’Ia oti te tāmatara’a o tō tātou fa’aro’o
Mai te mea ’e pe’e tātou i te reo o te Atua ’e tōna ’ē’a nō te fafaura’a, e ha’apūai ’oia ia tātou nā roto i tō tātou mau tāmatara’a.
I tō’u tamari’iri’ira’a, ’ua hōro’a mai te hō’ē melo maita’i nō te ’Ēkālesia, nō te tauturu i tō’u ’utuāfare ’ia reva mai Puerto Rico haere atu i Roto Miti, ’ia nehenehe ia mātou ’ia tā’atihia i roto i te hiero, i reira iho ā, ’ua ha’amata ato’a te mau ha’afifira’a i te tupu mai. ’Ua ro’ohia te hō’ē o tō’u mau tuahine, o Marivid, i te ma’i. Ma te hepohepo, ’ua pure tō’u nā metua e aha te ti’a ia rāua ’ia rave ’e inaha ho’i ’ua fa’auru-noa-hia rāua ’ia rave i te tere. ’Ua ti’aturi rāua ē, nō te mea ē te pe’e māite noa ra rāua i te fa’aurura’a a te Fatu, ’e ara ’e ’e ha’amaita’ihia ïa tō mātou ’utuāfare, e ’oia mau.
Rau noa atu te mau ha’atāfifira’a ō tā tātou e fa’aruru i roto i te orara’a, e nehenehe tātou e ti’aturi ē e fa’aineine mai Iesu Mesia i te hō’ē ’ē’a nō te pe’e ’a haere ai tātou ma te fa’aro’o. ’Ua fafau mai te Atua ē ’o rātou ato’a o te ora itoito ’ia au i te mau fafaura’a i ravehia e rātou e ’ōna, e fāri’i ïa, i tōna taime, terā mau ha’amaita’ira’a ato’a i fafauhia. ’Ua ha’api’i o Elder Holland, « e tae ’oi’oi mai te tahi mau ha’amaita’ira’a, e taere te tahi o rātou, ’e te tahi atu ā ’aita roa ïa e tae mai na mua a’e i te ra’i; nō rātou rā ’o tei fāri’i i te ’evanelia a Iesu Mesia, e tae mai iho ā ».1
’Ua fa’ata’a mai o Moroni ē, « te fa’aro’o nei, ’o te ti’aturi ïa i te mau mea ’aore i hi’ohia; nō reira, ’eiaha ’outou e mārō i te mea ’aore i hi’ohia e ’outou; e ’ore ho’i ’outou e tae i te ’ite ’e ’ia oti te tāmatara’a i tō ’outou fa’aro’o ».2
Tā tātou uira’a ’oia ho’i : E aha te ti’a ia tātou ’ia rave nō te pāhono-maita’i-ra’a i te mau tāmatara’a e tae mai i ni’a ia tātou ?
I roto i tāna mau parau mātāmua i mua i te ta’ata ’ei peresideni nō te ’Ēkālesia, ’ua ha’api’i mai te peresideni Russell M. Nelson : « ’Ei peresidenira’a ’āpī, tē hina’aro nei mātou e ha’amata ma te hope’ara’a i roto i te feurira’a. Nō reira mātou e paraparau atu ai ia ’outou mai te hō’ē hiero atu. Te hope’a tā tātou tāta’itahi e tūtava nei, ’o te fāri’ira’a ïa i te mana i roto i te hō’ē fare o te Fatu, ma te tā’atihia ’ei ’utuāfare, ma te ha’apa’o maita’i i te mau fafaura’a i ravehia i roto i te hiero ’o te fa’aineine ia tātou nō te hōro’a rahi roa a’e a te Atua—’o te ora mure ’ore. Te mau ’ōro’a o te hiero ’e te mau fafaura’a tā ’outou i rave i reira ’e tāviri ïa nō te ha’apūai i tō ’outou orara’a, tō ’outou fa’aipoipora’a ’e te ’utuāfare, ’e tō ’outou ’aravihi ’ia pāto’i i te mau ’arora’a a te ’enemi. Tā ’outou ha’amorira’a i roto i te hiero ’e tā ’outou tāvinira’a i reira nō tō ’outou hui tupuna o te ha’amaita’i ia ’outou nā roto i te heheura’a rahi a’e nō ’outou iho ’e te hau, ’e e ha’apūai te reira i tā ’outou pūpūra’a ia ’outou nō te fa’aea i ni’a i te ’ē’a nō te fafaura’a ».3
Mai te mea ’e pe’e tātou i te reo o te Atua ’e tōna ’ē’a nō te fafaura’a, e ha’apūai ’oia ia tātou i roto i tō tātou mau tāmatara’a.
