’Ia tīa’i ’outou ma te pure tu’utu’u ’ore (Alama 34:39 ; Moroni 6:4 ; Luka 21:36)
E mea tītauhia ’ia vai ara tāmau noa ’eiaha te mana’o vaiiho noa ’e te tāu’a ’ore.
Tē pure māite nei au nō te tauturu a te Vārua Maita’i, nō ’outou ’e nō’u nei, ’a ’oa’oa ai tātou ’e ’a ha’amori ’āmui ai tātou.
I te ’āva’e ’Ēperēra 1976, ’ua paraparau ta’a ’ē ’o Elder Boyd K. Packer i te feiā ’āpī i roto i te ’āmuira’a rahi. I roto i tāna a’ora’a mātau maita’i ’oia ho’i « Te mau mo’o taehae pae vārua », ’ua fa’ati’a mai ’oia i tōna tonora’ahia i Afirika, ’ua hi’o ’oia i te mau mo’o taehae tāhuna i te tāmoemoera’a i te mau ’ānimara tei ’ore i ha’apa’o ia rātou. ’Ua fa’aau atu ra ’oia i te mau mo’o taehae ia Sātane, tē tāmoemoe ra i te feiā ’āpī pa’ari ’ore nā roto i te tāhunara’a i te huru pohe o te hara.
23 matahiti tō’u i te hōro’ara’a Elder Packer i teie a’ora’a, tē tīa’i ra māua Susan i tā māua tamari’i mātāmua e fānauhia ma’a mahana i muri mai. ’Ua fa’ahiahia roa māua i tāna a’ora’a nō ni’a i te ’apera’a i te hara ’e tōna ’aravihi rahi nō te fa’a’ohipara’a i te peu mātau o te mau ’ānimara nō te hōro’a i te ha’api’ira’a pae vārua faufa’a rahi.
E rave rahi ato’a taime tō māua Susan tonora’ahia i Afirika. ’Ua fāna’o māua i te māta’ita’i i te mau ’ānimara nehenehe mau e ora ra i ni’a i terā fenua ra’ituāta’a. Nō te ha’amana’ora’a māua i te pūai o te a’ora’a a Elder Packer i ni’a i tō māua orara’a, ’ua tāmata māua i te hi’o ’e i te ’apo mai i te mau ha’api’ira’a mai roto i te mau ’ānimara ’e te mau rā’au tupu nō Afirika.
Tē hina’aro nei au e fa’a’ite i te huru ’e te mau fa’anahora’a a e piti tēpara (guépard) tā māua Susan i hi’o i te a’ua’ura’a i te mau ’ānimara, ma te fa’aau i te tahi mau mea tā māua i ’ite i roto i te orara’a tāmahana i te ’evanelia a Iesu Mesia.
Te mau tēpara ’e te mau topi
’O te mau tēpara te mau ’ānimara horo roa a’e i ni’a i te fenua, e ra’ehia ia rātou te fāito 120 km/h. ’Ia ha’amata rātou i te horo, e nehenehe e ra’ehia te 109 km/h i roto e toru noa a’e setoni. E ’a’aiora te tēpara e tāpiri ’ōmo’emo’e i te mau ’ānimara nō te a’ua’u vitiviti atu ai nā muri ia rātou, ma’a horora’a poto noa.
Fātata e piti hora tō māua Susan māta’ita’ira’a i nā tēpara e piti i te fa’aa’ua’ura’a i te hō’ē nana topi, te mau tītina (antilope) mātau maita’i ’e te ’āere roa i Afirika. E mea teitei ’e te marō ’e te māre’are’a te ’aihere i te medebara nō Afirika, ’e fātata te reira i te huna roa i nā ’a’aiora ’a a’ua’u ai rāua i terā nana topi. Tei te hō’ē pae te hō’ē tēpara, tei te tahi pae te tahi, fātata e 91 metera i rōpū ia rāua, ’ua ’ohipa ’āpipiti rā rāua.
