ʻOku Totonu Nai Ke Ta Tali e Uiuiʻí?
Tā fakatātā mei he Getty Images
ʻI heʻema hoko ko ha ongomātuʻa ki ha pēpē foʻou mo ha kiʻi leka kei siʻí, naʻe faingataʻa ke fakakakato homa ngaahi fatongia faka-Siasí. Ko ia, ʻi hono uiuiʻi hoku husepānití ke hoko ko e pīsope ʻo ha uooti tamaiki ako kakai lalahi kei talavoú, naʻá ma fakatou ongoʻi momou.
Naʻe lahi ha ngaahi fehuʻi ne ma fakakaukau ki ai ʻo kau ki heʻema malava ke tokangaʻi e meʻa kotoa pē fakataha mo e fatongia naʻe tānaki maí. Ne ma ʻiloʻi hili ha ngaahi ʻaho siʻi mei hono maʻu e uiuiʻí kuó u feitama ʻi heʻema pēpē hono tolú. Koeʻuhí ko hoku hisitōlia fakafaitoʻó, naʻe faingataʻa ʻeku ongo feitama ki muʻá. ʻI heʻema aleaʻi e meʻa te ma ʻamanaki atu ki ai he ngaahi māhina siʻi ka hokó ʻo ka tali ʻe hoku husepānití e uiuiʻí, naʻe ʻikai ke ma fakapapauʻi e meʻa ke faí. Naʻe kamata ke ma lotu fakamaatoato ke maʻu ha fakafiemālie mo ha fakahinohino.
ʻI ha taimi ʻe taha, naʻe fifili hoku husepānití pe ʻoku totonu nai ke ne fakamatala homau tūkungá ki he palesiteni siteikí pea ʻoua ʻe tali e uiuiʻí. Ko e meʻa eni naʻe fakapotopoto taha kiate kimauá, ka ʻi heʻema lotu mo ʻaukaí, naʻe fakamanatu mai kiate kimaua e ngaahi lea ʻa Palesiteni Tōmasi S. Monisoni (1927–2018): “ʻI he taimi ʻoku tau fai ai e ngāue ʻa e ʻEikí, ʻoku ʻi ai ʻetau totonu ki he tokoni ʻa e ʻEikí” (“Duty Calls,” Ensign, May 1996, 44).
Naʻe fakafiemālieʻi homa lotó pea toʻo atu ʻema hohaʻá. Naʻá ma maʻu e fakapapau naʻe ʻikai haʻu e uiuiʻi ko ʻení mei he palesiteni siteikí. Naʻe haʻu ia mei he ʻEikí, pea naʻá Ne ʻafioʻi kimuʻa peá ma ʻiloʻí, naʻá ku feitama ʻi hono ʻomi e uiuiʻí. Te Ne lava ʻo fakahoko ha meʻa lahi ange ki homau fāmilí ʻi he meʻa ʻe lava ʻe hoku husepānití ʻiate ia pē kapau he ʻikai ke ne tali e uiuiʻi ko ʻení.
Naʻá ku tali mo hoku husepānití e uiuiʻí, mo e tui ʻi homa lotó, peá ma fakahoko pē e meʻa ʻe lava he ʻaho takitaha. Naʻe hoko ʻeku feitama hono tolú ko ha mana lahi pea naʻe fāʻeleʻi homa fohá ʻoku moʻui lelei mo mālohi. Ne tokoni e ngaahi taʻu ne u lotu ai ʻi homau uōtí mo ʻema fānaú ke mau vāofi ange ai ʻo ʻikai ngata pē ko ha fāmili ka ko ha kau mēmipa foki ʻo e uōtí. Lolotonga e ngāue faivelenga hoku husepānití ʻi hono uiuiʻí, ne u ako ke falala ki hoku fāmili fakauōtí ke tokoniʻi au mo ʻeku fānaú.
ʻOku ou houngaʻia mo hoku husepānití ʻi ha Kāingalotu faivelenga tokolahi, kae mahuʻinga tahá, ko ʻetau Tamai Hēvaní ʻi hono tokoniʻi kimaua lolotonga ʻema feinga ke potupotu tatau e ngāué, fāmilí, mo e fua fatongia ʻi he Siasí.