E mea fifi te tere o tō’u ’utuāfare i te hiero tau matahiti i ma’iri a’e nei. ’A ha’afatata ai ra mātou i te hiero nō Roto Miti, ’ua parau tō’u metua vahine tei ī i te ’oa’oa ’e te fa’aro’o : « E maita’i tātou; e pāruru mai te Fatu ia tātou ». ’Ua tā’atihia mātou, ’e ’ua ora te ma’i o tō’u tuahine. ’Ua tupu noa te reira ’ia oti te tāmatara’a o te fa’aro’o o tō’u nā metua ’e nā roto i te pe’era’a i te mau fa’aurura’a a te Fatu.
Tē fa’auru noa nei ā teie hi’ora’a o tō’u nā metua i tō mātou orara’a i teie mahana. ’Ua ha’api’i mai tō rāua hi’ora’a ia mātou i te tumu o te ha’api’ira’a tumu o te ’evanelia, ’e ’ua tauturu mai ia mātou ’ia māramarama i te aura’a, te ōpuara’a, ’e te mau ha’amaita’ira’a tā te ’evanelia e hōro’a mai. E nehenehe ato’a te māramaramara’a i te tumu o te ’evanelia a Iesu Mesia e tauturu mai ia tātou i te ’arora’a i tō tātou mau tāmatara’a ma te fa’aro’o.
I te hope’a ra, te mea ato’a tā te Atua e ani mai ’e ’e fa’aue mai ia tātou ’ia rave o te hō’ē ïa fa’a’itera’a nō tōna here ia tātou ’e tōna hina’aro ’ia hōro’a mai ia tātou te mau ha’amaita’ira’a ato’a i fa’ata’ahia nō tāna mau tamari’i ha’apa’o. ’Eiaha tātou e mana’o noa ē e ha’api’i mai tā tātou mau tamari’i ’ia here i te ’evanelia nā roto noa ia rātou iho ; e hōpoi’a te reira nā tātou e ha’api’i ia rātou. ’A tauturu ai tātou i tā tātou mau tamari’i ’ia ’apo mai nāhea e fa’a’ohipa i tō rātou ti’amāra’a ma te maita’i, e nehenehe tō tātou hi’ora’a e fa’auru ia rātou ’ia rave i tā rātou iho mau mā’itira’a tano. Muri iho e tauturu tō rātou orara’a itoito i tā rātou mau tamari’i ’ia ’ite i te parau mau nō te ’evanelia nō rātou iho.
E te feiā ’āpī tamāroa ’e te feiā ’āpī tamāhine, ’a fa’aro’o i te peropheta e paraparau nei ia ’outou i teie mahana. ’A ’imi i te ha’api’i mai i te mau parau mau hanahana ’e a ’imi ’ia māramarama i te ’evanelia nō ’outou iho. ’Ua a’o te peresideni Nelson ’aita i maoro a’e nei : « E aha te ’ite e ’erehia ra e ’outou ?… ’A pe’e i te hi’ora’a o te peropheta Iosepha Semita. ’A ’ite mai i te hō’e vāhi maniania ’ore… E fa’aha’eha’a ia ’outou iho i mua i te Atua. ’A nīni’i i tō ’outou ’ā’au i tō ’outou Metua i te Ao ra. ’A fāriu atu iāna ra nō te fāri’i i te mau pāhonora’a ».4 ’A ’imi ai ’outou i te arata’ira’a nō ō mai i tō ’outou Metua here i te ao ra, te fa’aro’ora’a i te mau a’o a te mau peropheta ora, ’e hi’ora’a i te hi’ora’a maita’i o te mau metua parau-ti’a, e nehenehe ato’a ’outou e riro mai e hō’e tā’amura’a pūai nō te fa’aro’o i roto i tō ’outou ’utuāfare.
Nō te mau metua e mau tamari’i tā rātou ’o tei fa’aru’e i te ’ē’a nō te fafaura’a, ’a fa’aho’i marū noa mai. Tauturu ia rātou ’ia hāro’aro’a i te parau mau o te ’evanelia. ’A ha’amata i teienei; ’aita roa atu i tāere roa.
