Ko e Kiʻi Saliote Maá
ʻOku nofo ʻa e tokotaha naʻá ne faʻú ʻi Veamōniti, USA.
“ʻO ka mou ka ʻi he tauhi ʻo homou kāingá, ʻoku mou ʻi he ngāue pē ʻo homou ʻOtuá” (Mōsaia 2:17).
Ne fakaʻāʻā hake ʻa Sami pea mamao. Naʻá ne lava ʻo nāmuʻi ha meʻa ʻoku ifo.
Mmmm, ʻoku taʻo mā ʻa Papa. Ko e fakakaukau ia ‘a Samí.
Naʻe taʻo mā ʻa Papa he ʻaho Tokonaki kotoa maʻá e fāmilí. Naʻe saiʻia ʻa Sami he sio ki heʻene toʻo ki tuʻa e foʻi mā foʻou lanu melomeló mei he ʻōvaní. Naʻe ʻoange maʻu pē ʻe Papa kia Sami e ʻuluaki kongá.
Ka ʻoku ʻikai ko ha ʻaho Tokonaki ʻeni, ko e fakakaukau ia ‘a Samí. Ko e hā ʻoku taʻo meʻa ai ʻa Papá?
Naʻe tuʻu ʻa Sami mei he mohengá pea ʻalu ki peito. Naʻá ne fehuʻi kia Papa pe ko e hā e meʻa ʻoku hokó.
“ʻOkú ke manatuʻi e meʻa naʻe kole mai ʻe heʻetau pīsopé ke faí?” Ko e fehuʻi ange ia ʻa Papá.
Naʻe kamokamo ʻa Sami. “Naʻá ne kole mai ke tau tokoni ki he kakaí. Pea naʻá ku tokoni kia Sisitā Māteni ke ʻave ʻene kató ki ʻolunga, manatuʻi?”
“Naʻá ke fai ha ngāue lelei,” ko Papa ange ia. Naʻá ku lotua e founga te u lava ai ʻo tokoní. Naʻá ku maʻu e fakakaukau ke taʻo ha mā ke vahevahe.”
Naʻe fakasiosio ʻa Sami ki loto ʻi he tāpuni ʻo e ʻōvaní. Naʻá ne lau e foʻi maá.
“Taha … ua … tolu … fā. Ko hai te ke ʻave ki ai e maá?”
Naʻe pehē ʻe Papa, “Ko e meʻa ia te u fie maʻu ai hoʻo tokoní. “ʻOku ʻi ai ha foʻi mā maʻa Sisitā Māteni. Pea foʻi mā ʻe ua maʻá e fāmili Milá. Ko hai ʻoku totonu ke ta ʻave ki ai e foʻi mā hono faá?”
Naʻe fakakaukau ʻa Sami ki ai.
“Fēfē ʻa Misa Lī?” Ko e fehuʻi ange ia ʻa Samí. Naʻe nofo ʻa Misa Lī ʻi he fale ne nau nofo totongi aí. Naʻe ʻikai ke ne loko hū ki tuʻa. Naʻá ne sio kakai pē mei he luva hono falé.
Ne pehē ʻe Papa, “Ko ha fakakaukau lelei ia.”
Hili e moho ʻa e maá, naʻe tokoni ʻa Sami kia Papa ke kofukofuʻi e maá. Naʻá ne toho mai leva ʻa ʻene salioté. Naʻá na faʻo ki ai e maá.
“Kuo maau e maá ke tufa!” Ko e lea ia ʻa Samí.
Naʻe tokoni ʻa Papa kia Sami ke toho e salioté. Naʻe ongoʻi lelei mo māfana e loto ʻo Samí ʻo hangē pē ko e mā ne ʻamanaki ke na vahevahé!