O Koya Se Nodatou Tikoga
O au kei na watiqu me keirau na laki vauci e valetabu, ia na cakacaka vakalotu oqo sa rui vakaitamera cake sara mai vei keirau.
iTaba mai vei Joshua Dennis
Ni oti e vitu na yabaki ni vakanuinui kei na waraki ni gone, keirau sa qai vakalougatataki vakaveiwatini ena dua na luvei keirau yalewa. A mai rarama ni neirau bula o Alicie, ia e a bula voli ga me lima na vula ni bera ni mate ena niumonia.
O ya a ka dredre duadua au a sotava ena noqu bula. Ena veisiga niu lesu mai vale mai na cakacaka au dau dabe ka tagi. E ratou dau dabe vata kei au na wekai watiqu me ratou vakaukauwataki au. Au sa dau masu tikoga me dua tale na gone, ia e sega ni yaco mai. Au sa mani sese tu ena rarawa.
E ratou sa tekivu vakayaloqaqataki watiqu kei au na nona vuvale me keirau gole ka laki vauci ena Valetabu e Suva Viti. Keirau se bera mada vakadua ni gole ki na valetabu, ia keirau raica ni sa sala vinaka duadua oqo me kunei na inuinui kei na veivakabulai.
E sega tale ni dua na ka me vakaoqo me vakarautaki au meu vakila ena siga o ya! Au kila ni o au kei watiqu keirau na vauci vata ki na veigauna tawamudu. Oqo na kila-ka a vakasinaiti au ena vakavinavinaka kei na loloma. Ia au a sega tu ni kila ni cakacaka tabu vakalotu oqo sa vakaitamera cake sara maivei keirau.
Ena valetabu, au a kila kina ni o Alicie ena rawa mena vauci vei keirau. Au a tagi ena reki niu sa mai kila na vunau tabu oqo. Sa na neirau tikoga na luvei keirau yalewa ki na veigauna tawamudu! Au vakadinadinataka ni Kalou sa vakarautaka na veika kece sara eda gadreva meda marau tiko kina ena Nona vale savasava.
Tekivu mai na veiyabaki o ya, keirau sa mai vakalougatataki kina vakaveiwatini ena dua na luvei keirau tagane kei na tolu na gone susu. Ia keitou a sega vakadua ni guilecavi Alicie. Ena vuku ni cakacaka vakalotu ni valetabu, na luvei keirau yalewa sa tiki ni neitou matavuvale me tawamudu.
Niu sotava e dua ka sa takali e dua na luvena, au vakila vakakina na nodra rarawa. Ia au kila talega ni mosi oqo e sega ni kena icavacava. Dina ni sa yali o Alicie, ka vakakina ena sotava tiko na veivakatovolei tale eso, au kila ni Kalou e tiko vata kei au. Niu dau yalolailai se kudruvaka na veika eso, au kila ni Kalou ena dau tu ga e kea.
Au kila niu na raici Alicie tale, ka ni dina oqo ena vakasinaiti watiqu kei au tikoga ena reki titobu.