Ngaahi Sīpinga Loto-Toʻá
Ko e Misi ʻa ʻAnitoní
Naʻe ʻohovale ʻa ʻAnitoni ʻi heʻene ʻā haké. Ko e tuʻo tolu ʻaki eni ʻene misi tatau! ʻI heʻene misí, naʻe fakahaaʻi ange ʻe ha tangata lōloa kiate ia ha fale fakaʻofoʻofa. Ko e hā nai hono ʻuhingá?
ʻI heʻene hoko ko ha faiakó, kuo ʻaʻahi ʻa ʻAnitoni ki ha ngaahi feituʻu kehekehe ʻi tuʻa ʻi hono kolo ko Naisīliá. Ka naʻe ʻikai tatau e fale naʻá ne sio ki ai ʻi heʻene misí mo ha meʻa kuó ne ʻosi mamata ai. Mahalo pē naʻe ʻikai ha fale pehē. Ka naʻe ʻi ai ha meʻa makehe fekauʻaki mo ia.
ʻI he ʻosi atu ʻa e ngaahi taʻú, naʻe kei fakakaukau pē ʻa ʻAnitoni ki heʻene misí, ka naʻá ne hohaʻa ki ha ngaahi meʻa kehe. Naʻe kamata ha tau ʻi Naisīlia. Naʻe ʻikai malu ʻa ʻAnitoni mo hono uaifí mo ʻene fānaú ke nau mavahe mei honau falé. Ka naʻe faingataʻa ke nau nofo fale he ʻahó kakato. Naʻe ongoʻi ʻofa ʻa ʻAnitoni ki hono ngaahi kaungāmeʻá mo ʻene fānau akó.
ʻI ha ʻaho ʻe taha, naʻe maʻu ʻe ʻAnitoni ha makasini motuʻa ʻi hono falé. ʻI heʻene fakaava iá, naʻá ne sio ki ha meʻa ne hangē naʻá ne ʻiló. Ko e fale fakaʻofoʻofa ia mei heʻene misí! Naʻe moʻoni ia.
Ko ha fale ia ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe fakakaukau ʻa ʻAnitoni, kuo teʻeki ai ke u fanongo ki ha siasi pehē kimuʻa. Naʻá ne fie ako lahi ange fekauʻaki mo ia, ka koeʻuhí ko e taú, naʻe ʻikai lava ke ne mavahe mei hono falé. Naʻe pau ke ne tatali.
ʻI he faifai pea ʻosi e taú, naʻe ʻoatu ʻe ʻAnitoni ha tohi ki he hetikuota ʻo e Siasí ʻi Sōleki Sití. Naʻá ne kole ange pe ʻe lava ʻo ʻomi ha kau faifekau ke akoʻi ia mo hono fāmilí. “ʻE lava nai ke mou langa homou siasí ʻi hoku koló?” Ko e tohi ia ʻa ʻAnitoní. “Kātaki muʻa ʻo ʻomi haʻaku folofola ke u lava ʻo akoʻi e niʻihi kehe ʻi he koló.”
Naʻe lotomamahi ʻa ʻAnitoni ʻi heʻene maʻu ha tohi mei he hetikuota ʻo e Siasí naʻe pehē: “ʻI he taimi ní, ʻoku ʻikai haʻamau kau faifekau ʻi homou fonuá.” ʻI he taimi ko iá, ne ʻikai lava ke maʻu ʻe he kakai tangata ʻuliʻulí e lakanga fakataulaʻeikí. Pea naʻe teʻeki ke fokotuʻutuʻu lelei e Siasí ʻi ʻAfilika.
Ka naʻe sai ʻaupito ʻa ʻAnitoni ʻi he tatali ki he taimi ʻa e ʻEikí. Neongo naʻe teʻeki lava ke papitaiso ia, ka naʻá ne kei tui mālohi pē.