E nehenehe tō tātou hi’ora’a nō te orara’a parau-ti’a e fa’atupu i te hō’ē ta’a-’ē-ra’a rahi. ’Ua parau te peresideni Nelson : « Tātou te feiā mo’a i te mau mahana hope’a nei, ’ua mātau tātou i te feruri i te ’ēkālesia’ ’ei ’ohipa e tupu i roto i tō tātou mau fare purera’a, turuhia e te mau mea e tupu nei i te ’utuāfare. Tītauhia te tahi tauira’a i teie hōho’a. ’Ua tae te taime nō te hō’ē Ēkālesia tei fa’atumuhia i ni’a i te ’utuāfare, turuhia e te mau mea e tupu i roto i tō tātou ’āma’a, pāroita ’e titi ».5
Tē ha’api’i nei te mau pāpa’ira’a mo’a, « e ha’api’i i te tamaiti i tāna ’ē‘a ’ia haere ra : ’e ’ia pa’ari ’oia ra, e ’ore e fa’aru’e i tāua ’ē‘a ra ».6
’Ua parau ato’a rātou, « e teie nei, nō te mea e mana rahi tō te a’ora’a i te parau a te Atua ’ia arata’i i te ta’ata ’ia rave i te ’ohipa ti’a; ’oia ïa, ’ua hau tō reira mana i ni’a i te ’ā’au o te ta’ata i tō te ’o’e, ’e tō te tahi mau mea ato’a tē tae ia rātou ra; nō reira i mana’o ai Alama ē, e mea maita’i ïa ’ia tāmata i te mana o te parau a te Atua ».7
Tē fa’ati’ahia ra te hō’ē ’ā’amu nō te hō’ē vahine tei ’ino’ino nō te ’amu rahi o tāna tamaiti i te monamona. E pau tāna parau e fa’aea, ’ua tāmau noa te tamaiti i te ’amu i te monamona. Nō tōna riri rahi, ’ua fa’aoti a’era ’oia e ’āfa’i i tāna tamaiti e hi’o i te hō’ē ta’ata pa’āri o tāna e fa’atura nei.
Ha’afātata atu ra te vahine iāna nā ’ō atu ra, « Miti, e mea ’amu rahi roa tā’u tamaiti i te monamona. E nehenehe ānei tā ’oe e parau iāna ’ia fa’aea i te ’amu i te reira ? »
’Ua fa’aro’o maita’i o Gandhi i terā vahine, fāriu a’e ra, ’e nā ’ō atu ra i tāna tamaiti, « ’A ho’i i te fare, ’e ’a ho’i mai i roto e piti hepetoma ».
’Ua rave iho ra ’oia i tāna tamaiti ’e ’ua ho’i i te fare, ma te uiui noa nō te aha ’aita ’oia i ani i te tamaiti ’ia fa’aea i te ’amu i te monamona.
E piti hepetoma i muri iho ’ua ho’i fa’ahou mai rāua. Hi’o ’āfaro atu ra te ta’ata pa’ari i ni’a i te tamaiti ’e nā ’ō atu ra, « teie tamaiti, ’ia fa’aea ’oe i te ’amu rahi i te monamona e ti’a ai. E ’ere i te mea maita’i nō tō ’oe ea ».
’Ua tā’iri’iri mai ra te tamaiti i tōna upo’o ’e ’ua fafau mai e nā reira ’oia.
’Ua ui te metua vahine o te tamaiti, « nō te aha ’aita ’oe i parau i te reira ’iāna a piti hepetoma i teie ?
’Ua ’ata mai ra te ta’āta pa’āri. « ’A piti hepetoma i teienei, tē ’amu noa ato’a ra vau i te tihota ».
’Ua ora noa nā teie ta’ata pa’ari i te hō’ē orara’a parau-ti’a ’ua ’ite ’ōna ē e’ita tāna mau a’o e manahia maoti rā ’ia pe’e ’ōna i tāna iho mau ao.
Tō tātou mana fa’auru i ni’a i tā tātou mau tamari’i, ’ua hau atu ïa i te pūai mai te mea e ’ite rātou ia tātou ’ia haere ma te itoito i ni’a i te ’ē’a nō te fafaura’a. E hi’ora’a te peropheta Iakoba, nō te Buka a Moromona, nō taua huru parau-ti’a ra. ’Ua pāpa’i tāna tamaiti o Enosa i te mana fa’auru o te mau ha’api’ira’a a tōna metua tāne :
« Inaha, ’ua ’ite au o Enosa i tō’u ra metua tāne, e ta’ata parau-ti’a ’oia ; ’e nāna ho’i i ha’api’i mai iā’u nei i tōna reo, ’e i te pa’ari ’e te a’o a te Atua ra—’Ia ha’amaita’ihia te i’oa o tō’u ra Atua i te reira…
« … ’Ua ha’amana’o māite au i roto i tā’u ’ā’au i te mau parau tā’u i fa’aro’o i te parau-pinepine-hia e tō’u ra metua nō te ora mure ’ore ’e te ’oa’oa hoʻi o te feiā mo’a ra ».8
’Ua ora te mau metua vahine o te mau fa’ehau ’āpī i te ’evanelia i te hō’ē fāito ’ua ī tā rātou mau tamari’i i te ti’aturira’a pāpū. ’Ua fa’a’ite tō rātou arata’i :
« ’Ua ha’api’ihia nā ho’i rātou e tō rātou mau metua vahine, ’ia ’ore rātou e fē’a’a, e fa’aora te Atua ia rātou.
