Eseese ae Faatasia
E alala le tusitala i Georgia, ISA.
“Faitalia i latou pe faapefea, po o fea, po o le a foi le mea latou te tapuai atu i ai” (Mataupu Faavae o le Faatuatua 1:11).
Sa asiasi atu Ellie ma lona aiga i o latou tausoga o e na nonofo mamao ese. Sa matuai fiafia lava Ellie! Na te lei vaai i ona tausoga i se taimi umi.
A o lei malaga, sa fai atu matua o Ellie e i ai se mea la te fia talanoa mai ai.
“Pe a tatou faatasitasi ma aiga tatou te faia e le aunoa se tatalo i taim o taumafataga. Ma o nisi taimi tatou te talanoa ai e uiga i le lotu, a ea?” O le fesili lea a Tama.
“E sa’o!” Na fai mai ai Ellie.
“Ia, o le a fai si ese teisi atu i lenei malaga,” o le tala lea a Tina. “O le uso o lou tina ma lona toalua e le o toe o i le lotu. Ma la te le fiafia pe a talanoa atu tagata ia i latou e uiga i ai.”
Sa faanonou mata o Ellie. “Aisea?”
“Tatou te le iloa mafuaaga uma,” o le tala lea a Tama. “Ae e alolofa tele i latou ia i tatou! Ou te manatu latou te le mananao e finau ma i tatou pe faatiga foi i o tatou lagona. O lea ua la fai mai ai e aua tatou te talanoa atu e uiga i mea o le lotu ia i latou.”
Sa lue atu le ulu o Ellie.
“E mafai lava ona tatou faitauina a tatou tusitusiga paia ma tatalo a o tatou i ai iina. Ae o le a tatou faia na o i tatou lava,” o le tala lea a Tina.
“Ae faapefea pe a tatou aai?” Sa fesili atu ai le uso o Ellie.
“Tatou faatali ma vaai,” o le tala lea a Tina. “Afai latou te le tatalo ae tatou te lei aai, e mafai ona tatou faia le tatalo i o tatou loto.”
“Lelei la,” na fai atu ai Ellie. “E mafai ona ou faia lena mea!”
O le aso na sosoo ai, na faaofiofi ai le aiga o Ellie i totonu o le taavale. Sa latou tietie atu seia oo i le leva o le po. Ina ua iu ina latou taunuu atu i le fale o o latou tausoga, sa fesoasoani le uso o le tina o Ellie ma lona toalua e aumai a latou ato mai le taavale. Ona o loa lea o tagata uma e momoe.
O le taeao na sosoo ai, na fai ai se tatalo a Ellie a o lei alu i le umukuka mo le meaai o le taeao. Sa ia lagonaina si popole laitiiti e uiga i le vaai atu i lona aiga. Ae na nofo ifo i lalo le uso o lona tina i ona autafa ma se ataata mafanafana i ona foliga.
“O nisi o i tatou e o i le fale otiulu o lou tausoga i se taimi mulimuli ane. Te fia sau? “sa ia fesili ai ia Ellie.
“O se fale otiulu?” Na fesili ai Ellie.
“Ioe! E mafai ona fai lua ulu ma lou uso pe a oulua mananao ai.”
Sa ataata Ellie ma lue lona ulu. Pei e manaia lena mea!
Ina ua maea le meaai i le taeao, sa latou o atu i se pasi i le fale otiulu. Sa fiafia Ellie e matamata i le galue a lona tausoga. Sa felelei solo i tua ma luma ona tamatamailima a o ia selua ma fili lauulu. Ina ua uma ona fai lauulu o tagata uma, sa latou faia se faaaliga sitaili faafoliga i luma o le faaata o le fale otiulu ma toē i o latou foliga fou.
O le aso na sosoo ai, sa mamafa ai timuga. O lea na filifili ai tagata uma e nonofo i totonu ma taaalo i taaloga laupapa. Sa au Ellie ma se tasi o ona tausoga e tauva ma ni tama matutua atu e toalua. Sa ula le tasi i le isi a o latou faataututuu solo a latou fasi laau i le laupapa.
“Ua ma malo!” O le ee lea a Ellie a o faamei atu lana fasi laau i le faaiuga o le laupapa. Na taufai fepō atu o la lima—e oo lava i tausoga matutua atu, o e na faafoliga ua le fiafia i le le malo.
I le mavae ai o ni nai aso, na oo i le taimi e o ai i le fale. A o oso atu Ellie i tua o le taavale a lona aiga, sa ia faalogoina le faatofa mai o lona aiga.
“O le a matou misia outou!”
“Ia toe o mai vave!”
“Matou te alolofa tele ia te outou!”
Sa ataata atu Ellie ma talotalo atu ao aluese mai le latou taavale. Sa ia maua le tele o mea malie. E tusa lava pe latou te talitonu i mea eseese, e mafai lava ona avea i latou o se aiga fiafia.