Haʻu, ʻo Muimui ʻIate Au: Tohi ʻa Molomoná
Te Tau Lava Fēfē ʻo Matuʻuaki e Ngaahi Akonaki Loí?
6–12 Siulai
Ko Koliholá ko ha fili ia ʻo Kalaisi naʻá ne malanga “ʻo fakaʻikaiʻi ʻa e ngaahi kikite ʻa ia kuo lea ʻaki ʻe he kau palōfitá ʻo kau ki he hāʻele mai ʻa Kalaisí” (ʻAlamā 30:6). Naʻá ne malangaʻi mo ha ngaahi loi kehe mo taki atu “ʻa e loto ʻo e tokolahi” (ʻAlamā 30:18).
Neongo naʻe hoko ʻeni he taʻu ʻe 2,000 tupu kuohilí, ka ʻoku malangaʻi ha ngaahi meʻa tatau ʻe ha kakai tokolahi he ʻahó ni. Ko e hā te tau lava ʻo fai ke maluʻi kitautolu mei he ngaahi akonaki hala ʻi hotau kuongá ni?
Te tau Lava ʻo Maʻu ʻEtau Fakamoʻoni ʻAtautolu Pē.
Naʻe akoʻi ʻe Kolihola ki he kakaí “ʻoku ʻikai totonu ke ʻi ai ha Kalaisi” pea “ʻikai … ʻi ai ha fakalelei,” pea naʻá ne fakaʻikaiʻi ʻoku ʻi ai ha ʻOtua (vakai, ʻAlamā 30:12, 17, 28).
Te tau lava fēfē ʻo ʻiloʻi ʻoku moʻui e ʻOtuá mo Sīsū Kalaisi? Ko e hā e folofola mo e ngaahi aʻusia fakataautaha kuó ne fakamālohia hoʻo fakamoʻoni fekauʻaki mo Kinauá?
Te Tau Lava ʻo Fakafalala ki he Fakahaá
Naʻe fakaʻikaiʻi ʻe Kolihola e laumālie ʻo e kikité mo e fakahaá. Naʻá ne feinga ke tui e kakaí “ʻoku ʻikai ke lava ʻe ha tangata ʻo ʻiloʻi ha meʻa ʻe hoko maí” pea “ʻoku ʻikai te mou lava ʻo ʻiloʻi ha ngaahi meʻa ʻoku ʻikai te mou mamata ki ai” (ʻAlamā 30:13, 15).
Te tau lava ʻo vakai ki he kau palōfitá mo e kau ʻaposetoló ke maʻu e folofola ʻa e ʻOtuá ki hotau kuongá. ʻOku founga fēfē hono maluʻi koe mei he akonaki halá ʻi hoʻo muimui ki he palōfitá?
Te Tau Lava ʻo Manatuʻi ko e Moʻoní ko e Moʻoni
Naʻe talaange ʻe Kolihola ki he kakaí ʻoku ʻikai ʻi ai ha founga te nau lava ai ʻo ʻiloʻi e meʻa ʻoku moʻoní (vakai, ʻAlamā 30:24), ka kuo akonaki ʻa Palesiteni Lāsolo M. Nalesoni ʻo pehē: “ʻOku ʻi ai ha ngaahi meʻa ʻe niʻihi ʻoku moʻoni pē ia. …
“… ʻOku fakatefito e moʻoní ʻi he ngaahi fono kuo fokotuʻu ʻe he ʻOtuá. … ʻOku ngāue mo kaunga e ngaahi fono taʻengatá ʻi heʻetau moʻuí takitaha, ʻo tatau ai pē pe ʻoku tau tui ki ai pe ʻikai” (“The Love and Laws of God” [Brigham Young University devotional, Sept. 17, 2019], speeches.byu.edu). Te tau lava fēfē ʻo ʻiloʻi e ngaahi moʻoni ʻa e ʻOtuá, mo e founga kuo nau faitāpuekina ʻetau moʻuí?