Ngāue Fakaetauhi ʻo fakafou ʻi he Ngāue Tokoni he Temipalé

ʻI heʻetau tokoni ki he niʻihi kehé ke nau fiefia ʻi he ngaahi tāpuaki ʻo e temipalé, ʻoku tau ngāue fakaetauhi ai.

ʻĪmisi

Tijuana Mexico Temple

ʻAta mei muí mei he Getty Images; ngaahi tā ʻo e Temipale Tegucigalpa Honduras, Temipale Tijuana Mexico , mo e Senitā Takimamata ʻo e Temipale Rome Italy.

ʻOku ʻaonga e feinga ke ʻalu ki he temipalé. Naʻe akoʻi ʻe Palesiteni Lāsolo M. Nalesoni “ʻoku mahuʻinga hotau taimi ʻi he temipalé ki hotau fakamoʻuí mo e hakeakiʻí, kae pehē ki hotau fāmilí. …

“… ʻOku tau takitaha fie maʻu ke hokohoko atu e fakaivia mo e akoʻi fakalaumālie ko ia ʻoku toki lava pē ke maʻu ʻi he fale ʻo e ʻEikí.”¹

Ke ʻalu ki he temipalé, ʻoku fie maʻu ke tokangaʻi hotau taimí, ngaahi fatongiá, mo e maʻuʻanga tokoní, kae pehē ki heʻetau mateuteu fakalaumālié. ʻOku tau ngāue fakaetauhi ʻi heʻetau ʻiloʻi e ngaahi fakangatangata ʻokú ne taʻofi hotau kāingá mei he temipalé pea tokoniʻi kinautolu ke maʻu ha ngaahi founga ke fakaleleiʻi ʻaki.

Ko e Temipalé Ko ha Tāpuaki Ia ʻe Lava Ke Fiefia Ai Ha Taha Pē

Naʻe luelue atu ha tokotaha ne toki ʻosi ngāue fakafaifekau ko Meki ki he matapā ʻo e Temipale Kona Hauaiʻí, ʻi heʻene fakatokangaʻi atu ha kiʻi finemui ʻoku tangutu toko taha pē ʻi ha sea ʻi tuʻa. Naʻe ongoʻi ʻe Meki ʻoku totonu ke ne talanoa ki he kiʻi finemuí, ka naʻe ʻikai ke ne fakapapauʻi pe ko e hā te ne lea ʻakí. Ko ia ai, naʻá ne fehuʻi ange e ʻuhinga ʻo e tā tatau ʻi he tungaʻi vaʻe ʻo e kiʻi finemuí. Naʻe kamata ai haʻana fepōtalanoaʻaki ʻo lava ai e kiʻi finemui ko Laní, ʻo vahevahe fekauʻaki mo ia.

Naʻe fakamatala ʻa Lani kia Meki fekauʻaki mo ʻene fefaʻuhi ke foki kakato mai ki he Siasí, kāingalotu lelei naʻa nau tokoniʻi iá, mo ʻene fakaʻamu ʻe lava ke silaʻi ia ki heʻene kiʻi pēpē fefiné ha ʻaho.

Naʻe fakaafeʻi ʻe Meki ʻa Lani ke na hū ʻo tangutu ʻi he loki talitali ʻo e temipalé. He ʻikai lava leva ke na hū ki loto atu ʻi he tempalé, ka te na lava ʻo kolosi atu ʻi he hūʻangá. Naʻe loto ki ai ʻa Lani, pea naʻá na hū fakataha atu he ongo matapā hūʻangá. Naʻe taki kinaua ʻe ha taha ngāue temipale ki ha sea ʻi lalo ʻi ha tā valivali ʻo e Fakamoʻuí.

ʻI heʻena tangutu fakatahá, naʻe fanafana ange ʻa Lani, “Naʻá ku fuʻu fie haʻu ki loto ʻi he temipalé he ʻahó ni, ka naʻá ku manavasiʻi.” Koeʻuhí naʻe muimui ʻa Meki ki he Laumālié, naʻá ne tokoni ai ke tali e lotu loto ʻa Laní.

Ngaahi Fakakaukau ke Tokoniʻi Kinautolu ʻoku ʻikai haʻanau Lekomení

Naʻa mo kinautolu ʻoku teʻeki ke nau taau ke maʻu ha lekomení, ʻe lava pē ke tāpuekina kinautolu ʻe he temipalé.

