nei mātou nō rātou ! ’O rātou « te ti’aturira’a o ’Īserāʼela, te nu’u nō Ziona, te mau tamari’i nō te mahana i fafauhia mai ».2 Tē fa’atae atu nei mātou i tō mātou ti’aturi hope i roto i tō tātou feiā ’āpī ’e tō mātou tāpa’o māuruuru ia rātou. Nā roto i te i’oa mo’a o Iesu Mesia, ’āmene.