Ko Hono Fevahevaheʻaki ʻo ʻEmau Fefaʻuhi Ke Ongoʻi ʻOku Mau Kau Atú

Kuó ke lue atu nai ki ha loki peá ke ongoʻi ʻoku sio taha mai e taha kotoa kiate koe? Pe toe kovi angé—haʻo ongoʻi ʻoku ʻikai fakatokangaʻi koe ia ʻe ha taha? Kuó u ongoʻi pehē. ʻE lava ke fakatupu lotomamahi e ngaahi tūkunga peheé he ʻoku tau fie maʻu kotoa pē ke tau ongoʻi ʻoku tau kau atu.

ʻOku fakatahatahaʻi kitautolu ʻe he ongoongolelei ʻa Sīsū Kalaisí. Ka ʻe lava ʻe he kehekehe ʻo hotau tūkungá ʻo ʻai ke faingataʻa ʻetau ongoʻi ʻoku tau kau atú. ʻI he lotolotonga ʻo e niʻihi fakafoʻituitui tokolahi ʻoku kau ki he Siasí, ʻoku ʻi ai ai ha kau papi ului foʻou mahalo ʻoku nau faifeinga ke ʻilo honau halá. ʻOku ou vahevahe ʻi he peesi 44 ʻa e founga naʻe liliu ai e anga ʻeku fakakaukau ki he kau atú mo hono fakahoko e ngaahi meʻa ʻoku finangalo ki ai e ʻEikí ʻiate kitautolú.

ʻOku ʻi ai foki ha niʻihi tokolahi hangē ko Soti mo hono husepānití, ʻoku nau fefaʻuhi mo e ʻikai ha fānaú pe ngaahi faingataʻa kehe ʻo lava ai ke nau ongoʻi ʻoku ʻikai ke tali kinautolu ʻe he niʻihi kehé. Lau hono talanoá ʻi he peesi 46.

ʻI he ngaahi fakamatala fakaʻilekitulōnika peé, ʻoku vahevahe ʻe Lāsale ʻa e faikehekehe ʻi hono talitali ia ʻe he kāingalotú, ʻi heʻene foki mai ki he siasí. ʻOku akoʻi ʻe ʻĒliki ʻoku fie maʻu kotoa kitautolu ʻi he sino ʻo Kalaisí, pea ʻoku vahevahe ʻe ʻAsipeni e founga ke te kau atu ai mo tupulaki ʻi he siasí ʻi heʻete hoko ko ha taha anga fakalongolongó.

ʻOku tokolahi fau ha kakai ʻi he Siasí ʻoku ʻikai ke nau ongoʻi ʻoku nau kau atu. Mahalo ko ha taha koe ʻo kinautolu. Ka te tau lava kotoa ʻo tokoni ke ongoʻi ʻe he mēmipa kotoa ʻoku talitali lelei kinautolu. He ʻoku ʻikai makatuʻunga e kau atú ʻi hotau tūkungá—ka ʻokú ne tala ho tuʻunga totonú pea ko hai ʻokú ke faifeinga ke tatau mo iá. ʻI heʻetau hoko ko e fānau ʻa e ʻOtuá, ʻoku tau kau kotoa atu ki he Siasi ʻo Kalaisí.

Fakaʻapaʻapa atu,

Palaieni S. Kingi

Faleʻi …

Mei he kakai lalahi kei talavoú ki he kau atú

“ʻOku SAI pē ke te ongoʻi ʻoku ʻikai ke te kau atu, ka ke manatuʻi ʻoku tau makehe kotoa pea ko e meʻa ia ʻoku totonu ke tali ai kitautolú.”

—ʻEsitefani Sōfia Kōlea ʻIunasi, ʻAlapeta, Kānata

“Kuo pau ke ke ‘i ai he ngaahi ʻuhinga totonu. Kapau ʻokú ke ʻi aí ke muimui ʻia Kalaisi, ta ʻoku ʻikai ha toe meʻa ia ʻe mahuʻinga ange ai.”

—Paula Saeni, Puenosi ʻAealesi, ʻĀsenitina

“Koeʻuhí ko ʻeku tupu hake mo ha ongo tokoua ne na fuʻu matuʻaki makehe ʻaupito (ʻokú na noa pea faingataʻaʻia fakaeʻatamai), ʻoku mahino ai kiate au ʻa kinautolu ʻoku fuʻu makehé mo fakakaungāmeʻa kiate kinautolu ʻe malava ke ʻikai fakatokangaʻí. ʻE lava ʻe he tokotaha kotoa ʻo ako ha meʻa mei ha taha kehe, ʻo tatau ai pē pe ko e hā e tuʻunga ʻo e moʻuí ʻokú ke ʻi aí. ʻOku ʻi ai ha meʻa ke ke tokoni ai, pea ʻoku ʻofa ʻa e ʻOtuá ʻiate koe ʻo hangē ko ʻEne ʻofa he taha kotoa pē, ʻa ia ko ha meʻa lahi ia.”