Vahevahe hoʻo ngaahi ongo fekauʻaki mo e founga kuo tāpuekina ai koe ʻe he ʻEikí ʻo fakafou ʻi he ngāue fakatemipalé.
Fakaafeʻi ha taha ke ʻalu ki ha ʻoupeni hausi ʻa ha temipale pe ko e senitā takimamatá. Kumi e ngaahi ʻoupeni hausi ka hokó ʻi he temples.ChurchofJesusChrist.org.

ʻĪmisi

people walking outside of temple

Tā ʻi muʻa ʻo e Temipale Los Angeles California, faitaaʻi ʻe Jerry L. Garns; tā ʻo e Temipale Washington D.C., Temipale Concepción Chile Temple, Temipale San Diego California; ʻi laló: Temipale Mesa Arizona.

Fakafaingofuaʻi ʻa e ʻAlu ki he Temipalé maʻá e Niʻihi Kehé

ʻE lava pē ke faingataʻa e ʻalu ki he temipalé, ʻo aʻu pē ki he kāingalotu ʻoku nau maʻu lekomeni temipalé. ʻE fie maʻu ke fononga mamaʻo ha niʻihi. Mahalo ʻoku ʻi ai ha fānau iiki ʻa ha niʻihi pe mēmipa toulekeleka ʻo e fāmilí ʻoku fie maʻu ke tokangaʻi. Te tau lava ʻo ngāue fakataha ke lava e tokotaha kotoa ʻo ngāue tokoni ʻi he temipalé.

Naʻe ongoʻi lomekina ʻa Leola Senitela ʻi hono tokangaʻi hono husepāniti naʻe fokoutuá mo ʻena fānau ʻe toko faá. Ko ia ai, naʻá ne fakakaukau ke tuku hano taimi he Tūsite kotoa pē ke ʻalu ai ki ha temipale ofi pē. Naʻe hoko ia ko ha maʻuʻanga melino mo mālohi ʻi heʻene moʻuí.

ʻI ha ʻaho ʻe taha, naʻá ne fanongo ai naʻe fuʻu fie maʻu ʻe ha ongo fefine toulekeleka ʻi hono uōtí ke na ʻalu ki he temipalé, ka naʻe ʻikai ha meʻa ke na ʻalu ai. Naʻe talaange ʻe Leola te ne lava ʻo ʻave kinaua. ʻI he taʻu ʻe 40 ka hokó, naʻe tātaaitaha pē haʻane ʻalu toko taha ki he temipalé.²

Naʻe tāpuekina ʻa Leola, pea naʻá ne tāpuekina e niʻihi kehé ʻi heʻene loto ke ʻave kinautolu mo ia ki he temipalé.

Ngaahi Fakakaukau ke Tokoniʻi e Niʻihi Kehé ke Aʻu ki he Temipalé

Te ke tokoniʻi fēfē e niʻihi kehé ke nau toutou aʻu ki he temipalé? Mahalo te ke lava ʻo ʻiloʻi ʻe tokoniʻi foki mo koe ʻe he ngaahi fakakaukau tatau.

ʻAlu fakataha. ʻOange ha meʻalele pe fokotuʻutuʻu ha founga ke ʻave ai ha taha. Te ne ala poupouʻi ha taha kehe ke ne ʻalu foki mo ia ki he temipalé.
Kole ki he kau mēmipa ho fāmilí pe uōtí ke nau tokoni atu ʻi hono fakahoko e ngaahi ouau maʻa hoʻo ngaahi kuí, tautautefito ki he taimi ʻoku lahi ai haʻo ngaahi hingoa fakafāmili kuo maau ki he ngaahi ouaú.
Pe fietokoni ʻo toʻotama kae lava e ngaahi mātuʻá ʻo ʻalu ki he temipalé. Pe fokotuʻutuʻu ke mou taufetongi ʻi hono fetokangaʻi ʻaki hoʻomou fānaú. (Ki ha ngaahi fakakaukau lahi ange, lau e “Fakafaingofuaʻi ʻa e Efiafi Temipalé: Ngaahi Tokoni ʻe 6 ke Fakafaingofuaʻi ʻa e ʻAʻahi ki he Temipalé” [fakamatala fakaʻilekitulōnika pē], Liahona, Sanuali 2018.)

ʻI he Taimi ʻOku Mamaʻo Ai e Temipalé

Naʻe fakakaukau ʻa Sanitala “Līsani” mo Seiloni ʻAnitoni ʻo Kolomopō, Suli Lengikaá, ke na sila ʻi he temipalé. Naʻe fiefia ʻaupito ai hona ongo kaungāmeʻa ko Ane mo ʻAnitoni Kumalasemí. Ka naʻá na ʻiloʻi naʻe ʻikai faingofua pe totongi maʻamaʻa e feinga ki he Temipale Manila Filipaini.

