Tē fa’a’ite nei te feiā fa’atere i te Tauto’ora’a ’Āpī a te mau Tamari’i ’e te Feiā ’āpī
E fa’a’ohipahia te mau tamari’i ’e te feiā ’āpī i te ’āva’e Tēnuare 2020 nō te tauturu i te feiā ’āpī ’ia pe’e i te Fa’aora ’a tupu ai rātou i te rahi i te pae vārua, te pae tōtiare, te pae tino ’e i te pae ferurira’a. Nō te mau a’ora’a i roto i teie ve’a e ’āparau nei i ni’a i te mau tamari’i ’e te feiā ’āpī, hi’o i te mau ’api 40 ’e 53.
« ’Ua tae i te taime nō te hō’ē arata’ira’a ’āpī, fa’ata’ahia nō te tauturu i te mau tamari’i ’e i te feiā ’āpī nō teie tau, ’ati a’e te ao nei », te parau ïa a te peresideni Russell M. Nelson i roto i te hō’ē ha’apūrorora’a ta’a ’ē i te 29 nō Tetepa 2019.
’Ua parau ’oia i te mau tamari’i ’e i te feiā ’āpī ē, « tē ani nei mātou ia ’outou ’ia paraparau i te Fatu nō ni’a i te huru e nehenehe ai ’outou e tupu i te rahi ma te au māite, ’eiaha rā e hōro’a atu ia ’outou nō e rave rahi mau ’ohipa ta’a maita’i. E riro ïa ’ei mea faufa’a ’e te ’ārearea ato’a, terā rā, e tītau-ato’a-hia ia ’outou ’ia ’ohipa. Tītauhia ia ’outou ’ia ’imi i tā ’outou iho heheura’a. Tītauhia ia ’outou ’ia mā’iti ’outou iho nāhea ’ia pāhono i te reira. I te tahi taime e nehenehe te Vārua e fa’auru mai ia ’outou ’ia rave i te mau ’ohipa fifi. Tē mana’o nei au ē, ’ua ineine ’outou nō te pāhono i te tītaura’a. E nehenehe ’outou e rave i te mau ’ohipa teimaha ».
’Ua parau ato’a te peresideni Nelson ē, e ’ohipa faufa’a roa tā te mau metua. « ’A patu i te mau tā’amura’a pa’ari ’e tā ’outou mau tamari’i ’e te feiā ’āpī », te nā reira ra ’oia. « E nehenehe te feiā fa’atere o te ’Ēkālesia e tauturu, terā rā, nā ’outou teie mau tamari’i. ’Aita e ta’ata mana pūai a’e i ni’a i tō rātou manuiara’a maori rā, o ’outou. ’A hōro’a ia rātou i te here, te fa’aitoitora’a, ’e te parau a’o, terā rā, ’eiaha roa atu rā e fati i raro a’e i te fa’ahemara’a ’ia rave i tā rātou tuha’a. E rave maita’i atu rātou i te ’ohipa mai te mea ē, e fa’a’ohipa rātou i tō rātou iho ti’amāra’a.
Tē parau fa’ahou ra te peresideni Nelson ē, « e au ato’a teie parau a’o nō tō tātou feiā fa’atere ’e te mau ’orometua fa’ahiahia o tā tātou mau tamari’i ’e te feiā ’āpī » « Tītauhia ia tātou ’ia vaiiho i te feiā ’āpī ’ia arata’i, o rātou iho ā rā tei pi’ihia ’e tei fa’ata’ahia nō te tāvini i roto i te mau peresidenira’a piha ha’api’ira’a ’e te pupu autahu’ara’a. ’Ua hōro’ahia ia rātou te mana o te autahu’ara’a. E ha’api’i mai rātou nāhea ’ia fāri’i i te fa’aurura’a i roto i te arata’ira’a i tā rātou piha ’aore rā, pupu autahu’ara’a ».
I roto ato’a i te reira vauvaura’a parau, ’ua fa’a’ite mai te peresideni M. Russell Ballard, peresideni mono nō te pupu nō te Tino ’Ahuru mā Piti ’āpōsetolo, i te hi’ora’a a te mau Tamari’i ’e te Feiā ’āpī : « ha’apūai i te fa’aro’o o te u’i ’āpī e ti’a mai nei i roto i te Mesia, ’e e tauturu i te mau tamari’i, te feiā ’āpī, ’e tō rātou ’utuāfare ’ia haere i mua i ni’a i te ’ē’a o te fafaura’a, ’a fārerei ai rātou i te mau tītaura’a o te orara’a nei ».1 ’Ua parau ’oia ē, « te tauturura’a i te mau tamari’i ’e i te feiā ’āpī ’ia roa’a te hō’ē ’itera’a pāpū nō Iesu Mesia, e ha’amaita’i te reira ia rātou ’e ’ia tātou pā’āto’a i roto i tō tātou orara’a.
