Mohukú mo e Ngaahi Tāpuaki Lakanga Fakataulaʻeikí
Fai ʻe ʻEletā Jack N. Gerard
ʻO e Kau Fitungofulú
Mei ha ‘initaviu mo Eliza Broadbent
“Ko e Fakafiemālié … ʻa e Laumālie Māʻoniʻoní” (Sione 14:26).
ʻI heʻeku kei siʻí, naʻe ʻi ai ha faama ʻo hoku fāmilí mo ha fanga pulu mo ha kelekele ngoueʻanga. Ko ha ngāue lahi e tupu hake ʻi ha fāmá.
ʻI ha ʻaho ʻafu ʻe taha ʻi he faʻahitaʻu māfaná, naʻá ku ngāue mo hoku tokouá ʻi he ngoueʻangá. Naʻe angi mālohi mai e havilí, pea naʻe efua lahi e ʻeá. ʻOku kovi ʻaupito ha meʻa ʻe niʻihi kiate au, pea ʻoku ou puke ʻi he efu mei he mohukú he taimi ʻe niʻihi. Ne kamata ke hafu hoku loʻimatá. Naʻe faingataʻa ke u mānava. Naʻe kamata ke toto hoku ihú koeʻuhí kuo lahi ʻeku mili iá.
ʻI he hū mai ʻeku fineʻeikí ki he ngoueʻangá ʻo sio mai kiate aú, naʻá ne talamai ke u hū ange ki fale. Naʻá ne fakatokoto au ʻi ha sea mo ha konga tupenu viviku ʻi hoku matá. Hili ha ngaahi miniti siʻi, naʻá ne foki mai mo ha ongo tangata faama. Naʻá na tui ʻovalolo peá na efua mei he efu mohukú.
Ko e ongo tangata fāmá ko ha ongo mēmipa ia ʻo homau uōtí. Naʻá na hilifaki hona nimá ki hoku ʻulú pea kamata ke na tāpuakiʻi au. Naʻe teʻeki ai ke kau mai ʻeku tangataʻeikí ki he Siasí he taimi ko iá, pea naʻe ʻikai ai ke ne maʻu e lakanga fakataulaʻeikí. Ka he ʻikai toe ngalo e ongo naʻá ku maʻu ʻi hono tāpuakiʻi au ʻe he ongo tangata lelei ko iá. Naʻe fakamāfana, nonga, peá te ongoʻi fiemālie. Pea ʻikai ke u toe fuʻu ongoʻi puke.
Kimui ange ʻi he moʻuí, ne u toki ʻiloʻi ko e ongo ko iá ko e Laumālie Māʻoniʻoní ia. ʻOku faʻa ui e Laumālie Māʻoniʻoní he taimi ʻe niʻihi ko e Fakafiemālié. ʻOku ou saiʻia he hingoa ko iá he ko e Laumālie Māʻoniʻoní naʻá ne fakafiemālieʻi aú. Naʻá ne ngaohi ke u ongoʻi lelei ange ʻi loto pea ʻi tuʻa.
Ko ha tāpuaki māʻongoʻonga ʻa e Laumālie Māʻoniʻoní. Fekumi ki he fakafiemālie ʻoku ʻomi ʻe he Laumālie Māʻoniʻoní pea feinga ke maʻu ia he ʻaho kotoa.
Fakafiemālie mei he Laumālie Māʻoniʻoní
ʻOku ʻi ai ha ngaahi founga lahi te ke lava ai ʻo ongoʻi fiemālie mei he Laumālie Māʻoniʻoní. ʻOku fakahaaʻi atu ʻe he hala fihifihi ko ʻení ha niʻihi. Te ke lava nai ʻo kumi e halá ʻi he hala fihifihí?
KAMATA
ʻOSI
Ngaahi tā fakatātā ʻa Greg Newbold