—Sitefinī E. Seniseni, Uasingatoni, USA

“ʻI heʻeku hoko ko ha papi ului ki he Siasí kuó u houngaʻia ai he fanga kiʻi meʻa iiki ʻoku ʻikai mahuʻinga ki ha niʻihi fekauʻaki mo e ngaahi kaungāmeʻá.” Kuó u hoko ai ko e kaungāmeʻa ki ha fiefanongo ke fakaafeʻi, poupouʻi, mo fiefia ʻi he feohi mo ha taha foʻoú. Mahalo ko koe ʻa e poupou naʻa nau fie maʻú. Kiate aú, kuo nau tokoniʻi au ke u kei fili ai pē e hala ʻoku totonú.

“Ko ia ai, hoko ko e kaungāmeʻa ko iá. ʻOku ʻikai ke ke ʻiloʻi, mahalo ko kinautolu ʻa e kaungāmeʻa naʻá ke fie maʻú.”

—Hikailoa Mohi, Uaikato, Nuʻu Sila

Mei he kau taki ʻo e Siasí

“ʻOku ʻikai ke u tui kuó u fetaulaki mo ha taha te ne taʻe fie ongoʻi ʻoku kau atu ki ha meʻa ʻoku ongoʻi leleiʻia ai, ʻa ia ʻokú ne ngaohi ia ke ne ongoʻi ʻoku ʻi ai hono mahuʻinga.

“ʻI he taimi ʻoku fifili ai e kakaí ʻo pehē, ‘ʻOku ʻi ai nai ha feituʻu maʻaku?’ ʻe lava pē ke ʻi ai ha ngaahi ʻuhinga kehekehe ki ai. Pea nau fehuʻi ʻeni kiate kinautolu, ‘ʻOku ou feʻunga nai? ʻOku ou feʻunga nai ke u ʻi heni? ʻOku nau fuʻu fie maʻu koā au?’ Pea ʻoku ou fie talaatu moʻoni, ʻʻIo.’

“ʻOku ou fakakaukau ki he fakafehoanaki ʻa Paula fekauʻaki mo e Siasí ko e sino ʻo Kalaisí, ʻa ia ʻoku ou saiʻia ʻaupito aí. Peá ne pehē ʻoku papitaiso kitautolu ki he sino ko iá, pea ʻokú ne pehē ko e sino pē ʻe taha. Ko e ngaahi kupu kehekehe, ka ko e sino pē ʻe taha. …

“ʻI he taimi ʻoku ongoʻi tuenoa ai ha taha, ʻoku ʻikai ke u fakaʻikaiʻi e moʻoni ʻo e ongo ko iá mo e ʻuhinga ʻoku fakanatula ai ke ongoʻi peheé. Ka ko kitautolu takitaha, ʻoku tau ongoʻi pehē ʻi ha faʻahinga taimi pē, ʻoku fie maʻu ke tau kiʻi tuʻu pea fakakaukau, ‘Naʻe pekia ʻa Sīsū Kalaisi maʻaku. Naʻe ʻafioʻi ʻe Sīsū Kalaisi ʻoku ou taau mo Hono taʻataʻá. Pea ʻokú Ne ʻofa ʻiate au, ʻokú Ne ʻamanaki lelei mai kiate au, pea te Ne lava ʻo fakahoko ha faikehekehe ʻi heʻeku moʻuí. ʻE lava ke liliu au ʻe Heʻene ʻaloʻofá. Pea mahalo ko e tokotaha ʻoku tangutu ʻi hoku tafaʻakí, ʻo ʻikai tokanga mai pe fie ʻunu ke mamaʻó, mahalo pē ʻoku ʻikai ke pehē. Ka ʻoku ʻikai liliu ai e moʻoni ia ʻo e meʻa ʻoku ongoʻi ʻe Kalaisi kiate aú, mo e ngaahi meʻa te u malava ʻia Kalaisí.’”

ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá, “Is There a Place for Me?” (Unity in Diversity video series), ChurchofJesusChrist.org.