Kuo fakahū ʻe Līsani mo Seiloni ʻena paʻangá peá na tomuʻa taʻofi haʻana tikite vakapuna ʻi ha ngaahi māhina lahi kimuʻa ke maʻu ha sea ʻe feʻunga mo ʻena paʻangá. Naʻe faifai pea aʻu ki he ʻaho ko iá. Kae lolotonga ʻena tatali ke fetongi vaka ʻi Malēsiá, naʻá na toki ʻiloʻi ai naʻe fie maʻu ke ʻi ai haʻana visa pe ko ʻena puna ʻi ha kautaha vakapuna kehe ka na lava ʻo hokohoko atu ki he ʻOtu Filipainí. Naʻe ʻikai malava ke maʻu ha visa, pea naʻe ʻikai haʻana paʻanga feʻunga ke fakatau ha tikite ʻi ha kautaha vakapuna kehe. Ka naʻe ʻikai lava ke na makātakiʻi e fakakaukau ʻo e foki ki ʻapi ʻoku teʻeki ke na silá.

ʻI he ʻikai ke na fakapapauʻi pe ko e hā te na faí, naʻe telefoni ai ʻa Līsani kia ʻAnitoni. Naʻe fuʻu fie tokoni ʻaupito ʻa ʻAnitoni mo Ane. Ko e taha kinaua ʻo e ngaahi hoa mali tokosiʻi ʻi Suli Lengikā kuo silaʻi ʻi he temipalé, pea naʻá na ʻiloʻi ko ha tāpuaki moʻoni ia. Ka naʻá na toki fakaʻaongaʻi pē ʻena paʻanga kuo fakahuú ke tokoniʻi ha mēmipa ʻo e fāmilí naʻe faingataʻaʻia, pea naʻe ʻikai haʻana paʻanga feʻunga ke tokoni kia Līsani mo Seiloni ke totongi haʻana tikite vakapuna foʻou.

ʻOku angamaheni ʻaki ʻi Suli Lengikā ke fakatau ʻe he tangata malí ha kahoa koula maʻá e fefine malí kae lava ke ne maʻu ha paʻanga ʻo ka mālōlō hono husepānití. Naʻe fakakaukau ʻa Ane ke fakatau hono kahoá ke tokoni ke fakatau ha ongo tikite foʻou. Naʻe hoko ʻene meʻaʻofa maʻongoʻonga ke malava ai ʻa Līsani mo Seiloni ʻo maʻu ʻena taimi naʻe fokotuʻu ʻi Manilá.

Naʻe pehē ʻe Ane, “ʻOku ou ʻiloʻi e mahuʻinga ʻo e sila ʻi he temipalé. Naʻá ku ʻiloʻi ʻe hoko ʻa Seiloni mo Līsani ko ha ivi mālohi lahi ki he kolo ʻo e Siasí. Naʻe ʻikai ke u loto ke mole meiate kinaua e faingamālie ko ʻení.”³

Ngaahi Fakakaukau ke Tokoniʻi Kinautolu ʻOku ʻIkai Lava Ke Nau ʻAʻahi ki he Temipalé

ʻE lava ke uiuiʻi koe ke ke ngāue fakaetauhi kiate kinautolu ʻoku ʻikai ke nau faʻa lava ʻo aʻu ki he temipalé, pe ʻikai pē ke nau lava ki ai koeʻuhi ko e mamaʻó pe ngaahi fakamolé. Ka te ke kei lava pē ʻo ʻiloʻi ha ngaahi founga ke tokoniʻi ai kinautolu ke nau houngaʻia ʻi he ngaahi tāpuaki ʻo e temipalé.

Akoʻi pe kau fakataha ʻi ha kalasi teuteu temipale pe hisitōlia fakafāmili.
ʻOange kiate kinautolu ha tā ʻo e temipalé ke tautau ʻi honau ʻapí.
Kapau kuó ke ʻosi hū ʻi he temipalé, vahevahe hoʻo ngaahi ongo fekauʻaki mo hoʻo aʻusiá pea mo hoʻo fakamoʻoni ki he ngaahi ouau ʻo e temipalé.
Tokoni ke nau ako lahi ange fekauʻaki mo e ngaahi fuakava kuo nau fakahokó mo e founga ke tauhi ai kinautolú. Fakakaukau ke fakaʻaongaʻi e “Ko e Mahino ʻo ʻEtau Ngaahi Fuakava mo e ʻOtuá: Ko ha Vakai Fakalūkufua ki Heʻetau Ngaahi Palōmesi Mahuʻinga Tahá,” ʻi he Liahona ʻo Siulai, 2012.