Konifelenisi Lahi ʻo ʻOkatopa 2019

ʻOku haʻu kotoa e ʻū fika ʻo e pēsí mei he Liahona ʻo Nōvema 2019.

Ko e faleʻi meia Palesiteni Nalesoni

Lolotonga e konifelenisi lahí, naʻe fai ʻe Palesiteni Lāsolo M. Nalesoni ʻa e faleʻi mahuʻinga ki he Kau Māʻoniʻoni ʻi he Ngaahi ʻAho Kimui Ní.

Naʻá ne poupouʻi ʻa e toʻu tupú ke nau:

“Taau ke maʻu e ngaahi lekomeni temipale fakangatangatá” (“Lea Tukú,” 121).
Manatuʻi ʻene fakaafe ke “kau ʻi he kongakau ʻo e toʻu tupu ʻa e ʻEikí” ki hono tānaki ʻo ʻIsilelí (“Kau Fakamoʻoní, Ngaahi Kōlomu ʻo e Lakanga Taulaʻeiki Faka-ʻĒloné, mo e Ngaahi Kalasi ʻa e Kau Finemuí,” 39).

Naʻá ne faleʻi e kau fafiné ke nau:

“Fekumi ke mahino ʻa e meʻa ʻoku finangalo e ʻEikí ke ke ʻilo mo fakahokó,” pea ke “ako ʻi he faʻa lotu ʻa e vahe 25 ʻo e Tokāteline mo e Ngaahi Fuakavá pea ʻiloʻi ʻa e meʻa ʻe akoʻi kiate koe ʻe he Laumālie Māʻoniʻoní.”
“Liliu e meʻa ʻoku mou tokanga taha ki aí mei he ngaahi meʻa fakamāmani ʻokú ne tohoakiʻi hoʻomou tokangá,” pea “kamata pea hokohoko atu ʻi he founga ko ʻeni ʻo e fakatāpui hoʻomou moʻuí ki he ʻEikí.”
Akoʻi e tokāteline ʻo Sīsū Kalaisí, pea ʻomi hoʻomou “tokoní ʻi he ngaahi alēleaʻanga fakafāmilí, fakauōtí, mo e siteikí.”
Ngāue tokoni, lotu, ʻaukai, ako e folofolá, ngāue ʻi he temipalé, pea fai mo e ngāue hisitōlia fakafāmilí, ʻe hoko kotoa ia ke ne “fakaava e langí kiate kimoutolu.”
“Ako ʻi he faʻa lotu ʻa e ngaahi moʻoni kotoa te ke lava ʻo maʻu fekauʻaki mo e mālohi ʻo e lakanga fakataulaʻeikí,” ʻo kamata ʻi he Tokāteline mo e Ngaahi Fuakava vahe 84 mo e 107. (Vakai ki he, “Ngaahi Koloa Fakalaumālie,” 77, 79.)

Naʻá ne poupouʻi ʻa e kāingalotu kotoa pē ʻo e Siasí ke nau teuteu ki he konifelenisi lahi ʻi ʻEpeleli 2020 ʻaki ʻenau:

Lau ʻa e fakamatala ʻa Siosefa Sāmita ki he ʻUluaki Mata Meʻa-Hā-Maí.
Fakalaulauloto ki he founga kuo hanga ai e Tohi ʻa Molomoná mo e ngaahi meʻa kuo hoko talu mei he ʻUluaki Mata Meʻa-Hā-Maí ʻo liliu kitautolu mo hotau ngaahi ʻofaʻangá.
Fakakau ʻa e ngaahi vitiō foʻou ʻo e Tohi ʻa Molomoná ko ha konga ʻo ʻetau ako fakatāutahá mo e fakafāmilí.
Fili haʻatau ngaahi fehuʻi pē ʻatautolu, faʻu haʻatau ngaahi palani pē ʻatautolu, pea fakafemoʻuekinaʻi kitautolu “ʻi he maama nāunauʻia ʻo e Fakafoki Mai ʻo e Ongoongoleleí.” (Vakai ki he, “Lea Tukú,” 122.)

Ko e founga ke …

Vahevahe ʻa e Ongoongoleleí

ʻI hono vahevahe ʻo e ongoongoleleí, ne ʻeke ʻe Sisitā Kilisitina B. Falanikō e ngaahi fehuʻi ko ʻení peá ne tala ki he kāingalotu ʻo e Siasí, “Ko e tali ki he ngaahi fehuʻi kotoa ko ʻení ko e ʻio! Te tau lava ʻo fai ia!”