Naʻe ʻoatu ʻe he Siasí ha Tohi ʻa Molomona mo ha ʻū tohi kehe ʻa e Siasí kia ʻAnitoni mo hono fāmilí. Naʻe ako ʻe ʻAnitoni e ʻū tohí peá ne akoʻi e meʻa naʻá ne ʻiló ki he niʻihi kehe ʻi he koló.
Naʻe tokanga ha kakai tokolahi ki he ongoongoleleí, pea fie maʻu ai ʻe ʻAnitoni ha feituʻu ke fakataha ki ai e taha kotoa.
ʻI ha hala ne tō fakaʻotu ai e siainé, ne langa ai ʻe ʻAnitoni ha kiʻi falelotu siʻisiʻi mo ha matapā, mo e matapā teke lanu pulū. Naʻe tohi ʻi he konga kimuʻa ʻo e falé ʻo pehē, “Kau Māʻoniʻoni ʻo Naisīlia ʻi he Ngaahi ʻAho Kimui Ní”
Ne ʻosi atu ha ngaahi taʻu. Pea ʻi ha ʻaho ʻe taha, ne fanongo ai ʻa ʻAnitoni ʻi ha ongoongo fakaʻofoʻofa. Naʻe fakahā ʻe he ʻOtuá ki ha palōfita ʻe lava ke maʻu ʻe he kau tangata moʻui taau kotoa pē ʻa e lakanga fakataulaʻeikí. Naʻe tuku atu ʻe he Siasí ha kau faifekau ki he kolo ʻo ʻAnitoní!
Naʻe ʻohovale ʻa e ongo faifekaú ʻi haʻana maʻu ha falelotu mo ha kakai tokolahi kuo nau mateuteu ke papitaiso. Naʻá na ofo ʻi he tui ʻa ʻAnitoní mo e niʻihi kehe ʻi he koló.
Naʻe talaange ʻe ʻAnitoni, “Ko ha fuʻu tatali lōloa mo faingataʻa ia, ka ʻoku ʻikai mahuʻinga ia he taimí ni. Ko ʻeni kuó mo haʻu.”
Ko ʻAnitoni ʻa e fuofua tokotaha ke papitaiso ʻi he Vaitafe ʻEkeonumilí ʻi Naisīlia. ʻI hono fokotuʻu e kolo foʻou ʻo e Siasí, naʻe uiuiʻi ia ke ne hoko ko e palesiteni fakakoló. Naʻe hoko hono uaifi ko Fiteliá ko e palesiteni Fineʻofá. Naʻe silaʻi fakataha kinaua ʻi he temipalé ʻi ha ngaahi taʻu kimui ange.
Naʻe hokohoko atu hono vahevahe ʻe ʻAnitoni ʻene tuí mo e niʻihi kehé. Naʻá ne faʻa talaange ki he kakaí ʻe tupulaki e tengaʻi ʻakau ʻo e ongoongoleleí kuo tō ʻi Naisīliá ki ha fuʻu ʻakau lahi. ʻE ʻohovale e māmaní ʻi heʻene tupulakí.
Naʻe moʻoni pē ʻa ʻAnitoni. ʻI he ʻaho ní, ʻoku ʻi ai ha kāingalotu ʻe toko 170,000 tupu ʻo e Siasí ʻi Naisīlia—mo ha temipale fakaʻofoʻofa! ʻOku kei tupulaki e tengaʻi ʻakau ʻo e ongoongoleleí naʻe tokoni ʻa ʻAnitoni ke toó, ʻi he funga ʻo e māmaní he ʻahó ni.
Naʻá ku toutou misi ki ha fale fakaʻofoʻofa!
Ko e fale ʻeni naʻá ku sio ki ai ʻi heʻeku misí!
Naá ku langa ʻa e kiʻi falelotu ko ʻení ke ʻi ai ha feituʻu ke mau fakataha ki ai!
Faifai kuo papitaiso!
Ngaahi tā fakatātā ʻa Dilleen Marsh