Ko e hā ʻOkú ke Fakakaukau ki aí?

Kuo teʻeki ʻaupito ke u teitei fakahoko ha meʻa ʻoku mātuʻaki kovi. ‘Oku kei fie maʻu nai ke u fakatomala?—Veiveiua ʻi ʻUtinē

Siʻi Veiveiua,

‘Oku fie maʻu ke fakatomala e tokotaha kotoa pē, he ʻoku ʻikai ha taha ʻe haohaoa! ‘E lava ke faingofua tatau ʻa e fakatomalá mo e lotu ki he Tamai Hēvaní fekauʻaki mo e anga ho ʻahó mo fakahā kiate Ia hoʻo fie maʻu ke ke fai lelei ange ʻapongipongí. ʻOku tau kolea ha fakamolemole meiate Ia ʻi he taimi kuo tau fai ai ha meʻa ʻoku halá, pea ʻokú Ne fakamolemoleʻi kitautolu. ʻOku fakakaukau e kakai ʻe niʻihi ko e fakatomalá ko ha meʻa fakailifia. Ka ko ha meʻa fakafiefia ia! Ko e fakatomalá ko ha meʻaʻofa ia kuo foaki mai ʻe Sīsū Kalaisi ke tau lava ʻo ako, tupulaki, liliu, mo hoko ʻo hangē ange ko Iá. ʻOku pehē ʻe Palesiteni Nalesoni ʻoku totonu ke tau fakatomala ʻi he ʻaho kotoa pē. Te ke ongoʻi ha nonga mo e mālohi lahi ange ʻi hoʻo moʻuí, ʻi hoʻo fai iá.

Tuʻa ʻofa atu,

Ko e Kaumeʻá

ʻAhiʻahiʻi ʻeni!

Te ke fie maʻu:

māsima

pepa (black pepper)

sēpuni pelesitiki

tauveli

1. Huaʻi ha meʻi māsima ki ha peleti. ‘Oku fakafofongaʻi ʻe he meʻá ni ʻa ʻetau haohaoa mo maʻa kimuʻa pea tau faiangahalá.

2. Afuhi ha meʻi pepa ‘i ‘olunga he māsimá. ‘Oku fakafofongaʻi ʻe he meʻá ni e ngaahi fili hala ʻoku tau fakahokó.

3. Toʻo leva e sēpuni pelesitikí ʻo holoholoʻi ia ʻi ha tauveli.

4. Puke ʻa e sēpuní pea ueʻi māmālie ʻi ʻolunga ʻi he māsimá mo e pepá. ʻE pipiki e pepá ki he sēpuní! ʻOku tatau ʻeni mo e fakamolemolé ʻi he taimi ‘oku tau fakatomala aí.

Hangē pē ko hono toʻo ʻe he sēpuní ʻa e pepá ʻi he ʻekitivitī ko ʻení, ʻe lava ʻe he fakatomalá ʻo fakamaʻa kitautolu mei he ngaahi fili hala ʻoku tau fakahoko he ʻaho kotoa pē—pe ʻoku lahi pe siʻisiʻi. Koeʻuhí ko Sīsū Kalaisi mo ʻEne Fakaleleí, ʻoku tau maʻu kotoa ʻa e faingamālie ke fakatomalá.