Veiqaravi nei Marta e Veisiga
Na marama tina oqo kei na luvena yalewa e rau cakacaka vakaukauwa me rau bulataka vata na kosipeli. Ka sa rawa vei Marta me bulataka ena nona qaravi tinana ena sala totoka.
iTaba mai vei Leslie Nilsson
O Marta e dua na yabaki 11 mai Portugal, me vakataki ira e vuqa na goneyalewa ena yabaki ni nona bula, e dau taleitaka na veimaliwai vata kei ira na nona itokani, kania na kakana, ka qito vata kei ira na nona matakau. E dau taleitaka talega na vakayagataki gauna vata kei tinana. Ia na bula vata kei tinana sa kena ibalebale ni o Marta e bula duidui vakalailai mai na so tale na gone.
Na tinai Marta, o Sonia, a sucu vata kaya mai na malumalumu ka dredre kina vua me taubale. E sega sara ni paralase vakataucoko, ia ena gadreva okoya me dua na itoko ni yavana. E sega ni rawa ni vakaisulutaki koya ga, vakasilimi koya, se vakadavori koya me moce. Oqo e dredre sara kina vua na bula taudua. A qaravi Sonia rawa o Marta ena vica na yabaki sa oti oqo ena nona vukei koya ena veika a sega ni cakava rawa vakai koya.
“Au dau samaka vinaka na noqu tikina me rawa vei Na me veitosoyaki vakarawarawa,” a kaya o Marta. “Kau dau cegu talega mai na qito meu rawa ni laki raici Na ke gadreva na veivuke. Kevaka au sa qito ke kaci mai, au na lako vakatotolo baleta ni rawa me dua na ka bibi.”
Ia sa dau saga o Sonia me dau bula galala ga o Marta ena kena e rawata. Kevaka e sega ni gadreva na veivuke o Sonia, sa dau raica me na qito talega o Marta kei ira na nona itokani.
Nodrau Bula ena Vakabauta
Sa madigi nei Marta me bulataka na kosipeli ena veisiga yadua ena nona qaravi tinana. Sa dau vakaitavitaki koya vakalevu cake maivei ira na gone tale eso. Me kena ivakaraitaki, e dau yadra vakamataka lailai me vukei tinana me vakarau laki cakacaka ni bera na vuli. Ni sega na veivuke nei Marta, a sega ni rawa vei Sonia me veitosoyaki se laki cakacaka e veisiga.
E rau dau laki lotu vata talega o Sonia kei Marta. A papitaiso o Sonia ni se qai yabaki walu, ka sa tubu cake tiko ena Lotu o Marta. E vakavulica o Sonia vei Marta me baleta na bibi ni kosipeli ena veisiga. E dua na sala a cakava kina oqo o ya ena kena tu e vuqa na iyaloyalo kei Jisu Karisito ena nodrau itikotiko.
“Au kila ni bula tiko na Kalou ka sa bula dina tiko o Jisu Karisito,”a kaya o Sonia. “Ia au vinakata o ira kece era lako mai ki na noqu vale me rawa ni kila ni sa ka bibi sara vei au na vakabauta. Sa bibi talega me‘u na vakavuvulitaka kina oqo vei Marta me na tubucake tiko ena kila-ka oqo i Jisu Karisito.”
Sa mai ciqoma o Marta na veika sa vakavulica vua o tinana ka sa tomana tiko nona vulica vakalevu cake vakai koya na kosipeli. E dua na sala e taleitaka kina na vuli o ya ena nona wilika na ivolanikalou, ka vukei koya me kaukauwa cake na isema ni veiwekani kei Tamada Vakalomalagi kei na iVakabula. “Ni‘u sa wilika na ivolanikalou, au vakila ni Karisito sa tu e yasaqu,” e kaya o koya.
Kunea na Vakacegu
Dina e rawa ni dredre na itavi lelevu eso, na lako tiko ki Lotu ena veimacawa ena vukei Marta me kunea na vakacegu e gadreva me tomana tiko nona vukei tinana. “Ni ra cavuta na masu mai na itekivu kei na itinitini ni soqoni ni sakaramede, sa veivakacegui dina” e kaya o koya. “Ni‘u tiko e kea, ena so na gauna au vakila na Tamada Vakalomalagi ni tukuna tiko vei au ni’u dua na tamata vinaka ka sa dodonu meu tamata vinaka tikoga meu vukei tinaqu tiko.”
Ena gauna e dau vakila kina vakaoqo, sa ivakananumi vua ni sa vakavinavinakataka vakalevu na tinana. E vakila ni o Tamada Vakalomalagi sa talai ira mai na agilosi me ra tokoni koya tiko. “Au vakabauta ni o Koya sa vakaukauwataki au meu dau yadra cake ka marautaka ka doka ni tiko na tinaqu,” e kaya o Marta.
E dua vei ira na lesoni rau sa vulica vata o Sonia kei Marta o ya ni bula e sega ni rawarawa se vinaka sara—ki na tamata yadua. E kaya o Sonia, “E sega ni dua vei ira na noqu veika dredre e cakava meu rarawa. Au kila ni Kalou sa solia vei au oqo na lewe kei na dra kei na sui vakaoqo baleta niu sa digitaki, ka kaya vei au na Kalou niu rawa ni cakava. Au na cakava na noqu vinaka taucoko. Au rawa ni cakava vakalevu cake, ia nikua au sa vinaka tu vakai au. Au doka na veika au sa cakava tiko, na ka sa tu vei au, kei na veika au na cakava ni mataka.”
Sa kila talega kina o Marta ni na vinaka na veika kece, dina ga ni bula ena dredre sara ena so na gauna ena nona qarava tiko na tinana. E raica ni tu vei keda kece na bolebole duatani. “Sega ni dua na bula e uasivi sara,” e kaya o koya. Ia ena nona ibolebole vakai koya, se raica tikoga o Marta na veika vinaka e veigauna kece sara—na nona veimaliwai tiko kei tinana sa dua na kena ivakaraitaki. “Na tinaqu sa yalani na nona bula vakayago, ia na nona vakasama kei na lomana sa yalomatua sara. Keirau sa veiitokani vinaka dina.”
Rai ki Liu
Sa qai cava beka e tu ena nodrau veisiga ni mataka o Marta kei Sonia? A kaya o Marta, “Au via volekata tikoga na tinaqu, ia e dina sara niu na vinakata me‘u vakamau, vakaluveni, ka dua na noqu vuvale. Ia ena veisiga ni mataka, kevaka au rawata, au vinakata meu volia e dua na vale me baleta na noqu vuvale kei na tinaqu baleta au sega ni vinakata me‘u yawa sara mai vua ena dua mada ga na siga!”
Sa nanamaki tale tikoga o Sonia baleta na veisiga ni mataka kau sa vakavinavinakataka na veitokani nei Marta kei na nona loloma. “E veivakurabuitaki ni dua na luvequ yalewa totoka vakaoqo. Sa rui totoka dina ni tiko o Marta ena noqu bula. Sa isolisoli o koya mai vua na Kalou. A vakarautaki Marta me mai tiko vata kei au.”