Veivalenilotu — Na Vanua ni Vakarokoroko kei na Sokalou

Mai vei Bisopi Dean M. Davies

iMatai ni Daunivakasala ena Matabisopi Vakatulewa

Sa dau tiko na Yalo ni Turaga ena noda veivalenilotu ka na vakauqeti keda ni da vakaitovotaki keda ena vakarokoroko Vua.

E dua na itokani yalodina a wasea vei au e dua na ka a sotava ni cakava tiko na nona ilesilesi me biuta tani na idabedabe ka vakaituvakitaka vakavinaka na valenilotu ni iteki ni oti na koniferedi ni iteki. Ni oti e 30 na miniti nona cakava tiko na itavi oqo, a qai kila ni sai iotioti tiko ni tamata o koya me tiko e valenilotu. Ni sega ni via vakila ni tiko duadua me sa biubiu yani vakatotolo, ia, a raica ni yalo vakacegu kamica vata ga a vakila ena gauna ni koniferedi se tiko ga vua ka sa tubu cake tikoga.

Ni sa cakava oti na nona itavi o ya ka biuta mai na valenilotu, a sotava e dua tale na lewenilotu a vaka me vakaraici koya matua tiko mai. Niu sa kila na cava a cakava tiko na noqu itokani, a taura na ligana na lewenilotu oqo ka kaya, “Baraca, na Turaga sa dau raica na veika lalai oqo o ni cakava ena Vukuna, ka raici ira sobu mai ena matadredredre.”

Ni oti e vica na yabaki niu sa bisopi tiko, na itokani vata ga oqo sa baci tiko duadua tale ena nona valenilotu ni tabanalevu. Ni oti nona bokoca na cina ena valenilotu, a wawa tale vakalailai ni sa cilava curuma mai na vula na katubaleka ki na itutu ni vunau.

Na yalo vata ga ni vakacegu o ya sa solegi koya mai, ni sa dabe sobu volekata na mata ni valenilotu ka vakananuma na vuqa na gauna vakalou a sotava ena ituvaki vaka o ya—na vuqa na gauna a vakaraica toka na bete era dovia na madrai ena teveli ni sakaramede, na gauna a vakila kina na Yalo Tabu e salavata kei koya ni laki vosa ena dua na koniferedi ni tabanalevu, na soqoni ni papitaiso a veiliutaki kina, na sere totoka ni matasere a rogoca, kei na vuqa na ivakadinadina maivei ira na lewe ni tabanalevu a tara vakatitobu na yalona. Ni dabe buto duadua tiko e valenilotu, a vakila ni a ulabaleti ena kaukauwa taucoko ni veika a sotava ena nona bula kei na nodra bula na lewe ni nona tabanalevu, ka sa cuvaki sobu kina ena vakavinavinaka cecekia.

A vakavulici vakavuku ka vakadodonu o noqu itokani ni vanua tabu duadua e vuravura sai koya na valetabu kei na itikotiko, ia mai na veika e rua oqori mai cake, sa yaco talega me kila vakavinaka ni sa vakalou na noda veivalenilotu. Baleta ni ra sa vakatabui ena lewa ni matabete, na veivale oqo sa yaco me vanua ena sovaraka mai kina na Turaga na ivakatakila vei ira na nona tamata ka yaco me “vakatakilai mai na kaukauwa ni bula vakalou” mai na cakacaka vakalotu e vakayacori e kea (raica na Vunau kei na Veiyalayalati 84: 20).

Na valenilotu e rau duavata kei na itikotiko me yaco kina na reki e yalataki mera sotava na Yalododonu yalodina ena siga ni Vakacecegu. Sa yaco oqo me dua na vanua era na sokalou cokovata kina na lewenilotu me yaco na yalodra me “semati na lomadra ena duavata kei na veilomani vakataki ira” (Mosaia 18:21) vakakina kivua na iVakabula. Vei keda me da vakaraitaka na vakavinavinaka dodonu ka doka na kena sovaraki mai na veivakalougatataki vakayalo e lako mai vei keda ena noda veivalenilotu, e dodonu meda curu ena vanua ni sokalou oqo ena ivakarau ni vakarokoroko titobu ka dina.

