Ko e Pailate Loto-toʻá
Naʻe ʻikai ha taha te ne fie tali ki he faiako fakamālohisinó, ka naʻe fakaʻohovale e hiki nima ha talavou ʻe taha.
Tā fakatātaaʻi ʻe David Malan
Naʻá ku kau ki he Laulāpuna Fakakautau ʻa e ʻIunaiteti Siteití ʻi he ngaahi taʻu lahi kuohilí, ke ngāue maʻa hoku fonuá. Naʻe ʻikai fuoloa kuó u aʻu ki he nofoʻanga kemi fakamālohisino (boot camp) ʻi Tekisisi, USA. Ne fakalau māmālie atu ʻa e ngaahi uiké ʻi heʻeku kātekina e ngaahi meʻa lahi ʻoku angamaheni ke foua ʻe ha taha ʻi he nofoʻanga kemi fakamālohisinó.
Naʻá ku ʻalu ʻi ha ʻaho ʻe taha ki ha fakataha lahi ʻa ha kau pailate sōtia ʻe 200 tupu, ne mau akoako kotoa pē. Naʻe kamata e fakatahá ʻaki ha taha ʻo ʻemau faiako fakamalohisinó—ʻa ia naʻe angamaheni ke ne kaikaila leʻo lahi mo taʻefeʻunga—ʻo pehē, “ʻOku ʻi ai ha taha ʻoku ʻikai loto ki he founga ʻoku ou fakahoko ʻaki e ngaahi meʻa hení?”
Ko hono moʻoní naʻe ʻikai teitei fie tali ha taha, ka naʻe fakaʻohovale e hiki nima ha talavou ʻe taha.
Naʻe kaila e faiako fakamalohisinó, “Pailate, tuʻu ki ʻolunga!” “Ko e hā ʻoku ʻikai te ke loto ki aí?”
Naʻa mau fakaongo kotoa ʻi he kaila leʻo lahi e talavoú, “ʻOku ʻikai te u loto ki hoʻo takuanoa e huafa hoku Fakamoʻuí. ‘Oku fakamamahi ia ki hoku laumālié. ‘Oku ou kole atu ke ke taʻofi ia.”
Naʻe fakalongo mate ʻa e lokí. Naʻe sio fakamamaʻu e faiako fakamalohisinó kiate ia peá ne fehuʻi ange pe ko e hā e tui fakalotu naʻá ne kau ki aí. Naʻe tali laukau ange ʻa e pailate loto-toʻá, “Ko ha mēmipa au ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní!”
Naʻe fakamālō ange ʻa e faiakó ki he pailaté ʻi heʻene loto-toʻa ke lea haké, pea naʻe hoko atu ʻa e fakatahá. Naʻe tō mamafa kiate au e meʻa ko ʻení. Naʻá ku faʻa fakakaukau te u fie maʻu e faʻahinga loto-toʻa naʻe maʻu ʻe he pailate ko iá.
Hili e nofoʻanga kemi fakamālohisinó mo e ako fakafaitoʻó, naʻe vahe au ki ha vaʻa laulāpuna fakakautau ʻi Kololato, USA. ʻI ha ʻaho ʻe taha ne u maʻu ai ha tohi mei hoku taʻoketé naʻe ngāue ʻi Filipaini. Naʻá ne kau ki he vaʻa laulāpuná ʻi ha taʻu ʻe taha kimuʻa ʻiate au. Naʻá ne talamai kuó ne hoko ko ha mēmipa ʻo e Siasí, pea naʻá ne loto ke u talanoa mo e ongo faifekaú. Naʻá ku manatuʻi leva he taimi ko iá ʻa e aʻusia ʻi he nofoʻanga kemi fakamalohisinó mo e pailate loto-toʻá. Naʻá ku fetaulaki mo hoku uaifí mo e ongo faifekaú, pea ʻikai fuoloa mei ai kuo papitaiso kimaua.
Hili ha ngaahi māhina siʻi mei ai, naʻá ku fokotuʻutuʻu ke ʻaʻahi e ongo faifekaú ki hoku tehiná. Naʻe papitaiso foki ia mo hono uaifí. Kuó u maʻu mo hoku ngaahi tokouá he taimí ni ha fāmili tokolahi mo e makapuna. ʻOku mau ʻofa kotoa ki he ʻEikí mo Hono Siasí.
‘Oku ʻikai ke u ʻiloʻi e hingoa ʻo e pailate loto-toʻá. Naʻe ʻikai ke u toe fetaulaki mo ia, ka te u houngaʻia ʻo taʻengata ʻi heʻene loto-toʻa ke taukaveʻi ʻa ʻene tuí.