Na iOtioti ni Vosa
Noda iNuinui, Noda Rarama, Noda Kaukauwa
Mai vei Elder Ronald A. Rasband
Ena Kuoramu ni iApositolo Le Tinikarua
Mai na dua na Bogi ena Dua na Kakaburaki ni Vakaitutu Raraba me baleti ira na qasenivuli ni Lotu ka a vakayacori ena ika 8 ni Fepe., 2019.
Ena gauna au a tabaki kina meu dua na iApositolo, a cavuta kina o daulomani Peresitedi Thomas S. Monson (1927-2018) niu sa dua na ivakadinadina bula digitaki ni yaca i Jisu Karisito e vuravura taucoko. Au sega ni taura vakamama na ivakaro oya. Au wilika ka vulica na ivolanikalou meu kila na Turaga ena Yacana kei na itutu. O ira kece oqo kau na wasea vei kemuni era tauri mai na veitikina ena ivolanikalou ka vakananuma vei keda na noda inuinui sa tu Vua.
O koya na iNuinui kei Isireli (Jeremaia 17:13), Kalokalo i Vola Siga e Serau Tu (iVakatakila 22:16), na iVakatawa Vinaka (Vunau kei na Veiyalayalati 50:44), iVakavuvuli (Aisea 9:6; 2 Nifai 19:6), Na Tui ni Sautu (Aisea 9:6; 2 Nifai 19:6), Dauveisereki (Roma 11:26), Na Rarama kei Vuravura (Joni 8:12), ka Bete Levu ni veika vinaka ena yaco mai (Iperiu 9:11). Sai koya na Qaqa me ia na veivakabulai (Alama 34:18; Vunau kei na Veiyalayalati 133:47) ia sai Koya sa tu vua na kaukauwa kecega (Vunau kei na Veiyalayalati 61:1).
Nona veivakayarayarataki, ivakatakilakila, kei na Nona iyalayala na Karisito e kovuta na ka kecega. E tu o Koya ni da lutu ka segata me da toso ki liu. Kevaka eda sikalutu, na Nona “rarama sa cilava na butobuto” (Vunau kei na Veiyalayalati 6:21) sa ramase vakalevu cake. E lomani keda o Koya ena noda gauna serau duadua kei na gauna butobuto duadua.
Na tisaipeli i Jisu Karisito e sega ni cakacaka vakabekataki. Na Nona salatu e vakatakilakilataki tu vakavinaka ena imawe ni Yavana. Ni da muri Koya, sa yaco me da lomana na veika e lomana o Koya. Ni da vakavouya na noda veiyalayalati vata kei Koya ena vakayagataki ni sakaramede tabu ena veimacawa, eda na tubu ena kilai Koya ni sa Dauveivueti kei vuravura (Vunau kei na Veiyalayalati 93:9), na Yalo ni ka Dina (Vunau kei na Veiyalayalati 93:9), kei na Vosa (Vunau kei na Veiyalayalati 93:8).
Kemuni na noqu itokani, sai Koya oqori na iVakabula au sa kila, o koya au sa lomana ka’u sa vakarokorokotaki Koya ena yaloqu taucoko. Au vakadinadinataki Koya mai vu ni yaloqu ena Nona vinaka kei na loloma cecere. Sa yalataka o Koya, “dou sa wekaqu, ni na tiko na nomudou ivotavota vakawa vata kei au” (Vunau kei na Veiyalayalati 93:45).
O Jisu Karisito sa dau isau ni taro ki na leqa kei na bolebole era tiki ni bula oqo. Ni da kila na Nona itavi kei na Nona kosipeli, ena vakaukauwataki keda na noda lomani Koya, kei na noda vakabauta kei na noda vakararavi Vua.