Kakai Lalahi Kei Talavoú
ʻUhinga Naʻe Finangalo ai e Tamai Hēvaní ke u Akó
Neongo pe ko e hā hoʻo ngaahi holi māʻoniʻoní, ʻe tofa ʻe he Tamai Hēvaní ha hala ke ke aʻusia ai kinautolu.
Talu mei heʻeku kei siʻí, ne u loto maʻu pē ke fakahōifua ki heʻeku Tamai Hēvaní pea ki hoku fāmili lolotongá mo ia ʻi he kahaʻú. Naʻá ku loto ke u maʻu ʻa e ako kotoa pē te u ala lavá ke u tupulaki ai pea pehē ki heʻeku moʻuí.
‘I hoku fonua ko Peluú, ʻoku mamafa ʻaupito e ako leleí, pea ʻikai lava ʻo maʻu ia ʻi ha ngaahi feituʻu ʻe niʻihi. Naʻe ʻikai maʻu foki ʻe hoku fāmilí e maʻuʻanga tokoni kotoa ke poupouʻi ʻeku akó. Ka naʻe akoʻi au ʻe heʻeku ongomātuʻá ʻe lava ʻe he ngāue mālohí, faivelengá, mo e kole tokoni ki he Tamai Hēvaní ʻo tokoni ke fakahoko ʻetau ngaahi holi māʻoniʻoní. Pea ne u palani ke ngāue mālohi.
Naʻá ku faivelenga ʻi heʻeku ako ʻi he lautohi puleʻangá mo e ako māʻolungá ke u lava ʻo fakalakalaka ʻi he taʻu kotoa. Hili e ako māʻolungá, naʻá ku hū ki he ʻunivēsiti tuʻukimuʻa ʻi Peluú peá u maʻu ha sikolasipi lelei. Lolotonga ʻeku ʻi aí, naʻá ku ngāue mo ha ngaahi kautaha kehekehe, kau ai ha ako ngāue ʻi ha kautaha fakatuʻapuleʻanga, pea maʻu ha ngaahi faingamālie ke tokangaʻi ai ha ngaahi ngāue lahi kehekehe.
Lolotonga e ako ngāue ko iá, naʻá ku ongoʻi ʻe hoko ia ko ha faingamālie lelei ke u ako ai e lea faka-Pilitāniá. Ko ia ne u fakakaukau ai ke u hiki ki he ʻUnivēsiti Pilikihami ʻIongi–ʻAitahoó. Naʻe kiʻi faingataʻa, ka naʻá ku ʻiloʻi ʻe tokoniʻi au ʻe he Tamai Hēvaní ke u aʻusia e taumuʻa ko ʻení—ko e meʻa pē naʻe fie maʻú ke u falala kiate Ia mo fakahoko ʻeku tafaʻakí.
Ko ha Liliu ʻi he Ngaahi Palaní
Naʻá ku ʻosi fakapapauʻi te u ʻalu ki BYU–Idaho, ka ʻi he lolotonga hono fakafonu ʻeku foomu kolé, naʻá ku ongoʻi mālohi ʻoku totonu ke u ʻalu ʻo ngāue fakafaifekau kimuʻa peá u hiki ki aí. Ko ia ne u muimui leva ki he finangalo ʻo e Tamai Hēvaní pea naʻe uiuiʻi au ke ngāue ʻi Tuluio, Pelū. ‘I heʻeku foki ki ʻapí, naʻá ku palani ke u foki ki he ʻunivēsiti ʻi Peluú he naʻá ku ongoʻi te u lava ʻo maʻu vave ai hoku mataʻitohí. Ka neongo ia, ne u toki ʻilo naʻe fakataʻeʻaongaʻi ʻeku sikolasipí koeʻuhí ne laka hake he taʻu ʻe tahá e liʻaki ʻeku akó ke u ʻalu ʻo ngāue fakafaifekaú.
Na‘á ku fuʻu loto-mamahi mo ongoʻi taumuʻavalea. Naʻe ʻikai ke u ʻilo e meʻa ke faí. Naʻe ʻikai ke u ʻilo e ʻuhinga naʻe ueʻi ai au ke ngāue fakafaifekau kapau ʻe mole ai hoku faingamālie ke maʻu ha mataʻitohi mei he kolisí.
Ka ʻi he ʻaho ʻe taha, naʻá ku manatuʻi hono talamai ʻe heʻeku palesiteni fakamisioná fekauʻaki mo e BYU-Pathway Worldwide. Naʻá ne fakaafeʻi kimautolu ke fakaleleiʻi ʻemau lea faka-Pilitāniá pea tulifua ki he faingamālié ni ʻi heʻemau foki ki ʻapí—pea ne u fai ia!
Ko ʻEku Fononga ʻi he BYU-Pathway Worldwide
Naʻá ku ʻiloʻi naʻe ʻikai tupukoso pē hono talamai ʻe heʻeku palesiteni fakamisioná fekauʻaki mo e BYU-Pathway. ‘I heʻeku kamata e polokalama Pathway, naʻe fie maʻu ia ke u fononga ʻi he meimei houa ʻe tolu he uike kotoa ke fakataha mo ʻeku kulupú. Naʻá ku feilaulau lahi, ka naʻá ku ʻiloʻi naʻe fakatou mahuʻinga ʻa e akó kiate au mo e ʻEikí. Pea naʻe iku e ngaahi feilaulau ko iá ki ha ngaahi tāpuaki lahi.