Na iBalebale ni Vakarokoroko

Ena noda ivalavala vou ni Lotu, na vosa vakarokoroko sa yaco kina me semati vata kei na vosa vakanomodi. Ni veiganiti ki na noda veivalenilotu na rorogo ni domo malumu, na yalani ni kena vakasamataki na vakarokoroko oqo sa mai sega kina ni tauri rawa na ibalebale taucoko ni vosa oqo. Na vakarokoroko e rawa ni semati ki na vosa vaka-Latina na iyatuvosa revereri, ka sa kena ibalebale meda “tu ka qoroqoro.”¹ Eda rawa beka ni raica e dua na vosa e vakamacalataka vakamatata na ituvaki ni yaloda ni da vakasamataka vakaidina na veika sa cakava na iVakabula vei keda yadua?

Au nanuma lesu na qaqa ni sere totoka eda lagata tiko ena noda loma ni valenilotu: “Loloma i Jisu au na dau qoroya tu.”² Na vakasama titobu ni vakavinavinaka o ya, veivakalagilagi, kei na kurabui sai koya na uto ni vakarokoroko, ka sa dau vakavuna noda levea na vosa se na ivakarau e rawa ni vakalailaitaka na yalo o ya ena lomada se so tale.

Veivalenilotu kei na Siga ni Vakacecegu

Mai na ivakatakila ni gauna oqo, eda kila e dua na tiki bibi ni noda sokalou ena siga ni Vakacecegu sai koya meda “lako ki na vale ni masumasu ka vakacabora na [noda] sakaramede ena [Nona] siga tabu [na Turaga]” (Vunau kei na Veiyalayalati 59:9). Na “[vei]vale ni masumasu” eda soqoni vata yani kina ena siga ni Vakacecegu sa noda valenilotu tabu.

Sa vukei keda o Peresitedi Russell M. Nelson meda kila vakavinaka na isema e voleka ena kedrau maliwa na noda na vakarokoroko me baleta na iVakabula kei na noda rai me baleta na siga ni Vakacecegu. Ena nona wasea na veika a sotava ena kena rokovi na siga ni Vakacecegu, a tukuna o Peresitedi Nelson, “Au a vulica mai na ivolanikalou ni noqu cakacaka kei na itovo ena siga ni Vakacecegu sa ivakatakilakila baleti au kei na Tamaqu.”³

Me vaka ga na noda cakacaka kei na itovo ena siga ni Vakacecegu sa ivakatakilakila ni noda yalodina vua na Turaga, na noda itovo, noda ivakarau ni bula, ka vaka sara mada ga na ivakarau ni noda isulusulu ni da tiko ena Nona vale ni masumasu ni sa rawa me vakaraitaka tiko e dua na itagede ni vakarokoroko ni yaloda vua na iVakabula.

Veivalenilotu kei na Cakacaka Vakalotu

Sa mai vakalevutaka o Elder Jeffrey R. Holland ena Kuoramu ni iApositolo Le Tinikarua na noda kila vakavinaka na ivakavuvuli oqo, ena nona kaya:

“Me ikuri ni kena vakarautaki na gauna me baleta na idusidusi ni kosipeli e kena usutu na vuvale, na noda soqoni vakavoui ena Sigatabu… e vakamatatataka na sakaramede ni Vakayakavi ni Turaga me sa veika tabu, ka kilai ni sa tiki bibi sara ni noda sokalou ena veimacawa. Meda sa qai dui nanuma tiko vakai keda yadua ni a mate na Karisito ena kavoro ni yalo ni a colata duadua ga na ivalavala ca kei na rarawa ni vuvale ni kawatamata taucoko.

“Me vaka ga ni da a cau ki na icolacola ni mate o ya, na gauna vakaoqo sa gadrevi kina na noda vakarokoroko.”⁴

Sa ka bibi me da nanuma ni na vanua digitaki me baleta na gauna cecere oqo ni vakarokoroko kivua na iVakabula o ya na valenilotu ni soqoni. Me ikuri ni vakarokoroko eda a vakila ena cakacaka tabu ni sakaramede ena veimacawa, na yaloda ni vakarokoroko kei na veidokai sa vakalevutaki ni da vakasamataka na cakacaka vakalotu tale eso ni matabete kei na veivakalougatataki e vakayacori e loma ni valenilotu, oka kina na kena vakatokayacataki kei na vakalougatataki na gone, papitaisotaki kei na veivakadeitaki, veitabaki ki na matabete, kei na vakatikori me baleta na veikacivi. Na cakacaka vakalotu kei na veivakalougatataki yadua oqo ena kauta mai na kena sovaraki mai na Yalo Tabu kevaka me yaco mai o ira era vakaitavi vata kei ira era lako mai ena bula vakarokoroko.

