Founga Ke Ikunaʻi ʻa e Sāpaté Kapau Ko e Tokotaha Mā Koe

Fai ʻe Aspen Stander

Ko e ongoongoleleí maʻá e tokotaha kotoa, pea ʻe malava ke fakatahatahaʻi kitautolu ʻe hotau ngaahi lelei fakafoʻituituí.

Naʻá ku manavasiʻi ʻi he ʻalu ki he lotú ʻi heʻeku kei taʻu hongofulu tupú.

Naʻá ku tui ʻoku moʻoni ʻa e ongoongoleleí, pea naʻá ku ʻiloʻi ne ʻaonga kiate au ʻa e maʻulotú ke hokohoko atu ʻeku tupulaki fakalaumālié. Ka naʻá ku faʻa ongoʻi taʻefeʻunga.

ʻI heʻeku fakakaukaú, ne u pehē he ʻikai te u lava ʻo feau e ngaahi ʻamanaki ʻa e tokotaha kotoa fekauʻaki mo e tuʻunga ʻoku totonu ke ʻi ai ʻa e mēmipa lelei ʻo e Siasí (pe ko ʻeku fakakaukau ko e ʻamanaki ia ʻa e tokotaha kotoa pē). Ko e tokotaha kotoa pē ne nau hā ngali fiefia, fakamaheningofua, pōtoʻi lea mo loto-vekeveke maʻu pē ke fakamoʻoni pe fai ha lotu. Ka ko au? Naʻá ku fakalongolongo mo ongoʻi hohaʻa ʻi he ngaahi tūkunga fakasōsialé. Naʻe ʻikai te u ongoʻi ʻoku ʻi ai haʻaku maama ke fakaulo atu ko ha mēmipa ʻo e Siasí.

Ko hono moʻoní, ʻoku tokolahi ha kāingalotu ʻo e Siasí ʻoku nau fakamaheningofua mo vēkeveke. Pea neongo ko e meʻa lelei ia, ka naʻe fuoloa ʻeku ongoʻi ʻoku ʻikai fenāpasi ʻeku tōʻonga maá mo e fakalongolongó mo e “feituʻu” ko ʻení. Ka ʻoku ou ʻiloʻi he taimí ni naʻe ʻikai ko e moʻoní ʻeni.

Ko Hono ʻIloʻi Te u Malava ʻo Tupulakí

Lolotonga ʻeku ʻi he ʻunivēsití, naʻá ku hiki ki ha fale nofo totongi foʻou, pea naʻe fakafeʻiloaki au ʻe hoku kaungā-lokí ki hono ngaahi kaungāmeʻa ʻi he uōtí. Naʻá ku ongoʻi ʻi he taimi pē ko iá ʻoku talitali lelei au koeʻuhí ko e ʻofa mo e talitali ne nau fakahaaʻi mai kiate aú. Naʻá ku ongoʻi naʻa nau fie maʻu moʻoni ke nau maheni mo au. Ne u ʻohovale ʻi heʻeku ongoʻi ʻa e mole atu ha konga lahi ʻo ʻeku hohaʻa fakasōsialé.

Naʻá ku fakatokangaʻi naʻe ʻikai maʻu ʻa e ongo ko ʻení mei he liliu ʻo e feituʻú ka ko e liliu ʻo e fakakaukaú. Naʻá ku ako ʻo ʻilo ʻoku ʻikai fie maʻu ia ke u fakamaheningofua ke u hoko ko ha ākonga ʻo Sīsū Kalaisi. ʻOku ʻi ai ʻa e ivi mālohi ʻi he fakalongolongó. ʻOku ʻi ai ʻa e ivi mālohi ʻi he fakafanongó mo e fakalaulaulotó. ʻI hono fakatokangaʻi ʻeku ngaahi mālohinga ko ha tokotaha maá pea mo hono mata-tali ʻeku ngaahi vaivai fekauʻaki mo e hohaʻa ki he tuʻunga fakasōsialé, naʻá ku maʻu ai ha founga ke u ikunaʻi ai ia—pea tupulaki foki ʻi he ongoongoleleí.

ʻOku Tau Maʻu Kotoa Pē ha Ngaahi Mālohinga mo e Ngaahi Vaivai

ʻOku ʻi ai ʻa e ʻuhinga ʻoku ʻomai ai ʻe he ʻOtuá ha ngaahi ʻulungaanga, mālohinga, mo e vaivai kehekehe kiate kitautolú. Mahalo naʻa faingofua ange ki ha tokotaha ʻoku fakamaheningofua ke ne kau ki he kalasí mo fakatupu ha ongoʻi uouongataha ʻi ha uooti. Pea ko kinautolu ʻoku nau anga fakalongolongó ʻoku nau fai ʻa e ngaahi fakamoʻoni mālohi ʻo fakafou ʻi heʻenau tōʻonga mo e tukupā kia Sīsū Kalaisí. ʻE lava foki ke nau ʻaonga ʻi hono tokoniʻi ʻa e niʻihi kehe ʻoku anga fakalongolongó.

Kapau ko ha tokotaha moʻui mā koe, ʻiloʻi ʻoku ʻi ai ha feituʻu mahuʻinga maʻau ʻi he Siasí. ʻOku hoʻata mei he kakai ʻoku moʻui maá mo kinautolu ʻoku fakamaheningofuá ʻa e ngaahi lelei ʻo e Fakamoʻuí ʻe lava ke tau fakaʻaongaʻi ke fefakamaamaʻaki ʻi he ongoongoleleí.

