Ko e Fakapulipulí

Fai ʻe Sisitā Cristina B. Franco

Tokoni Ua ʻi he Kau Palesitenisī Lahi ʻa e Palaimelí

Naʻe toʻo mei he “Ko e Fiefia ʻi he Tokoni Taʻesiokitá,” Liahona, Nōvema 2018, 55–57.

ʻOku finangalo e Tamai Hēvaní ke tau tokoni ki he niʻihi kehé. Naʻe hoko ʻeku faiako Palaimelí ko ha sīpinga maʻongoʻonga ʻo e ngāue tokoní. ‘I heʻemau omi ki he Palaimelí, naʻe haʻu maʻu pē ʻa Sisitā ʻAnitonieti mo ha foʻi keke sokoleti. Naʻá ku fehiʻa he keke sokoletí! Naʻe saiʻia ai e tokotaha kotoa. Ka naʻe ʻikai ke u teitei kai ia.

Naʻá ne fehuʻi mai ʻi ha ʻaho ʻe taha, “Ko e hā ʻoku ʻikai ke ke ʻahiʻahiʻi ai ha konga keké? Naʻe taʻo e foʻi keke ko ʻení ʻaki ha meʻa makehe.”

Naʻá ku loto lelei ke ʻahiʻahiʻi ia. Mateʻi mai pe naʻe hā? Naʻá ku saiʻia ai!

Hili ha ngaahi taʻu lahi mei ai naʻe talamai ʻe heʻeku faʻeé ʻa e kiʻi fakapulipuli ʻa Sisitā ʻAnitonietí. Naʻe pehē ʻe heʻeku faʻeé, “Naʻe ʻikai lahi e paʻanga ʻa Sisitā ʻAnitonietí. Naʻe pau ke ne fili he uike kotoa pe te ne totongi ha pasi ke fononga ai ki he Palaimelí pe fakatau mai e ngaahi meʻa ke taʻo ʻaki e keke sokoleti ki hoʻo kalasí. Naʻá ne fili maʻu pē ʻa e keke sokoletí. Ko ia ai naʻe ʻikai ke ne heka pasi ka naʻá ne lue ʻo laka hake ʻi he maile ʻe uá [km ʻe 3] ke ʻalu mo foki, ʻo tatau ai pē pe ko e hā e tūkunga ʻo e ʻeá.”

Ko e fakapulipuli ʻa Sisitā ʻAnitonietí ko ʻene ʻofa ki he niʻihi kehé!