Naʻe hoko e BYU-Pathway Worldwide ko e faingamālie ne u fekumi ki aí. Naʻe fakaʻatā ai ke u ako ʻi ha totongi fakaʻatuʻi, pea fakaʻatā ha taimi ke u ngāue ai, mo tokoni ke u ako ʻi he lea faka-Pilitāniá. Pea ʻi he meʻa kotoa ko iá, naʻá ku fetaulaki mo ha ngaahi kaungāmeʻa lelei ne nau poupouʻi au ke u loto-toʻa mo hokohoko atu hono ngāueʻi ʻeku ngaahi taumuʻá. Naʻá ku ongoʻi mālohi fakalaumālie pea hoko ko ha ākonga lelei ange ʻo Sīsū Kalaisi.
Ne faifai peá u hoko ko e fuofua tokotaha ako fakavahaʻa puleʻanga ke maʻu ha mataʻitohi B.A ʻi he BYU-Pathway Worldwide. Kuo fakaava mai ʻe he akó ha ngaahi faingamālie fakaofo kiate au. ʻOku ou hoko he taimí ni ko ha mataotao ʻi he uelofeá mo e moʻui fakafalala pē kiate kitá ki he ʻĒlia ʻAmelika Saute Tokelau-hihifo ʻo e Siasí, mo ha faifekau tokoni foki ʻi he BYU-Pathway ʻi Peluú. ʻOku ou vakai ki ha maama lahi ʻi he tokotaha ako takitaha, pea ʻoku ou poupouʻi kinautolu ke nau laka ki muʻa ʻo hangē pē ko hono poupouʻi au ʻe hoku ngaahi kaungāmeʻa ʻi he akó. Kuó u ʻiloʻi ʻoku ou feʻao maʻu pē mo e Tamai Hēvaní ʻi he fonongá ni ʻi he foʻi laka kotoa pē.
ʻOku Finangalo e Tamai Hēvaní ke Tau Lavameʻa
Kuo fakamālohia ʻe heʻeku fonongá ʻa ʻeku fakamoʻoni ki he akó. Pea ʻoku ou kei palani pē ke hokohoko atu e tupulakí mo ako ʻi he lahi taha te u lavá ʻi he ʻaho takitaha. ‘Oku tau ʻi māmaní ke tau fakalakalaka, ke sivisiviʻi, tupulaki, fakamoʻoniʻi ʻetau talangofuá, mo fakafalala ki he Fakamoʻuí ke tau hoko ʻo taau ke foki ki heʻetau Tamai Hēvaní. “ʻOku fakalaumālie … ʻa e ngaahi meʻa kotoa pē” ki he ʻOtuá—kau ai e akó (vakai, Tokāteline mo e Ngaahi Fuakava 29:34). ʻE tokoni e ngaahi meʻa kotoa pē kuo tau aʻusiá mo e ʻilo ʻoku tau maʻu ʻi he māmaní ke tau hoko ʻo hangē ange ko hotau Fakamoʻuí mo teuteuʻi ai kitautolu ke fai ha ngaahi fili lelei ange, tokoni lelei ange ʻi he māmaní, mo hoko ko ha ngaahi meʻa ngāue lelei ange ʻi Hono toʻukupú.
‘Oku ʻomi ʻe he akó ha founga ke maʻu ai e ʻiló pea ke ngāue leva, ke taukaveʻi e moʻoní mo e totonú, mo moʻui ʻi he moʻui ʻoku finangalo ʻetau Tamai Hēvaní maʻatautolú—ko ha moʻui fonu ʻi he fiefiá.
ʻOku ou ʻilo ʻoku faitāpuekina ʻe heʻetau Tamai Hēvaní ʻetau ngaahi feingá, tautautefito ʻi he taimi ʻoku tau loto-holi ai ke fakalakalaka pea ngāue tokoni kiate Ia mo ʻEne fānaú. ʻOku ou ʻilo ʻi he taimi ʻokú Ne tuku ai ha fakahinohino ki Heʻene fānaú, “te ne teuteu ha hala maʻanautolu ke nau lava ai ʻo fai ʻa e meʻa kuó ne fekau kiate kinautolú” (1 Nīfai 3:7). ʻOkú Ne finangalo ke tau lavameʻa!
‘Oku totonu ke tau takitaha fakaʻaongaʻi e faingamālie kotoa ki he ako mo e fakalakalaka ʻoku tuku mai ʻe he ʻEikí ʻi hotau halá, ʻo tatau ai pē pe ʻi he BYU-Pathway pe ko ha faʻahinga faingamālie fakaako kehe. ʻOkú Ne ʻofa ʻiate kitautolu pea te Ne tataki maʻu pē kitautolu. ‘Okú Ne finangalo ke tau ako e meʻa kotoa pē te tau lava ʻi māmaní. Pea ʻoku ou ʻilo te tau lava ʻo aʻusia ha ngaahi mana maʻongoʻonga ʻi heʻetau ngāue fiefia mo faivelenga pea falala ki Heʻene tatakí. ʻOku ou ʻiloʻi kuó u aʻusia ia.