ʻOku ʻIkai Fekauʻaki mo Koe

Naʻá ku fehuʻi loto pē pe ko e hā naʻá ku ʻalu ai ki he lotú ʻi he fuofua taimí. Naʻá ku ʻalu ke maʻu ʻa e sakalamēnití, ke ako lahi ange fekauʻaki mo Sīsū Kalaisi, pea mo moʻui taau ki he temipalé. Ka ʻoku toe talamai foki ʻe he folofolá “ʻoku fie maʻu foki ʻe he sino [ʻo e Siasí] ʻa e kupu kotoa pē, koeʻuhí ke fakamāmaʻi kotoa pē” (Tokāteline mo e Ngaahi Fuakava 84:110; vakai foki ʻEfesō 4:12).

Lolotonga hono lehilehiʻi ʻe he ngaahi fakatahaʻanga lotú ʻetau ngaahi fakamoʻoní, naʻá ku ʻiloʻi ko e siasí ʻoku ʻikai fekauʻaki pē ia mo au. ʻOku tau manatua fakataautaha ʻa e Fakamoʻuí ʻi heʻetau maʻu ʻa e sakalamēnití, ka ʻoku fakamaamaʻi fakataha kitautolu ʻi heʻetau vahevahe ʻa e ouaú ni ko ha haʻofangá.

Naʻá ku fuʻu hohaʻa ki he fakakaukau mai ʻa e niʻihi kehé kiate aú kae ʻikai ke u tokanga ki he tefitoʻi moʻoni ʻoku totonu ke ne tataki kitautolu ʻi heʻetau fakakaukaú mo e tōʻongá: ko e ʻofá. Naʻe tohi ʻe he palōfita ko Molomoná ʻo pehē, “ʻoku ʻikai te u manavahē ki ha meʻa ʻe fai ʻe he tangatá; he ʻoku hanga ʻe he ʻofa haohaoá ʻo tekeʻi ki tuʻa ʻa e ilifia kotoa pē” (Molonai 8:16).

ʻOku maʻu ʻa e “ʻofa haohaoá” mei he ʻOtuá. Kapau te tau tukuange kitautolu ke tau ongoʻi ʻa e ʻofa ko iá, ʻe siʻi ʻetau ongoʻi manavasiʻi ki heʻetau ngaahi tōnounou fekauʻaki mo e fakakaukau mai ʻa e niʻihi kehé kiate kitautolú pea ʻe siʻi mo ʻetau hohaʻa ki heʻetau ngaahi palopalemá ka tau vivili ke fakahaaʻi ʻa e angaʻofa ki he niʻihi kehe ʻoku nau ongoʻi ʻoku ʻikai ke nau kau maí.

Fakahoko Taha Taha

ʻOku ʻuhinga ʻa hotau fatongia ke feʻofaʻakí pea mo vahevahe ʻa e ongoongoleleí ke tau faʻu ha ngaahi vā fetuʻutaki ʻoku leleí pea mo e niʻihi kehé.

ʻE lava ke tau fakaʻehiʻehi mei he ongoʻi lōmekiná ʻaki haʻatau tokanga taha pē ki he ngaahi feohi ʻoku mahuʻingamālié mo ha toko taha pe toko ua ʻi he taimi pē ʻe taha. Neongo naʻe akonaki mo faifakamoʻui pea mo tokoniʻi ʻe Sisū Kalaisi ha toko laui afe ʻi Heʻene ngāue fakafaifekau ʻi he māmaní, ka naʻá Ne muimui ʻi ha sīpinga ʻo e ngāue fakaetauhi taha taha pē ki he kakaí (vakai 3 Nīfai 11:15; 17:21).

Naʻá ku fakatokangaʻi ʻoku ʻikai fie maʻu ia ke u kaungāmeʻa lelei mo e taha kotoa pē pe te u hoko ko e tokotaha manakoa taha ʻi he uōtí. Ko e meʻa mahuʻinga tahá ʻoku ʻikai ko e lahi ʻo ʻeku feohi fakasōsialé ka ko e tuʻunga lelei ʻo ʻeku tauhi ʻo e ngaahi vaá. ʻOku nofotaha pē ʻeku tokangá ʻi hoku vā mo e toko taha ʻi he uike takitaha ʻi he lotú, kae ʻikai ko ʻeku hohaʻa ki he tokotaha kotoa pē ʻi he taimi pē ʻe taha.

ʻOku kei faingataʻa pē ʻa e lotú ʻi he taimi ʻe niʻihi, ka ʻi heʻeku ʻunu māmālie ki ha meʻa ʻoku ʻikai te u anga ki aí mo ikunaʻi ʻeku hohaʻa fakasōsialé, kuó u ongoʻi ai ʻa e ʻofa ʻa e Fakamoʻuí kiate aú mo e kotoa ʻo ʻEne fānaú. ʻOku kamata ke u ʻilo hoku tuʻungá. ʻOku ou ʻiloʻi kuó u maʻu ʻa e ʻaloʻofá tuʻunga ʻi he Fakalelei ʻa Sīsū Kalaisi ke u ngāue ke ikunaʻi hoku ngaahi vaivaí pea fakaʻaongaʻi hoku ngaahi mālohingá ke langa hake ʻa e puleʻanga ʻo e ʻOtuá.