iYaloyalo ni Vakabauta
O Sakiusa kei Salote Maiwiriwiri
Suva, Viti
Au sega ni vakabauta rawa na vakacegu kei na marau au a kunea ena nodratou itikotiko na Maiwiriwiri. Dina ga ni sa rua na luvedrau sa takali yani, e rau a bulataka na nodrau bula ena reki kei na inaki ena veisiga.
Leslie Nilsson, Dauveitaba
Salote:
Ni oti e rua na yabaki na nona mate o Esa na neirau gonetagane yabaki rua ena kenisa ni ivi, a mate o luvei keirau yalewa o Esalynn ena mate ni mona. Ena valetabu, au vakila e dua na veivakauqeti kaukauwa me‘u veivosaki kei na dua na marama daukaulotu tiko ka a leqa talega e rua na luvena ena vica na yabaki e liu. A kaya vei au, “Kevaka o na cakava na nomu itikotiko me dua na vanua tabu, o na rawa ni vakilai rau na luvemu e kea.”
Sa mai neirau inaki tiko oqo. Na veika kece keirau cakava me vanua tabu na neitou itikotiko. Keirau gadreva me keirau vakila ni rau voleka sara.
Keirau sega ni kila me keirau itubutubu vakacava vei ira na gone ena daku ni ilati. Ia kevaka keirau cakava na neirau vinaka taucoko me keirau buladodonu, keirau vakabauta erau na vakila na neirau sasaga. Ena neitou lotu vakamatavuvale, keitou dau kidavaki Esa kei Esalynn ena yacadrau.
Ena neitou itikotiko, ena gauna mada ga e basika kina na duidui ni vakasama, keirau dau saga me wali vakatotolo. Keirau vinakata me vanua tabu tikoga na neitou itikotiko ena kena levu ga e rawa. Ena neirau sa mai cakava rawa, keitou sa vakila taucoko na inuinui kei na veivakabulai kei na loloma.
Sakiusa:
Na nodrau takali o Esa kei Esalynn sa vakaveiveivolekatitaka sara na neitou vuvale. Keirau dau veivakasalataki vata kei iratou na vo ni luvei keirau. Keitou dau laki tiko vata vakavuvale e valetabu. Keitou dau bulataka na neitou bula vakarawarawa sara ka digitaka ga na vakavinavinaka ena veisiga. Ni keitou dau veitalanoataka na ibalebale ni kena vauci e dua na vuvale e valetabu, sa yaco na veivauci o ya me ka bula e lomai keitou. Ena loma kece ni veika oqo, keirau dau vakila na nodrau tiko na luvei keirau.
E dua vei ira na imatai ni ka keitou a cakava me yaco na neitou itikotiko me vanua tabu cake o ya na kena tekivu wiliki na iVola i Momani e veisiga. Keirau a tekivuna, ena neirau wasea na italanoa eso mai na iVola i Momani kei na kedra iyaloyalo vei iratou na luvei keirau lalai. Oti sa qai tomani ena vidio. Ia oqo keitou sa wiliwili vakalevu sara tiko mai na iVola i Momani. Au sa vakadinadinataka rawa eke na kaukauwa ni iVola i Momani.
Au sa vakadinadinataka rawa talega na kaukauwa ni yavu ni veivakabulai. Ena neirau sa tuvanaka na cakacaka ni veibulu vei Esa kei Esalynn, keirau a sega ni taurivaka na ivakarau kece ni soqovi ni mate ena itovo vaka-Taukei. Ia, keirau sa qai vosa ga na veiwatini, ka keirau vakamacalataka kina na ituvatuva ni veivakabulai. E vuqa vei ira na wekai keirau vakadra sa mai lewena na Lotu mai na siga o ya ni oti nodra rogoca na dina oqo ena lotu ni veibulu.
A vakavulica o Sakiusa ki na nona matavuvale ni sa sega ni dua na suka ki muri ena bula, e liu ga. “Ena veisiga yadua keitou sa dau vakasavasavataki vakalevu cake tikoga,” a kaya o koya. E ratou bulataka na nodratou bula ena kena rawarawa sara ka raicamatua ga na vakavinavinaka.
E dau kune reki vakalevu o Salote ena nona gauna vata kei iratou na luvena kei na nona vakavulici iratou ena kosipeli.
Sa tiko na nodratou ivakadinadina kaukauwa na vuvale na Maiwiriwiri me baleta na vauci vata ena valetabu. E ratou sa vakamareqeta sara e lomadratou na dina oqo ni ratou dau nanumi Esa kei Esalynn.
Ni ratou raicamatua tiko na bula vakarawarawa kei na toso ga i liu, e ratou sa dau kunea na vuvale na Maiwiriwiri me vakavinavinakataki na nodratou kalougata ena veisiga yadua. “Keitou sa vakavinavinakataka vakalevu na veika sa tu vei keitou,” a kaya o Sakiusa.