Ngaahi ʻAta ʻo e Tuí
ʻIkināsio mo ʻAtelaite Paito
ʻAkalā, Kana
Kuo mamata ʻa ʻIkināsio mo ʻAtelaite ki he founga kuo faitāpuekina ai e kau mēmipa ʻi honau siteikí mo e fāmilí ʻe he polokalama laukonga mo tohi ʻa e Siasí mo e fakamamafa ʻi hono ako e ongoongoleleí ʻo fakatefito ʻi ʻapí.
Tokotaha faitaá, Christina Smith
ʻIkināsio:
Naʻá ku kau atu ki he polokalama laukonga mo tohi ʻi he ongoongoleleí ʻi heʻeku hoko ko ha mēmipa ʻo e kau palesitenisī fakasiteikí. Naʻá ku ʻaʻahi ki ha kalasi peá u ʻilo ai ʻoku ʻikai ko e kalasi pē ia maʻanautolu ne ʻikai lava ʻo laukonga mo tohí. ‘Oku fakataumuʻa ia kiate kitautolu kotoa pē ke mahino lelei ange e ongoongolelei ʻo Sīsū Kalaisí.
ʻAtelaite:
‘Oku ou ʻilo ha houʻeiki fafine tokolahi ʻi homau uōtí kuo tokoniʻi ʻe he kalasi laukonga mo tohi ʻi he ongoongoleleí. Naʻe ʻikai ongoʻi lelei ha fefine ʻe taha ʻiate ia koeʻuhí naʻe ʻikai ke ne lava ʻo laukonga, tohi, pe tokoniʻi ʻene fānaú ʻi heʻenau ngāue fakaako mei ʻapí. Naʻá ne kau ki he kalasí pea ʻokú ne lava he taimí ni ʻo laukonga mo tokoni. ‘Okú ne fiefia ʻaupito. ‘I he taimi kotoa pē ʻoku ou sio ai kiate iá, ʻoku ou pehē maʻu pē, “ʻOku moʻoni ʻaupito ʻa e ongoongolelei ko ʻení. ‘Okú ne liliu mo faitāpuekina e moʻui ʻa e kakaí.”
ʻIkināsio:
ʻE tokoni foki e Haʻu, ʻo Muimui ʻIate Aú mo hono ako e ongoongoleleí ʻo fakatefito ʻi ʻapí ke lau folofola fakataha mo feakoʻaki e ngaahi fāmilí.
Ko e Tohi ʻa Molomoná ko e maka-tuʻu-loto ia ʻo ʻetau tui fakalotú. Ne mau tupu hake kotoa ʻi ʻAfiliká ni ʻo ʻilo ki he Tohi Tapú. Ka ʻoku ʻikai ʻilo ʻe he tokolahi ʻoku maʻu ʻi he Tohi ʻa Molomoná ʻa e ngaahi moʻoni mahinongofua mo mahuʻingá. ʻI heʻetau fakaʻaongaʻi e Haʻu, ʻo Muimui ʻIate Aú ke ako e Tohi ʻa Molomoná ʻi he polokalama laukonga mo tohi ʻi he ongoongoleleí pea ʻi heʻetau ako e ongoongoleleí ʻo fakatefito ʻi ʻapí, ʻoku tau ako ai pea mahino e fakamatala kotoa pē ʻoku tau fie maʻu ke tokoniʻi ai kitautolu ke fakalakalaka ʻi he moʻuí ni.
ʻAtelaite:
‘I he taimi ne fanongonongo ai ʻi he konifelenisi lahí hono ako e ongoongoleleí ʻo fakatefito ʻi ʻapí, naʻá ku fakakaukau ki ha niʻihi ʻo e kau mēmipa homau uōtí peá u kiʻi hohaʻa. Te nau fakahoko fēfē nai ʻeni? Naʻá ku fakakaukau ki ai. Naʻá ku lotua ʻe muimui e kau mēmipá ki he fakahā ko ʻení. ‘Oku ou ʻilo kapau te nau muimui ki he meʻa kuo lea ʻaki ʻe he palōfitá, ʻe tokoniʻi ai kinautolu ʻi honau ngaahi ʻapí.
ʻOku feinga homau fāmilí ke fai e meʻa kotoa pē ʻoku mau lavá. ‘Oku kau ki ai e tokotaha kotoa. ‘Oku ou fiefia ʻaupito ʻi he founga kuo fetokoniʻaki ai ʻeku fānaú ʻi heʻemau lau fakataha e Tohi ʻa Molomoná. ʻOku nau saiʻia ʻaupito ʻi he Tohi ʻa Molomoná. Kuo mau fiefia fakataha ʻi hono lau mo vahevahe fakataha ʻemau ngaahi fakamoʻoní.
