Ko Hoku Fāmili Motuʻa Foʻoú
ʻOku lolotonga nofo ʻa e tokotaha naʻá ne faʻú ʻi ʻIutā, USA.
He ʻikai ha meʻa ʻe taʻemalava ʻe he ongoongoleleí ʻo liliu kapau te ke fakaʻatā ia.
Tā fakatātaaʻi ʻe Lobo
Naʻe puke hake ʻe he ongo faifekaú ha laʻitā. Naʻá na fehuʻi mai, “Ko e hā ʻokú ke vakai ki aí?”
Naʻá ku tali ange, “Ko ha fāmili fiefia.”
“ʻOku fiefia nai e fāmili kotoa?”
Naʻá ku kalokalo hoku ʻulú. Naʻá ku fakamatala ange, “Kuó mo mamata ki hoku fāmilí.”
Naʻá ku taʻu 16 pea nofo ʻi Palāsila, ko e feituʻu ne u nofo ai ʻi he kotoa ʻeku moʻuí. Kuo akoʻi au ʻe he ongo faifekaú ʻi ha ngaahi uike, ka naʻe ʻikai ha toe taha ʻi hoku fāmilí naʻe fie fanongo. Lolotonga e taimi ko iá, naʻe faʻa mamata e ongo faifekaú ki he kē mo fakakikihi hoku fāmilí. Naʻe ʻikai ha faitatau ʻi hoku fāmilí mo e fāmili fofonga malimali ʻi he taá.
Naʻe pehē mai ʻe ha taha ʻo e ongo ʻeletaá, “Mahalo pē ʻoku ʻikai peheni ho fāmili lolotongá. Ka te ke lava ʻo langa hake ho fāmili he kahaʻú ʻi ha founga kehe.”
‘I he ʻosi ʻemau ʻaʻahí, naʻá na toe kole mai ke u lotua e meʻa kuo mau akó. Hangē ko e angamahení, naʻe ʻikai ke u palōmesi pau ke fai ia. Naʻá ku fiefia ʻi he ongo naʻá ku maʻu he taimi ne ʻaʻahi mai ai e ongo faifekaú, pea naʻe mahino ʻa e ongoongoleleí kiate au. Ka naʻá ku manavasiʻi ʻi he tali te u ala maʻú. Kapau naʻe moʻoni ʻa e ongoongoleleí, ʻe fie maʻu ke u fai ha ngaahi liliu lahi.
Ko ha Fili Foʻou
Hili e mavahe ʻa e ongo ʻeletaá, naʻe ʻikai ke lava ʻo taʻofi ʻeku fakakaukau ki he ngaahi fāmili fiefiá. Naʻe ʻikai teitei ofi ki ai homau fāmilí. Naʻe ʻikai ke u nofo mo ʻeku tamaí. Naʻe ʻikai ke lelei hoku vā mo ʻeku faʻeé. Naʻe tokangaʻi kimautolu ʻe he kui fefiné, ka naʻe ʻikai ha taha ʻiate kimautolu ʻe tōʻonga tatau mo e fāmili naʻe akoʻi ʻe he ongo faifekaú. Naʻe ʻikai ha taha ʻiate kimautolu te ne fakahā e ʻofá pe lahi ʻemau feohí.
Naʻá ku palōmesi he kotoa ʻeku moʻuí te u hoko ko ha tamai lelei ʻi ha ʻaho. Te u hoko ko e mātuʻa naʻe ʻikai ke u maʻú. Ka ʻi hono akoʻi au ʻe he ongo faifekaú, naʻe kamata ke u fakatokangaʻi ne u fai e ngaahi meʻa tatau pē naʻe fai ʻe heʻeku ongomātuʻá ʻi heʻena taʻu tatau mo aú. Naʻá ku ʻalu fuoloa he poʻulí, ʻo fai ha meʻa pē ne u loto ki ai, pea moʻui hangē ha taha angatuʻú. Naʻá ku toe fakahoko pē e meʻa tatau ʻo ʻikai ke u taumuʻa ki ai.
Kuo taimi ke fehuʻi ki he ʻOtuá.
ʻI he faifai peá u lotú, naʻá ku maʻu e tali naʻá ku ʻamanaki fuoloa ki aí. ʻOku moʻoni ʻa e Siasí! Kuo taimi leva ke u fai ha fili.