’A pārahi ’āfaro noa ai hō’ē i roto i te ’aihere ma te ha’uti ’ore, e ne’e marū te tahi i pīha’i iho i te mau topi tei ’ore i ha’apa’o iāna. ’Ei reira terā tēpara tei pārahi noa na e ha’amo’e ai iāna i roto i te ’aihere, e pārahi ’āfaro ïa te tahi i terā taime. E mea huru maoro te reira ’ohipa i te tupura’a, te hō’ē tei ne’e atu ’a pārahi ’āfaro ai te tahi i roto i te ’aihere. Te ’ōpuara’a o teie ’ohipa ’ōmo’emo’e ’e te ’aravihi, nō te fa’a’ōnevaneva ïa ’e nō te fa’ahema i te mau topi, ’eiaha rātou ’ia ha’apa’o i te fifi e fātata ra ia rātou. Ma te marū noa ’e te pāpū, ’ua ’ohipa ’āpipiti nā tēpara ’ia noa’a tā rāua mā’a ’amu.
I rōpū i teie nana rahi topi ’e nā tēpara e ne’e mai ra, ’o te mau topi pa’ari ïa ’e pāutuutu maita’i, tē ti’a ra i ni’a i te mau pu’u rō pererau (termites) ’ei tīa’i. Maoti te hi’ora’a āteatea o te medebara mai ni’a mai i teie nau ’aivi iti te mau tīa’i topi e hi’ohi’o ai i te mau tāpa’o nō te ’ohipa ataata.
I te nava’ira’a te pirira’a o nā tēpara nō te haru mai i tā rāua mā’a, huri a’era te nana topi tā’ato’a ’e ’ua horo atu ra. ’Aita vau i ’ite ē, nā te mau tīa’i topi ānei i fa’a’ite atu, ’e nāhea pa’i rātou i te fa’a’itera’a, ’ua tae rā te parau fa’aara ’e ’ua horo pauroa te mau topi i te hō’ē vāhi pāruru.
E aha ïa tā teie nā tēpara i rave ? ’Aita i ha’amaoro, ’ua rave fa’ahou ā rāua i tā rāua fa’anahora’a e ne’e atu te hō’ē ’a pārahi ’āfaro ai te tahi i roto i te ’aihere. ’Ua tāmau noa te reira huru a’ua’ura’a. ’Aita rāua i fa’aea. ’Aita rāua i fa’afa’aea ri’i ’aore rā i fa’ataime ri’i. E mea tu’utu’u ’ore rāua i te ha’apa’ora’a i tā rāua fa’anahora’a fa’anevaneva ’e te fa’aruri ’ē i te mana’o. ’Ua hi’o māua Susan i nā tēpara i te mo’era’a i te ātea, ’e te ha’afātata-noa-ra’a i terā nana topi.
I terā pō, e ’āparaura’a fa’ahiahia tā māua nō ni’a i te mea tā māua i māta’ita’i ’e i ’apo mai. ’Ua paraparau ato’a māua i teie ’ohipa i tā māua mau tamari’i ’e mau mo’otua ’e ’ua ’apo mai mātou e rave rahi ha’api’ira’a faufa’a rahi mau. E fa’a’ite atu vau i teienei e toru ha’api’ira’a.
Ha’api’ira’a #1—E hi’o maita’i i te ’ahu fa’anehenehe o te ’ino
Iā’u nei, e mea moremore maita’i ’e te nehenehe ’e te fa’atupu ānoenoe te tēpara. ’Ua riro te huruhuru māre’are’a ’e te mārehu ’e te ’uo’uo ri’i ma te patapata ’ere’ere ’ei ’ahu nehenehe ’o tē ha’amo’e i teie nau ’ānimara ’a tāmoemoe ai rātou i tā rātou mā’a i roto i te fenua ’aihere nō Afirika.
Nā reira ato’a, e mea pinepine te mau mana’o ’e te mau ’ohipa ataata i te pae vārua e fa’a’itehia mai ’ei mea fa’ahina’arohia ’e te hia’aihia ’e te auhia. Nō reira i roto i tō tātou nei ao, tītauhia ia tātou tāta’itahi ’ia ’ite i te ’ino fa’anehenehe e fa’ahua nei ’ei mea maita’i. Mai tā Isaia i fa’aara : « E pohe tō rātou tō tei parau i te ’ino ra, e maita’i, ’e te maita’i ra, e ’ino ; ’o tei parau i te pōuri ra, e māramarama, ’e te māramarama e pōuri ; ’o tei parau i te maramara ra, e monamona, ’e te monamona ra, e maramara ! »1
I te hō’ē tau huru ’ē e pūharahia te rave-’ino-ra’a o te mo’ara’a o te ora ta’ata ’ei ’ohipa mana ’e e fa’a’itehia te ti’arepu ’ei ti’amāra’a, ’auē ïa ha’amaita’ira’a nō tātou te orara’a i teie tau tu’ura’a nō te mau mahana hope’a nei i reira te ’evanelia i fa’aho’ihia e nehenehe ai e ’ana’ana maita’i i roto i tō tātou orara’a nō te tauturu i te hāro’aro’a i te mau fa’ahemara’a pōiri a te ’enemi ’e te mau fa’anevanevara’a.
