Tarovi ni Veivakacacani

Ena veimaliwai bulabula, ena kere veivosoti na tamata ena vuku ni nodra vosa ca kei na ivalavala ka vakararavi ena kaukauwa ni Veisorovaki ni noda iVakabula me vukea na nodra vakatorocaketaki kei na veivutuni. Ia ena veimaliwai dukadukali, era tomana ga na tamata na nodra veivakalolomataki vei ira eso, ka rawa ni yaco na veimaliwai oqori me veivakacacani.

“[Na veivakacacani kei na] ivalavala tale eso e tautauvata e sega na nona tikina e na matanitu ni Kalou,” e vakatavulica oqo o Peresitedi Russell M. Nelson (“iYau Vakayalo,” koniferedi raraba ni Okotova 2019). E vica na itukutuku mai na mekasini ni Lotu ena vula oqo ena vukei keda meda kila ka walia na veivakacacani:

Ena noqu itukutuku ena tabana e 18, au a vosa me baleta na ivakarau ni veivakacacani ka kunea eso na ivurevure me na vukei iko se na tamata o kila me kila ka vakabulai mai na veimaliwai e veivakacacani.
Ena tabana e 58 a wasea e dua na goneyalewa yabaki tini vakacaca na veika a sotava ni a vakacacani vakaveiyacovi ni se gone kei na nona kunea na yaloqaqa kei na kaukauwa me vosa vakadodonu ka vakasaqara na veivuke mai vei ira na uabula nuitaki kei na iVakabula.
Ena iTokani ni vula oqo ena tabana e T12, sa rawa mo raica e dua na itaviqaravi ni volavola me vukea na veivosakitaki na “kaya sega” vei ira na luvemu. Sa rawa mo vakayagataka na itaviqaravi oqo me yavu ni dua na lesoni ni lotu vakamatavuvale baleta na tatarovi ni veivakacacani.•Na veivakacacani ni yalo e rawa talega ni veivakamavoataki me vaka na veimataqali veivakacacani eso tale. Wilika na “Kila na Veivakacacani ni Yalo” ena tabana vakalivaliva ni ilavelave oqo me vulici kina na lima na ivakatakilakila ni ivakaro kei na sala ni kena rawati na veivuke.

Kevaka o sa mavoa, sa rawa mo gole vua na Kalou me baleta na veidusimaki kei na veivakabulai ka segata talega na veivuke mai vei ira na tamata nuitaki. Sa kila vinaka tu na Turaga na veika eda sa vakila tiko ka na tuberi keda o Koya ki na veitaqomaki kei na reki ni da sa gole Vua.

Meda sa qai vakila taucoko na loloma ni Kalou ka gole yani Vua ena veisiga,

Jason Whiting, PhD

Brigham Young University Koronivuli ni Bula ni Matavuvale