Ko ha Tokotaha Foʻou
Naʻe pau ke fakangofua ʻe heʻeku kui fefiné kimuʻa peá u lava ʻo papitaisó. Naʻe ʻikai ke ne tali ia, ka naʻá ku vivili pē.
“Kui fefine, ko e Lēnati fē ʻokú ke saiʻia aí?” Ko ʻeku fehuʻí ange ia. “ʻA e taha ko ē naʻe ʻalu ʻo inu mo ifi tapaka pea toki foki mai ki ʻapi kuo fuoloa e poʻulí? Pe ʻokú ke saiʻia ange ʻia au he taimi ní? ʻOku hoko e ngaahi liliú ni koeʻuhí ko e ongoongoleleí.”
Ne faifai pea loto-lelei ʻeku kui fefiné, pea naʻe papitaiso mo hilifakinima au. Talu mei he momeniti ko iá, naʻe kamata ke hoko ha meʻa mālie ʻi hoku fāmilí—ko ha meʻa naʻe ʻikai ke u fuʻu fakatokangaʻi kae ʻoua kuo ʻosi ha ngaahi taʻu siʻi mei ai.
Ko ha Fāmili Foʻou
Kimuʻa pē peá u ʻalu ʻo ngāue fakafaifekau ki he fakatonga ʻo Palāsilá, naʻá ku ʻalu mo e Kui fefiné ki he konifelenisi fakasiteikí. Hili iá ne mau fakahoko ha kiʻi houa fakamoʻoni mo e fāmilí mo e ngaahi kaungāmeʻá. Ne u ʻohovale ʻi he fie lea ʻa e Kui fefiné.
Naʻá ne pehē, “Talu e kau ʻa Lēnati ki homou siasí, kuo kamata ke hoko hoku fāmilí ko ha fāmili moʻoni.” Naʻá ne ʻomi leva ha ngaahi founga kuo vāofi ange ai homau fāmilí: ʻOku mau feohi fakataha he taimí ni. Naʻa mau kamata feleaʻaki ʻo pehē “ʻOfa atu,” ka naʻe ʻikai ke mau teitei fai pehē kimuʻa. Kuo tuku e keé mo e fakakikihí. Kuo tupulaki ha vā fakakaungāmeʻa moʻoni ʻiate kimautolu. Ne mau maʻu ha meʻatokoni lahi ange pea ne faitāpuekina lahi kimautolu ʻi ha ngaahi tafaʻaki kehe.
Naʻá ku fakatokangaʻi foki e ngaahi liliú ni, ka naʻe ʻikai ke u fakatokangaʻi ʻe lava ke fehokotaki ia mo e taimi naʻá ku papitaiso aí.
Naʻá ne pehē, “Neongo ʻoku ʻikai ko ha mēmipa au ʻi homou siasí, ka ko ha kaungāmeʻa au homou siasí. Pea ʻoku ou ʻiloʻi kuo faitāpuekina homau fāmilí koeʻuhí ko e fili ʻa Lēnatí.”
Ko ha Mahino Foʻou
Ne faingataʻa ke u tui ki ai! Pea ʻi he lea ʻa e Kui fefiné fekauʻaki mo e founga kuo vāofi ange ai homau fāmilí, ne fakafokifā ʻeku manatuʻi e tā naʻe fakaʻaliʻali mai ʻe he ongo faifekaú ʻi he ngaahi taʻu kimuʻá. Ko e taimi ko iá, ne u fakakaukau ko e founga pē ke u maʻu ai ha fāmili fiefiá ko hoku fāmili ʻi he kahaʻú.
Ka ne hala ʻeku maʻú. Naʻe fiefia hoku fāmili lolotongá! Kuo mau feʻofaʻaki.
Mahalo he ʻikai ha taha ʻi he kau mēmipa homau fāmilí ʻe kau ki he Siasí ʻi he moʻuí ni. Ka neongo kapau he ʻikai ke nau kau, ʻoku ou ʻiloʻi kuo ʻosi faitāpuekina kimautolu ʻe he ʻOtuá ʻi ha ngaahi founga lahi. ‘Oku fakahaaʻi mai ʻe he ongoongolelei ʻo Sīsū Kalaisí ʻa e founga ke fakalakalaka ai hotau fāmilí, neongo pe ʻoku fēfē e tūkunga hotau fāmilí.