« Nō te mea ’o rātou ’o tei pa’ari ’e ’ua fāri’i ho’i i te parau mau, ’e ’ua rave ho’i i te Vārua mo’a ’ei arata’i nō rātou ra, ’e ’aita ho’i rātou e ha’avarehia—’oia mau tā’u e parau atu ia ’outou na e ’ore roa rātou e tāpūhia ’e e hurihia i roto i te auahi, e fa’a’oroma’i rā rātou i te reira mahana ».2
Ha’api’ira’a #2—E vai ara noa ’e e araara noa
Nō te topi, te hō’ē noa taime iti ha’apa’o ’ore ’e te ’ōnevaneva, te harura’a ïa te tēpara iāna. Nā reira ato’a, nā te tahi ri’i noa mana’o vaiiho noa ’e te tāu’a ’ore i te pae vārua e pāruru ’ore ia tātou i mua i te nu’ura’a a te ’enemi. E ataatara’a rahi e tae mai i roto i tō tātou orara’a i te ha’apa’o ’ore pae vārua.
iStock.com/Angelika
’Ua fa’ata’a mai Nephi nāhea Sātane e tāmata i te fa’ahau ’e i te fa’ata’oto i te mau tamari’i a te Atua i roto i te mana’o hape nō te ataata ’ore pae tino, « e parau ai rātou ē, e maita’i tō Ziona ; ’oia ïa, ’ua manuïa Ziona, e maita’i tōna—e nā reira te diabolo i te ha’avare i tō rātou vārua e tē arata’i māite atu ho’i ia rātou i raro i hade ».3
E mea tītauhia ’ia vai ara tāmau noa ’eiaha te mana’o vaiiho noa ’e te tāu’a ’ore. Te vai-ara-ra’a, ’o te hi’o-māite-noa-ra’a ’e te hi’o-maita’i-noa-ra’a i te mau ataatara’a ’e te mau fifi e nehenehe e tupu mai. E te hi’o-maita’i-noa-ra’a, e au ïa i te ’ohipa vai ara noa nō te tīa’i ’e nō te pāruru. I te pae vārua, tītauhia ia tātou ’ia vai ara noa ’e ’ia araara noa i te mau muhumuhu o te Vārua Maita’i ’e te mau fa’aarara’a mai roto i te mau tīa’i a te Fatu i ni’a i te pare.4
« E fa’aitoito ho’i au ia ’outou… ’ia tīa’i ’outou ma te pure tu’utu’u ’ore, ’ia ’ore outou ’ia arata’i-’ē-hia e te fa’ahemara’a a te diabolo… inaha ho’i, e ’ore ’oia e fa’autu’a ia ’outou i te hō’ē mea maita’i ».5
Maoti te fa’atumura’a i tō tātou orara’a i roto ’e i ni’a i te Fa’aora ’e tāna ’evanelia e ti’a ai ia tātou ’ia upo’oti’a i ni’a i te huru ta’ata tino nei e vāre’a ta’oto ’e e fa’atau i te pae vārua. ’A ha’amaita’ihia ai tātou i te mata ’ite ’e te tari’a fa’aro’o,6 e ti’a atu ra i te Vārua Maita’i ’ia fa’arahi atu ā i tō tātou ’aravihi ’ia hi’o ’e ’ia fa’aro’o i te taime iho ā rā e’ita tātou e mana’o ē, tītauhia ia tātou ’ia hi’o ’e ’ia fa’aro’o ’aore rā i te taime e’ita tātou e mana’o ē, e nehenehe e ’itehia ’e e fa’aro’ohia te mau mea.