Valenisoqoni kei na Sokalou

Na siga ni Vakacecegu e solia vei keda na madigi meda qarava na Turaga ena gauna ni noda vuli e vale vakakina vaka-ivavakoso ena gauna ni sakaramede kei na veisoqoni tale eso. Me tekivu mai na veisiga taumada ni Lotu, era sa rekitaka na Yalododonu mera lako vata mai ena veimaliwai ka tauyavutaka na ivau ni veitacini kei na veiganeni. Na noda veivalenilotu era sa tara me tiko na veivanua e galala me sotava na itaviqaravi vakaoqo ena loma ni macawa. Meda kakua ni guilecava na inaki taumada ni veivale oqo, ia, ka sa ikoya me vakarautaka e dua na vanua ni sokalou.

Na sokalou kei na vakarokoroko e rau veiwekani voleka sara. “Ni da sokalou vua na Kalou, eda gole yani Vua ena loloma vakarokoroko, yalomalua, kei na qoroqoro. Eda sa kila ka ciqomi Koya ni sa noda Tui cecere, na Dauveibuli ni vuravura taucoko sara, na Tamada tawamudu lomani ka dauloloma.”⁵

Na itakele ni inaki ni sokalou oqo e dodonu me na uqeta na noda ivakarau ni bula ena valenilotu ena gauna mada ga ni da vakaitavi ena itaviqaravi vakaitikotiko raraba se veivakabulabulataki. E dodonu me qarauni vakavinaka me vakalailaitaki na itovo vakatani, na benu, se na vakacacani ni dua na tiki ni iyauqaqa mai na itaviqaravi ni Lotu, ka me vakayacori na kena vakasavasavataki vakatotolo se vakavinakataki ke yaco e dua na ka vakaoqori.

Era rawa ni vakavulici na gone kei na itabagone ni kena rokovi ka taqomaki na valenisoqoni ena ulabaleta yani na soqoni ena Siga Tabu. Na nodra vakaitavi na lewenilotu ena samaki na valenilotu—vakabibi na cokovata nodra vakaitavi na itubutubu kei na gone—sa ikoya e dua na sala totoka ni kena tarai cake e dua na Yalo ni vakarokoroko me baleta na noda veivale tabu. Me vaka sa laurai ena veika a sotava o noqu itokani ena kena vakavinakataki na valenilotu ni iteki ni oti na koniferedi ni iteki, ni sa kauwaitaki na valenisoqoni sa ikoya e dua na sala ni sokalou kei na sureta na Yalo ni Turaga.

Na Veivalenilotu kei na iVakabula

Ena veidusimaki vakaparofita nei Peresitedi Nelson, sa vakayacori na sasaga bibi me vakadeitaki ni na yaca i Jisu Karisito e sega ni vakuwai ena gauna eda tukuna kina na Nona Lotu. Ena sala vata oqo, meda kakua ni vakatara na iVakabula me sosomitaki mai na noda itakele ni noda sokalou — oka kina na noda vanua ni sokalou.

Eda dau tukuna tiko ni valetabu sa nona vale na Turaga, ka sa dua dina na ilesilesi e dodonu vinaka ka bibi. Eda rawa ni guilecava, ia, na noda veivalenilotu e vakatabui vakayadua ena lewa ni matabete me vaka e dua na vanua me na tiko kina na Yalo ni Turaga kei ira na luve ni Kalou — o ira e loma kei na taudaku ni Lotu — mera na lako mai ka “veikilai kina kei na nodra Dauveivueti” (Mosaia 18:30).

Na parokaramu se qai kacivaki wale tikoga oqo me ukutaki na noda veivalenilotu kei na cakacaka ni liga ena veidokai e vakaraitaka na iVakabula kei na veika vakalou a yaco ena nona bula vakayago kei na kena e tarava mai me ra goleva na matada, vakasama, kei na yaloda me voleka yani kina Vua. Ni o curuma na veivale ni masumasu oqo me baleta na soqoni kei na itaviqaravi, keimami sureti kemuni ena yalololoma mo ni tu vakadua, vakararai, ka vakasamataka na droini tabu oqo, mo ni raica vata kei ira na luvemuni, ka me rawa kina vei ira me ra vakalevutaka cake na nomu vakila na sokalou kei na vakarokoroko vua na Kalou.

O Apakuki na parofita ni Veiyalayalati Makawa a kaya, “Ia ko Jiova sa tiko ena nona vale tabu: me vakadirorogo e matana ko vuravura kecega” (Apakuki 2:20). Meda sa qai nanuma vakaoqo ni Yalo ni Turaga sa dau tiko ena noda veivalenilotu ka na curuma na yaloda yadua ki na itagede meda vakaitovotaki keda ena vakarokoroko Vua.