« ’Ua fa’ati’ati’a mai ra rātou iā’u i te mau parau a tō rātou mau metua vahine, ’ua nā ’ō mai ra : ’Aita mātou i fē’a’a ē, ’ua ’ite tō mātou mau metua vahine i te reira ».9
’Ua ha’apūaihia o Enosa ’e te mau fa’ehau ’āpī e te fa’aro’o o tō rātou mau metua, o tei tauturu ia rātou ’ia fārerei i tō rātou iho tāmatara’a nō fa’aro’o.
’Ua ha’amaita’ihia tātou ’e te ’evanelia a Iesu Mesia tei fa’aho’i-fa’ahou-hia mai i tō tātou ’anotau, ’o te fa’ateitei ia tātou ’ia ’oto ana’e ’aore rā ’ia hepohepo ana’e tātou. ’Ua pāpū ia tātou ē, e hōro’a mai tā tātou mau tauto’ora’a itoito i te hotu i te taime tā te Fatu i fa’ata’a ’ia oti te tāmatara’a o tō tātou fa’aro’o
’Aita i maoro a’e nei, ’ua ’āpe’e atu māua tā’u vahine ’e te peresidenira’a o te Ārea, ia Elder David A. Bednar i te ha’amo’ara’a o te hiero nō Haiti, i Port-au-Prince. ’Ua haere mai tā māua tamaiti o Jorge nā muri iho ia māua, ’e ’ua parau mai nō ni’a i tōna ’itera’a : « E mea fa’ahiahia, e Papa ! I te taime iho ’a ha’amata ai o Elder Bednar i te pure ha’amo’ara’a, ’ua fāri’i au i te māhanahana ’e te māramarama ’o tei fa’a’ī i te piha. ’Ua rau te mau mea tā te pure i tu’u mai i roto i tā’u hi’ora’a i te ’ōpuara’a o te hō’ē hiero. E fare mau te reira nō te Fatu
I roto i te Buka a Moromona, tē ha’api’i mai nei Nephi ē ’ia hina’aro tātou e ’ite i te hina’aro o te Atua, e ha’apūai ’oia ia tātou. ’Ua pāpa’i ’oia, « e ta’ata ’āpī roa vau o Nephi… ’e e hina’aro rahi ho’i i te ’ite i te mau parau aro a te Atua ra, i pi’i hua atu ai au i te Fatu ra ; e inaha ’ua fā mai ra ’oia iā’u ra, ’e ’ua ha’amarū ho’i i tā’u ’ā’au; ’e ’ua fa’aro’o ihora vau i te mau parau ato’a i parauhia e tō’u ra metua; e nō reira, ’aore atu’ra vau i mārō i tō’u metua, mai tā tō’u ra nā tua’ana ».10
Te mau taea’e ’e te mau tuahine, ’a tauturu i tā tātou mau tamari’i ’e te feiā ato’a e fa’a’ati ra ia tātou ’ia pe’e i te ’ē’a nō te fafaura’a a te Atua ’ia nehenehe te Vārua ’ia ha’api’i ia rātou ’e ’ia tāmarū i tō rātou ’ā’au nō te hina’arora’a ’ia pe’e ’iāna i te roara’a o tō rātou orara’a.
’A feruri fa’ahou ai au i te hi’ora’a o tō’u mau metua, tē ’ite nei au ē e fa’a’ite mai tō tātou fa’aro’o i te Fatu ia Iesu Mesia i te ’ē’a nō te fa’aho’i ia tātou i tō tātou ’utuāfare i te ao ra. ’Ua ’ite au e tae mai te mau temeio ’ia oti te tāmatara’a o tō tātou fa’aro’o.
Tē fa’a’ite pāpū nei au nō ni’a ia Iesu Mesia ’e tāna tusia tāra’ehara. ’Ua ’ite au ē, o ’oia tō tātou Ora ’e tō tātou Fa’aora. ’Ua haere mai ’oia ’e tō tātou Metua i te ao ra i taua po’ipo’i ra nō te pu’e tau fa’atupura’a rā’au o te matahiti 1820, i te tamaiti ’āpī ra o Iosepha Semita, te peropheta nō te Fa’aho‘i-fa’ahou-ra’a mai. ’O te peresideni Russell M. Nelson te peropheta nō tō tātou ’anotau. I te i’oa o Iesu Mesia, ’āmene.