« Nō reira, e ara noa, ’ia vai ineine noa ’outou na ».7
Ha’api’ira’a #3—Māramarama i te hina’aro o te ’enemi
E ’a’aiora te tēpara ’e ’o tōna nātura te a’ua’ura’a i te tahi atu mau ’ānimara. I te mahana tā’āto’a, i te mau mahana ato’a, e ’a’aiora te tēpara.
« E ’enemi [Sātane] nō te parau ti’a ’e nō rātou e ’imi i te rave i te hina’aro o te Atua ».8 I te mahana tā’āto’a, i te mau mahana ato’a, ’o tōna noa hina’aro ’e te fā ’ia ro’ohia te mau tamaiti ’e te mau tamāhine a te Atua i te ’ati mai iāna te huru.9
’Ua ’ōpuahia te fa’anahora’a ’oa’oa a te Metua nō te fa’afāna’o i tāna mau tamari’i i te arata’ira’a, nō te tauturu ia rātou ’ia ’ite i te ’oa’oa vai maoro ’e nō te fa’aho’i pāpū ia rātou i te fare iāna ra, ma te tino ti’afa’ahou tei fa’ateiteihia. Tē ha’a nei te diabolo ’ia ta’a ’ore ’e ’ia ’oa’oa ’ore ho’i te mau tamaiti ’e te mau tamāhine a te Atua, ’ia taupupū tō rātou haerera’a mure ’ore i mua. Tē ’ohipa tu’utu’u ’ore nei te ’enemi nō te ’aro i te mau tuha’a o te fa’anahora’a a te Atua tāna i hae roa a’e.
’Aita tō Sātane e tino, ’e ’ua mau tōna haerera’a mure ’ore i mua. Mai te pape i roto i te ’ānāvai tei mau i te pahura’a pape, mai te reira ato’a te haerera’a mure ’ore i mua o te ’enemi i te mau, nō te mea ’aore tōna e tino tāhuti. Nō tōna ’orurehau, ’ua fa’a’ere ’o Lucifero iāna iho i te mau ha’amaita’ira’a ato’a o te tāhuti nei ’e te ’ite e noa’a maoti te hō’ē tino ’i’o ’e te ivi. Hō’ē aura’a tē nehenehe e hōro’a nō te parau ’anatemahia, e ’itehia ïa i roto i te ’orera’a ’oia e nehenehe e haere fa’ahou i mua nō te riro mai tō tātou Metua i te Ra’i ra te huru.
Nō te mea ho’i e tumu rahi tō te tino tāhuti nei i roto i te fa’anahora’a ’oa’oa a te Metua ’e tō tātou tupura’a pae vārua, tē ’imi nei Lucifero i te ha’amanuia ’ore i tō tātou haerera’a i mua nā roto i te ’umera’a ia tātou ’ia fa’a’ohipa i tō tātou tino ma te ti’a ’ore. ’Ua ha’api’i te peresideni Russell M. Nelson ē, tei roto roa te pāruru pae vārua i « ‘te ’ore roa atu e tu’u i te ’āvae mātāmua nō te haere i te vāhi ’eiaha e haere ’e nō te rave i te mea ’eiaha e rave’… Tātou te ta’ata nei, e mau hia’amu [pae tino] tō tātou pā’āto’a tei tītauhia ’ia oraora tātou. ‘E mea faufa’a roa teie mau hia’amu ’ia vai noa te ora. Nō reira, e aha tā te ’enemi e rave ? E ’aro ’oia ia tātou nā roto i tō tātou mau hia’amu. E ’ume ’oia ia tātou nō te ’amu i te mau mea ’eiaha e ’amu, nō te inu i te mau mea ’eiaha e inu ’e nō te here i te huru ’eiaha tātou e nā reira !’ »10
Hō’ē mea huru ’ē roa nō te tau mure ’ore, ’o te tītaura’a ïa ’e te fa’a’amu’amura’a te ’enemi ia tātou, i roto i tōna ’ati rahi nō te ’erera’a i te tino tāhuti, ’ia ’āmui i tōna ’ati nā roto i te fa’a’ohipa-tano-’ore-ra’a i tō tātou nei tino. Te mauiha’a iho ’aita tāna ’e ’o tāna e ’ore e nehenehe e fa’a’ohipa, ’o te fā mātāmua ïa nō tāna mau tauto’ora’a parura’a ia tātou i te ha’amoura’a pae tino ’e pae vārua.