ʻIkināsio:
Kuo pehē ʻe Palesiteni Lāsolo M. Nalesoni, “Ko e hākeakiʻí ko ha meʻa fakafāmili ia.”1 ʻOku ou ʻofa ʻi hoku uaifí mo e fānaú. ‘Oku ou fie nofo mo kinautolu pea mo ʻetau Tamai Hēvaní ʻo taʻengata, ko ia ai ʻoku fie maʻu ke mau fetokoniʻaki.
ʻAtelaite:
‘Oku fetokoniʻaki foki e kau fafine ʻi he Fineʻofá. ‘I he taimi ʻoku mau fakataha aí, ʻoku mau fakakaukau, “ʻOku fie maʻu au ʻe he tokoua ko ʻení” pe, “ʻOku ou fie maʻu ia.” ʻOku mau tangutu fakataha mo fetokoniʻaki ke laukonga, mahino, mo vahevahe e meʻa ʻoku mau akó. ‘Oku mau fai homau lelei tahá ke fakakaukau, “Kapau naʻe ʻi heni ʻa e Fakamoʻuí, ko e hā te Ne fakahokó?”
ʻIkināsio:
‘Oku ʻi ai ha tafaʻaki ʻi he polokalama laukonga mo tohi ʻi he ongoongoleleí ʻoku kole ai ki he kau akó ke tā ha fakatātā ʻo e meʻa ʻoku nau fai ke fakalakalaka ai hono ako e ongoongoleleí mo e ako folofolá. Naʻe ʻi ai ha fakatātā ne tā ʻe ha tokotaha ʻokú ne fakatātaaʻi ha fāmili ʻoku haʻohaʻo ʻi ha tēpile mo ʻenau folofolá ʻo aleaʻi e ongoongoleleí. Naʻe ongo moʻoni ia kiate au. ʻOku ʻikai fekauʻaki pē ʻa e laukonga mo e tohi ʻi he ongoongoleleí pea mo e laukongá mo e tohí. ʻE lava foki e ngaahi fakatātaá ʻo tokoni ke tau ako. Neongo kapau ʻoku tau fakakaukau ʻoku tau ʻiloʻi e meʻa kotoa pē, te tau lava maʻu pē ʻo ako lahi ange fekauʻaki mo e ongoongoleleí mo fakalahi ʻetau fakamoʻoni ki he ʻEiki ko Sīsū Kalaisí.
ʻOku pehē ʻi he folofolá ko ia ʻoku mālohí ʻoku totonu ke ne puke mai ʻa ia ʻoku vaivaí ke malava foki ke ne mālohi (vakai, Tokāteline mo e Ngaahi Fuakava 84:106). Kapau ʻoku ʻi ai ha niʻihi ʻoku nau ongoʻi ʻoku nau vaivai ʻi he ongoongoleleí, te tau lava ʻo ngāue fakaetauhi tahataha kiate kinautolu, pea tokoni ke hiki hake kinautolu. ʻE hoko e ngāue fakaetauhí ko ha founga ʻaonga ʻaupito ke tokoni ki hono langaki hake e kāingalotú.
Kuo fakamālohia ʻe he ako ʻo e ongoongoleleí ʻoku fakatefito ʻi ʻapí ʻa e ngaahi fakamoʻoni ʻa Seiteni mo Hēpetí, ko e ongo foha ʻo e fāmili Paitó. ʻOkú na faʻa tataki e ngaahi fealēleaʻaki fakafāmili ʻi he ongoongoleleí.
ʻOku tokoni hono hivaʻi fakafāmili e ngaahi himí ke ʻomi e Laumālié ki he ngaahi efiafi ʻi ʻapí.
Kuo hanga ʻe he lotu fakafāmili maʻu peé ʻo ngaohi e ʻapi ʻo e fāmili Paitó ko ha feituʻu ʻo e tuí mo e ʻofá.
Kuo ʻilo ʻe ʻIkinātia fekauʻaki mo e mahuʻinga ʻo e lotú mei heʻene ongomātuʻá mo e ongo tuongaʻané.
ʻOku faitāpuekina e vā ʻo e fānau ʻi he fāmili Paitó ʻi heʻenau tokoni he ngaahi ngāue fakaʻapí fakataha mo hono ako e ongoongoleleí.
Kuo hanga ʻe he ako ʻo e ongoongoleleí mo e ngāue tokoni ʻi he fāmilí ʻo fakamālohia e feʻofaʻaki ʻa e fāmili Paitó mo faitāpuekina kinautolu ʻi ha ngaahi founga lahi kehekehe.
Kuo tokoni e lotu ʻa e husepānití mo e uaifí ke tataki ʻe ʻIkināsio mo ʻAtelaite ʻena fānaú ʻi he ngaahi founga kuo akoʻi mai ʻe he palōfitá mo e kau ʻaposetoló.