“Te tau lava nai ʻo fakaafeʻi ha kaungāmeʻa ʻoku ʻikai kau ki hotau siasí ke tau ō ki he lotú he Sāpaté?”
“Te tau lava ʻapē ʻo vahevahe ha tatau ʻo e Tohi ʻa Molomoná mo ha kāinga pe kaungāmeʻa?”
“Te tau lava nai ʻo tokoniʻi e niʻihi kehé ke nau kumi ʻenau ngaahi kuí ʻi he FamilySearch pe vahevahe mo e niʻihi kehé ʻa e meʻa kuo tau ako lolotonga e uiké ʻi heʻetau ako ʻa e Haʻu, ʻo Muimui ʻIate Aú?”
“Te tau lava nai ʻo hoko ʻo hangē ange ko hotau Fakamoʻui ko Sīsū Kalaisí pea vahevahe mo e niʻihi kehé ʻa e meʻa ʻokú ne ʻomi ʻa e fiefiá ki heʻetau moʻuí?”

Sisitā Cristina B. Franco, Tokoni Ua ʻi he Kau Palesitenisī Lahi ʻo e Palaimelí, “Ko e Fiefia ʻi Hono Vahevahe ʻo e Ongoongoleleí,” 85.

Uku Loloto Angé

ʻAʻeva ʻi he Hala ʻo e Fuakavá

Ke tauhi ʻa e ongo fekau lalahi ʻe uá, ne pehē ʻe Palesiteni Tāleni H. ʻOakesi, “ʻoku tau feinga ai ke potupotutatau ʻa e fonó mo e ʻofá—ʻa hono tauhi e ngaahi fekaú mo ʻaʻeva ʻi he hala ʻo e fuakavá, pea kei ʻofa ʻi hotau ngaahi kaungāʻapí ʻi heʻetau fonongá. ʻOku fie maʻu ʻi he ʻaʻevá ni ke tau fekumi ki he ueʻi fakalangí” (“Fekau Lalahi ʻe Uá,” 75). Mamataʻi pe lau ʻene leá mo e ngaahi lea ʻa e kau lea ko ʻení ke maʻu ha mālohi ke fononga ʻi he hala ʻo e fuakavá:

Ne pehē ʻe ʻEletā Terence M. Vinson, “Ko e meʻa ʻoku tau fie maʻú ke fakasiʻisiʻi ʻa e Wi-Fí kae lahilahi kia Nīfai!” (“Kau Ākonga Moʻoni ʻa e Fakamoʻuí,” 9).
Ne poupouʻi mai ʻe Misa Stephen W. Owen ke tau fekumi ki he “meʻatokoni fakalaumālié” ʻaki ʻetau mavahe mei he māmaní ka tau fetuʻutaki mo e langí (“Tui Mateaki, Kae ʻOua ʻe Fakataʻetaʻetui,” 12).
Naʻe lea ʻa Sisitā Michelle Craig kau ki he “founga ʻe fā ke fakatupulaki ai ho ivi fakalaumālie ke maʻu fakahaá” (“Ivi Fakalaumālié,” 19).
Ne pehē ʻe ʻEletā Gary E. Stevenson, “Kuo pau ke tau hokohoko atu ʻo faivelenga pea tōtōivi, he ko e founga pē ia ke ʻiloʻi ai e moʻoní, pea fanongo ki he leʻo ʻo e ʻEikí ʻo fakafou ʻi Heʻene kau tamaioʻeikí” (“ ʻOua Naʻá ke Kākaaʻi Au,” 96).
Naʻe pehē ʻe Palesiteni M. Russell Ballard, “Ko e taha ʻo e ngaahi meʻa mahuʻinga taha te tau lava ke ako ʻi he moʻui ní ko e founga ke fakamamafaʻi ai hotau natula fakalaumālie taʻengatá pea mapuleʻi ʻetau ngaahi holi koví” (“Ko Hono Tuku ki Hotau Laumālié ke Ne Puleʻi Hotau Sinó,” 109).
Ne akoʻi mai ʻe ʻEletā Peter M. Johnson ʻa e founga te tau lava ai ke ikunaʻi ʻa e meʻangāue ʻe tolu ʻa e filí: fakakākaá, fakahohaʻasí, mo e fakalotosiʻí (“Mālohi ke Ikunaʻi ʻa e Filí,” 110–12).