E ora tātou maoti te māramaramara’a i te ’ōpuara’a a te ’enemi, nō te fa’aineine ia tātou nō tāna mau ’arora’a.11 I te mea mau ho’i ’ua ’ite te Tāpena Moroni i te ’ōpuara’a a te mau ’āti Lamana tōna fa’aineinera’a nō te ’aro ia rātou i te haerera’a mai rātou ’e ’ua upo’oti’a ’oia.12 E tano ato’a ho’i te reira parau tumu ’e te parau fafau nō tātou tāta’itahi.
« Mai te mea… ’ua vai ineine noa ’outou e ’ore ’outou e mata’u.
« ’E ’ia ora atu ’outou i te mana o te ’enemi ».13
Te anira’a, te parau fafau ’e te ’itera’a pāpū
Mai te mau ha’api’ira’a faufa’a rahi e nehenehe e ’apo mai nā roto i te māta’ita’ira’a i te huru o te mau tēpara ’e te mau topi, ’ia ’imi ato’a tātou tāta’itahi i te mau ha’api’ira’a ’e te mau fa’aarara’a i roto i te mau ’ohipa ’ōhie o tō tātou orara’a tāmahana. ’Ia ’imi tātou i te ha’amahora i te ferurira’a ’e te ’ā’au nō te fāri’i i te arata’ira’a nō te ra’i nā roto i te mana o te Vārua Maita’i, ’ei reira te tahi o te mau arata’ira’a rahi roa a’e tā tātou e nehenehe e fāri’i, nā reira ato’a te mau fa’aarara’a pūai roa a’e ’e te rave rahi e nehenehe e pāruru ia tātou, e tupu mai ai i roto i tō tātou iho orara’a. E mau parabole pūai rahi i roto i te mau pāpa’ira’a mo’a ’e tō tātou orara’a tāmahana.
E toru noa ha’api’ira’a tā’u i fa’a’ite atu i roto i te mau ha’api’ira’a e rave rahi e nehenehe e ’apo mai i roto i terā rēhiti nā māua Susan i Afirika. Tē ani nei au ’e tē fa’aitoito nei au ia ’outou ’ia feruri i ni’a i teie ’ohipa iti tā’u i fa’ati’a nō ni’a i te mau tēpara ’e te mau topi ma te hi’o mai i te tahi atu ā mau ha’api’ira’a nō ’outou ’e nō tō ’outou ’utuāfare. E ha’amana’o noa na ē, ’o tō ’outou fare te pū mau nō te ha’api’i i te ’evanelia ’e nō te ora i te ’evanelia.
’A pāhono ai ’outou ma te fa’aro’o i teie anira’a, e tae mai te mau mana’o fa’auru i tō ’outou ferurira’a, e fa’a’ī roa te mau mana’o pae vārua i tō ’outou ’ā’au ’e e ’ite mai ’outou i te mau ’ohipa e rave ’aore rā ’o tē tāmau i te rave ’ia ti’a ia ’outou ’ia « rave… i te tā’āto’ara’a o [te] ha’ana tama’i i ni’a ia [’outou] na, ’ia ti’a ia [’outou] ’ia pāruru ia [’outou] iho na i te mahana ’ino rahi ra, nā roto i te ravera’a i te mau mea ato’a, e ti’a noa mai ai [’outou] i ni’a ».14
Tē parau fafau nei au ē, e mani’i mai te mau ha’amaita’ira’a nō te fa’aineinera’a manuia ’e te pārurura’a pae vārua i roto i tō ’outou orara’a ’a tīa’i ai ’outou ma te pure vai ara ’e te tu’utu’u ’ore.
Tē fa’a’ite pāpū nei au ē, e noa’a te pārurura’a pae vārua i te haere-ti’a-noa-ra’a i mua i ni’a i te ’ē’a nō te fafaura’a ma te tītau i te ’oa’oa vai maoro i roto i tō tātou orara’a. ’E tē fa’a’ite pāpū nei au ē, e pāturu ’e e ha’apūai te Fa’aora ti’afa’ahou ’e te ora ho’i ia tātou i roto i te mau taime maita’i ’e te mau taime fifi. Tē fa’a’ite pāpū nei au nō teie mau parau mau, i te i’oa mo’a o te Fatu Iesu Mesia, ’āmene.