Mālō e lelei mei ʻĀsenitina!

Mālō e lelei! Ko Make mo Paula kimaua.

Kau mai ke tau ʻaʻahi ki ʻĀsenitina!

Ko ʻĀsenitina ko ha fonua ia ʻi Saute ʻAmelika. ‘Oku laka hake he maile ʻe 2,000 (km ʻe 3,219) hono lōloá. ʻOku vela ʻaupito e feituʻu fakatokelaú lolotonga e faʻahitaʻu māfaná. ʻI he feituʻu fakatongá, ʻoku poloka ai e ʻaisí he taʻú kakato!

Ko ha meʻakai manakoa e Empanadas ʻi ʻĀsenitina. Ko ha mahoaʻa pē ʻoku fakafonu ʻaki e pulú, koané, pe fuaʻiʻakaú. Ifo atu!

ʻOku ui e kau tangata tauhi pulú ko e gauchos ʻi ʻĀsenitina. ʻOku nau tauhi e fanga pulú mo e fanga hōsí.

‘Oku tokolahi e kakai ʻoku nau fakatau meʻakai ʻi he ngaahi māketi ʻi tuʻá. ʻOku tokoni e kiʻi tamasiʻi ko ʻení ki heʻene tamaí ʻi hono toʻo ha sandía pe foʻi meleni.

Naʻe ʻaʻahi e kiʻi taʻahine ko ʻení ki he Temipale Córdoba Argentina ʻi he ʻaho naʻe fakatapui aí. ʻE vavé ni pē ha ʻi ai ha temipale ʻe tolu ʻi ʻĀsenitina!

‘Oku lahi e fanga manu fakaofo ʻi ʻĀsenitina—ʻa e sakuá (jaguars), konitoá (condors), mo e penikuiní!

Ko ʻUsuaia ko e taha ʻo e ngaahi kolo ofi taha i māmani ki he Pole Sauté! ‘Oku ʻi ai ha uooti ʻe tolu ʻi he kolo ko iá.

Feʻiloaki mo ha niʻihi ʻo hotau ngaahi kaungāmeʻa mei ʻĀsenitiná!

‘I he taimi naʻe fakahoko mai ai ʻe Palesiteni Lāsolo M. Nalesoni e polokalama foʻou ʻo e ngaahi taumuʻa maʻá e fānaú mo e toʻu tupú, naʻá ku fokotuʻu ha taumuʻa ke u lele, hoko ko ha kaungāmeʻa lelei, mo fakaleleiʻi ange ʻeku lotú. Naʻá ku fai ʻeku fakamoʻoní he houalotu sākalamēnití ʻoku ou ʻiloʻi kapau te u fai e polokalamá ni, ʻe tokoniʻi au ʻe he Tamai Hēvaní.

Konisalo L., taʻu 7, Puenosi ʻAealesi, ʻĀsenitina

‘I heʻetau lau e folofolá, ʻoku tau ako ai kau kia Sīsū Kalaisi mo ʻEne ʻofa ʻiate kitautolú. ‘Oku tokoni ia ke u fiefia. ʻOku ou ʻilo ʻokú Ne ʻofa ʻiate au.

ʻEma L., taʻu 5, Puenosi ʻAealesi, ʻĀsenitina

ʻOkú ke haʻu mei ʻĀsenitina? Tohi mai kiate kimaua! ʻOkú ma fie fanongo meiate kimoutolu.

Fakamālō atu ʻi hoʻomou fie mamataʻi ʻa ʻĀsenitina mo kimauá. Tau toki sio!