Lesoni Fakataumuʻa Efiafi ʻi ʻApí
Ko Hono Fakaʻaongaʻi Lelei Ho Taimí
‘I he taimi ʻokú ke fakamuʻomuʻa ai e ʻEikí, ʻoku ʻi ai ha taimi ki he toengá.
Ngaahi tā fakatātā ʻa David Habben
Ko e ngaahi ʻekitivitī kehekehe ʻe fiha ʻoku nau tohoakiʻi hoʻo tokangá he ʻaho kotoa pē? ‘Oku tau maʻu kotoa pē ʻa e houa ʻe 24 tatau ke fakaʻaongaʻi, ka ʻoku ʻi ai ha faikehekehe lahi ʻi he founga ʻoku tau fili ke fakaʻaongaʻi ki ai e taimi ko iá!
Naʻe pehē ʻe Palesiteni Tāleni H. ʻOakesi, ko e Tokoni ʻUluaki ʻi he Kau Palesitenisī ʻUluakí: “ʻOku hulu ʻaupito e ngaahi meʻa lelei te tau lava ʻo faí ʻi he taimi ʻoku tau maʻu ke fakahoko ai kinautolú. ʻOku ʻi ai ha ngaahi meʻa ʻoku mahulu ange ia ʻi he leleí pea ko e ngaahi meʻa ia ʻoku totonu ke tau fuofua tokanga ki aí. … ʻE fie maʻu ke tau feilaulauʻi ha ngaahi meʻa lelei ka tau fili ki ha ngaahi meʻa ʻoku lelei ange pe lelei taha.”1
Te ke fakatātaaʻi ʻi he ʻekitivitī ko ʻení ʻa e meʻa ʻoku hoko ʻi heʻetau fakamuʻomuʻa e ngāue ʻa e ʻEikí.
1. Ko hono Fakaʻaongaʻi e Taimí
‘Oku lahi ha ngaahi ʻekitivitī lelei te tau lava ʻo fakaʻaongaʻi ki ai hotau taimí. Kole ki ho fāmilí ke vahevahe ha ngaahi meʻa ʻe niʻihi ʻoku nau fakaʻaongaʻi ki ai honau taimí he ʻaho takitaha.
Fakamatalaʻi ange ʻoku fakafofongaʻi ʻe he hiná ʻa e taimí. ‘Oku fakafofongaʻi ʻe he maká mo e ʻoneʻoné ʻa e ngaahi meʻa kehekehe te tau lava ʻo fakahoko ʻaki hotau taimí: ʻoku fakafofongaʻi ʻe he ngaahi foʻi maka lalahi angé ʻa e ngaahi meʻa kuo kole mai ʻe he ʻEikí ke tau fakamuʻomuʻá, hangē ko e ako folofolá, ngāue tokoní, ngāue fakatemipalé mo e hisitōlia fakafāmilí, mo e ʻalu ki he lotú, kae fakafofongaʻi ʻe he ʻoneʻoné ʻa e ngaahi ʻekitivitī lelei kehé hangē ko e fakahoko e ngāue fakaako mei ʻapí mo e feohi mo e ngaahi kaungāmeʻá.
2. ʻIkai Hokohoko Lelei e Ngaahi Meʻa ʻOku Fakamuʻomuʻá
ʻUluaki huaʻi kotoa e ʻoneʻoné ki he hiná, pea toki faʻo hifo e ngaahi foʻi maka lalahí ʻi ʻolunga. ‘I he taimi ʻokú ke tomuʻa faʻo ai e ʻoneʻoné, ʻoku ʻikai ke hao kotoa e ngaahi foʻi maka lalahi angé—hangē pē ko e taimi ʻoku tau fakamuʻomuʻa ai e ngaahi ʻekitivitī kehé ʻi he ngaahi meʻa kuo fekauʻi mai ʻe he Tamai Hēvaní ke tau fakahokó, he ʻikai ke tau maʻu ha taimi feʻunga ki he ngaahi meʻa ʻoku mahuʻinga tahá.
3. Ko e Mahino e Mahuʻinga ʻo ha Ngāue
Naʻe fekau ʻe Sīsū Kalaisi ʻo pehē, “ʻOua ʻe kumi ki he ngaahi meʻa ʻo e māmaní kae fuofua kumi ke langa hake ʻa e puleʻanga ʻo e ʻOtuá, pea fokotuʻu ʻa ʻene māʻoniʻoní” (Liliu ʻa Siosefa Sāmitá, Mātiu 6:38 [ʻi he Fakahinohino ki he Ngaahi Folofolá]). Aleaʻi e founga te mou lava ʻo fakamuʻomuʻa ai homou taimí ʻaki hono fuofua kumi e puleʻanga ʻo e ʻOtuá.
Huaʻi hoʻo foʻi hiná pea toe kamata foʻou ʻaki e ʻū meʻa tatau. Mahalo ʻe fie tokoni atu ho fanga tokouá mo e tuongaʻané/tuofefiné. ‘Ai ke nau ʻuluaki faʻo e ngaahi foʻi maka lalahí ki he hiná. ‘I hoʻo faʻo fakamuimui ki ai e ʻoneʻoné, vakai ki heʻene fakafonu e ngaahi tafaʻaki ʻoku kei ʻatā takatakai ʻi he ngaahi foʻi maka lalahí kae ʻoua kuo hao kotoa e ʻoneʻoné ki loto.
Fehuʻi ange ki homou fāmilí pe ʻoku nau fakakaukau ʻoku ʻuhinga ki he hā e palōmesi ko ʻeni meia Palesiteni Lāsolo M. Nalesoní: “ʻI hoʻo foaki maʻu ai pē ki he ʻEikí ha konga lahi ho taimí, te Ne fakalahi ʻa hono toé.”2
Ko Hono Fakamuʻomuʻa e ʻEikí
ʻI heʻetau fuofua kumi ke fakahoko e finangalo ʻo e ʻOtuá, ʻokú Ne tokoniʻi kitautolu ke tau maʻu ha taimi feʻunga ki he ngaahi meʻa kehe ʻoku mahuʻinga mo langaki moʻuí. Ko ia kapau ʻokú ke faingataʻaʻia ʻi he kumi ha taimi feʻunga ke fakaʻosi e ngāue fakaako mei ʻapí, fakatupulaki ho ngaahi talēnití, pe maʻu e mohe ʻokú ke fie maʻú, fehuʻi ki he ʻEikí e meʻa te ke lava ʻo fai ke fakamuʻomuʻa ʻi ho taimí ʻo fakatatau ki Heʻene palaní. Fokotuʻu fakafāmili fakataha ha ngaahi taumuʻa ke fakamuʻomuʻa e ngāue ʻa e ʻEikí—mo homou vā mo Iá—ʻo muʻomuʻa he ʻaho takitaha.