I muri a’e i tō te feia ’āpī i roto i te ha’apūrorora’a ’āmuira’a i roto i te hō’ē ’ohipara’a nō te fa’a’ite i te fa’a’ohipara’a i te Buka arata’i ’ōmuara’a nō te mau Tamari’i ’e te Feiā ’āpī, ’ua parau te peresideni Ballard : « o te ha’amata-noa-ra’a teie. I teie mahana, tē ha’amata nei tātou nā ni’a i teie ’ohipara’a. Teie te tahi mea e tāmau i te rave i roto i tō ’outou ’utuāfare ’e ’ia rave ’āmui ’outou. Tē ani nei mātou ia ’outou ’ia tāmau i te rave i teie ’ohipara’a. E te mau metua, ’a tāmau ā i te rave i te reira i te fare ». ’Ua ha’apāpū mai ’oia ē, « e fa’anahora’a tei fa’atumuhia i te fare, pāturuhia e te ’Ēkālesia » ’e « e ’āmui hō’ē mai te ’utuāfare i roto i teie fa’anahora’a. Nā te reira e fa’ariro i teie ’ohipa ’ei ’ohipa fa’ahiahia ».
I roto i te mau fenua e rave rahi nā te ao nei, ’ua fāri’i ato’a te mau metua ’e te feiā fa’atere i tā rātou iho buka arata’i ’ōmuara’a. I te tahi atu mau fenua, e fāri’i te mau Tamari’i ’e te Feiā ’āpī i te ’īritira’a nā roto i tō rātou reo i muri iho, i te matahiti 2020.
Tē ha’api’ira’a mai i te ’evanelia, te tāvinira’a, ’e te mau ’ohipara’a, ’e te fa’ahotura’a i te ta’ata iho (tae noa atu i te ha’amaura’a ’e te fa’atupura’a i te mau ’ōpuara’a), e riro ïa te reira ’ei mau tuha’a faufa’a pāpū nō te mau Tamari’i ’e te Feiā ’āpī, ’e nā te feiā ’āpī e arata’i i te fa’anahora’a. E ’imi te mau tamari’i ’e te feiā ’āpī i te heheura’a nō te ta’ata iho ’a haere ai rātou i mua i ni’a i te ’ē’a o te fafaura’a, ma te pāturuhia e te ’utuāfare, te feiā fa’atere, ’e vetahi ’ē atu. Tē nā ō ra te peresideni Ballard ē, e hō’ē tauto’ora’a te mau Tamari’i ’e te Feiā ’āpī nā te ao ato’a nei, ’e nō reira, ’ia tano te reira nō te « mau vāhi e nohohia ra e ’outou, ’e nō tō ’outou huru orara’a ’utuāfare ».
E hōro’ahia atu te mau tātarara’a ’e te mau rāve’a tauturu i roto i te hō’ē ha’apūrorora’a Mata ’e Mata nō te mau tamari’i ’e te feiā ’āpī i te 17 nō Novema 2019, ’e o Elder Gerrit W. Gong nō te pupu nō te Tino ’Ahuru mā Piti ’āpōsetolo. Te mau tamari’i ’e te feiā ’āpī e ti’ahia e 8 ’e tae atu i te 18 matahiti i roto i te matahiti 2020, tō rātou mau metua, ’e te feiā fa’atere nō te Feiā ’Āpī Tamāhine, te mau tauturu ha’amāramarama nō te Autahu’ara’a a Aarona, ’e te feiā fa’atere nō te Paraimere, tē anihia atu nei rātou ’ia haere mai i taua ha’apūrorora’a ra. ’A fa’atae atu i tā ’outou mau uira’a nō ni’a i te fa’anahora’a te mau Tamari’i ’e te Feiā ’āpī ia Elder Gong ra, i ni’a i te facetoface. ChurchofJesusChrist.org. I muri a’e i te reira ha’apūrorora’a nō roto e 18 reo, e ha’aputuhia te video ’ia nehenehe ’ia hi’o-fa’ahou-hia ’aore rā, ’ia fa’auta-uira-hia i te mau huru taime ato’a.