Ko e hā e Mahuʻinga ʻo ha Hingoa?

29 Sune–5 Siulai

Hili ʻenau uluí, naʻe fie maʻu ʻe he kau Leimana faivelengá ha hingoa foʻou ke fakafaikehekeheʻi ʻaki kinautolu mei he kau Leimana kehé ke fakataipe ʻaki ʻenau ului kia Sīsū Kalaisí. Naʻa nau ui kinautolu ko e kau ʻAnitai-Nīfai-Līhaí (vakai, ʻAlamā 23:16–17). ʻOku tau fakafaifekehekeheʻi kitautolu he ʻahó ni ʻaki hono toʻo kiate kitautolu e huafa ʻo Sīsū Kalaisí.

Ko Ha Fakaʻilonga ʻo ʻEtau Uluí

ʻOku tau fuakava ʻi he papitaisó ke toʻo kiate kitautolu e huafa ʻo Kalaisí. Ko e taimi kotoa pē ʻoku tau maʻu ai e sākalamēnití, ʻoku tau fakafoʻou e fuakava ko iá. Ko e hā ʻoku tau fuakava ke manatuʻi mo fakahoko ʻi heʻetau toʻo kiate kitautolu Hono huafá? (Vakai, Mōsaia 18:8–9; Tokāteline mo e Ngaahi Fuakava 20:77.)

Ko ha Fakamoʻoni ʻo Kalaisi

Ko e kau ʻAposetoló ko ha “kau fakamoʻoni makehe ki he huafa ʻo Kalaisí ʻi he māmaní kotoa” (T&F 107:23). Te tau lava foki ʻo hoko ko ha kau fakamoʻoni ʻo Kalaisi. ʻE founga fēfē hoʻo tuʻu fakataha mo e palōfitá mo e kau ʻaposetoló pea hoko ko ha fakamoʻoni ki he huafa ʻo Kalaisí ki he kakai ʻoku mou feohí?

Ko ha Maʻuʻanga Mālohi

Kuo kole mai ʻe Palesiteni Lāsolo M. Nalesoni kimuí ni ke tau ui e Siasí ʻaki hono hingoa totonú: Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ne palōmesi ʻe lilingi hifo ha mālohi ki he Kāingalotú ʻi heʻetau fai iá (vakai, “Ko e Hingoa Totonu ʻo e Siasí,” Liahona, Nōvema 2018, 89). Ko e hā ha ngaahi meʻa ʻe niʻihi te ke lava ʻo fai ke ngāue ʻaki lelei ange ai e hingoa totonu ʻo e Siasí mo tokoniʻi e niʻihi kehé ke nau fai e meʻa tatau?