Founga ʻOku Tau Fakamālohia ai ʻEtau Tuí—Fakataha
‘I heʻetau ako e Tohi ʻa Molomoná he māhina ní, ʻoku tau ako ai fekauʻaki mo Kolihola, ʻa ia naʻá ne fakalotoʻi ha kāingalotu tokolahi ʻo e Siasí kuo lohiakiʻi kinautolu ʻe he kau palōfitá ka naʻá ne fakahā kimui ange naʻe lohiakiʻi ia ʻe Sētane pea naʻá ne lohiakiʻi e niʻihi kehé. ‘Oku tau ako kau ki he kau Sōlamí, ko ha kakai ne nau fakamavaheʻi kinautolu mei he Siasí. Pea ʻoku tau vakai kia ʻAlamā ko e Siʻi, ʻa ia naʻe ʻi ai e taimi naʻá ne fakafepakiʻi e Siasí, feinga ke fakamālohia ʻene fānau lalahí mei he ngaahi fili te ne tataki kinautolu mei he ʻEikí mo Hono Siasí.
‘Oku ʻi ai ha kau mēmipa ʻe niʻihi hotau fāmilí pe ngaahi kaungāmeʻá ʻoku nau fili ke ʻoua te nau toe kau ki he Siasi ʻo e ʻEikí kuo fakafoki maí. ‘E lava ke fakamamahi ʻeni kiate kitautolu ʻoku tau ongoʻi mālohi ʻetau tuí. ʻOku tau fie tokoni, ka ʻoku fifili hotau tokolahi pe ʻe founga fēfē.
He ʻikai teitei lava ʻe ha makasini ʻe taha ʻo aleaʻi e ʻuhinga kotoa pē ki he momoko ʻa e tuí pe fakamatala pau ki he founga ʻo e fakafeangai ki aí ʻo kapau ʻe hoko ia. ‘Oku kehekehe e fononga ʻa e tokotaha kotoa ʻi he tuí. Ka ʻoku mau fakaʻamu ʻi he makasini ko ʻení ke fai atu ha tokoni, hangē ko e:
-
Aʻusia ha tangata ʻe taha ʻi heʻene foki mai ki he Siasí mo e meʻa kuó ne ako mei aí (vakai, peesi 26).
-
Ko e mahuʻinga hono talitali lelei e tokotaha kotoa pē (vakai, 40).
-
Ngaahi fokotuʻu ki he mātuʻá ki he founga ke nau fakafeangaiʻaki honau vā mo e fānau lalahi kuo nau fili ha hala kehé (vakai, peesi 30).
-
Ngaahi fakakaukau tokoni ki he hisitōlia ʻo e Siasí mo e founga te ne lava ʻo fakamālohia ʻetau tuí (vakai, peesi 12).
‘Oku mau fakaʻamu ʻe ʻoatu ʻe he ngaahi talanoá ni ha kamataʻanga ki hoʻo fekumi ki ha tataki fakalangi ʻi hoʻo ngaahi tūkunga fakatāutahá.
Fakaʻapaʻapa atu,
Adam C. Olson
ʻĒtita Pulé