Na iVakavuvuli ni Veiqaravi

Veiqaravi ena Parokaramu ni Gone kei na iTabagone

Sureti ira eso tale me ra tubu ka vukei ira ena ilakolako oqo sai koya na isaluwaki ni veiqaravi.

iTaba maivei Tom Garner

Na madigi sa kovuti tu baleta na veiqaravi ena parokaramu ni Gone kei na iTabagone. E rairai era tiko o ira na nomu gone se itabagone ena nomu vale. E rairai o dua na iliuliu ena parokaramu se ko dauveiqaravi vei ira na matavuvale era vaka-gone kei na itabagone. Se e rairai sa kilai ira tiko eso na gonelalai kei na itabagone (e dodonu me kovuti keda kece oqori). Se cava ga na kemu ituvaki, e vuqa tu na sala me vakayagataki kina na parokaramu se na kena ivakavuvuli me vakalougatataka na nodra bula na tani.

Vakatorocaketaki Keda Vata

Ena utodra na Gone kei na iTabagone sa raicimatua kina na kena tovolei ena veisiga meda yaco meda vakataka na iVakabula, ka a veiqaravi vakavinaka sara. E vuqa vei ira era a vakaitavi ena parokaramu sa kila tu ni na levu ni nomu toso ki liu ena veiyasa eso ni nomu bula, o na vakaiyaragitaki vakavinaka cake mo vukea se dauveiqaravi vei ira na tamata.

Ia ena parokaramu ni Gone kei na iTabagone, vakalougatataki ira tale eso ena sega ni gadrevi me wawa me yacova ni o sa vulica e dua na ka. Na ivalavala ni vulici koya ga vakataki koya e vakarautaka na madigi mo veiqaravi kina.

Me baleta e dua na cauravou na yacana o Parofita e tiko mai Ghana, na vakadavori ni takete vei ira na Gone kei na iTabagone me ra vulica na iwalewale ni vakatagitaka na piano sa kena itekivu walega. “Sa noqu inaki meu vukei ira talega eso tale na tamata mera kila na cava au sa vulica tiko,” a kaya o Parofita.

E dina ga ni se bera ni dua na dauveivakavulici, na nona takete sa tubu ki na kena e levu cake sara mai na kena e sega ni mudu rawa ni raitayalotaka. Sa tu kina qo e 50 na gonevuli e tauri kalasi ni taba piano e valenilotu vata kei Parofita. Ia o cei sara mada e vakavulici Parofita tiko kei na 50 na gonevuli oya? Alexander M. kei Kelvin M., rau yabaki 13. “Keirau vinakata me vakaraitaki na ivalavala ni yalovinaka vei ira tale eso,” e kaya o Kelvin.

Ena tolu na siga ni dua na macawa e rau vakavulica na rua na itabagone oqo na lesoni ni taba piano vei ira era via vulica ka sega ni saumi. E sa dua tiko na ikuri ni kalougata ena lesoni ni taba piano oqo. E vica na gonevuli era sa vakaveikilaitaki ki na Lotu mai na lesoni ni taba piano, e muri era sa vulica na ivolanikalou ka mani nanuma mera sa papitaiso.

Ni da sasaga meda vakatorocaketaki keda, eda rawa ni veiqaravi kina kivei ira tale eso ena noda sureti ira me ra mai duavata kei keda.

iTaba mai vei Jonas Rebicki

E Dua na Gacagaca Qaqa ni Veiqaravi

Ni peresitedi tiko ni Lalai ena iteki, sa raica rawa o Sabrina Simões Deus Augusto mai Curitiba e Brazil, na kena sa veivakalougatataki tiko na ituvatuva ni vakatorocaketaki ni tamata yadua ena parokaramu vei ira na gone kei na itabagone ena nona iteki. Ia sa raica talega o koya e vuqa tu na sala me ra vakayagataka na veika sa vulica me baleta na torocake yadudua ena nona ilesilesi vakamarama dauveiqaravi.

“Ni‘u vakatorocaketaka e dua na taledi,” e kaya o Sisita Augusto, “Au rawa ni vakayagataka na taledi oya me vakalougatataki kina e dua au qarava.”

A vakavulica o Sisita Augusto e dua na marama a lesi kina me vulica na caka bisikete jokeliti. Ena gauna oqo sa cakava ka volitaka tiko na marama oqo na bisikete me vukea na ilavo ni nona vuvale. “Ni oti e vica na vula, au a kalougata ni dua tale na marama a vakavulici au meu cakava na madrai oni meu na volitaka,” a kaya o Sisita Augusto. “Na tarai cake ka wasei ni noda taledi ena rawa me vakalougatataka na noda bula vakai keda ka vakatitobutaka na keda isema na marama dauveiqaravi.”

Ena Vukei Iko Vakacava na Parokaramu ni Gone kei na iTabagone mo Veiqaravi?

1. Sureta eso me ra mai vakaitavi ena parokaramu ni Gone kei na iTabagone.

   Sa rawa mo sureta na matavuvale ni itabagone kei na gone o veiqaravi tiko kina me ra mai vakaitavi ena parokaramu ni Gone kei na iTabagone. Era rawa ni taleitaka me ra vakaitavi ena itaviqaravi, veivakatorocaketaki vakatamata yadua, se ivakarau ni vulica na kosipeli ena parokaramu oqo. (Me baleta na ikuri ni ivakamacala me baleta na veiqaravi ena Lako Mai, Mo Muri Au, raica na “Veiqaravi ena Lako Mai, Mo Muri Au,” ena Sepiteba ni 2020 ni Liaona.)

2. Tokona na nodra takete.

   Ni ko sa turaga se marama dauveiqaravi vei ira na matavuvale kei na nodra itabagone, sa nomu itutu dina oqo mo tokona na takete era na rairai cakacakataka tiko vei ira na Gone kei na iTabagone. Me vaka ga ni nodra takete sa dui nodra, kevaka o kila na veika era taleitaka, sa rawa mo veivuke yani ena vuqa sara na sala. Oqo ena rawa ni taura na ituvaki ni kena kunei na iyaya ni cakacaka era vakasaqara tiko, rawa ni ko daunilewa ena nodra buli kuki, se mo dauveituberi ena vanua o kenadau kina. O kila beka na sala me veisautaki na waiwai ni motoka? Cula na isulu kadresu? O kenadau beka ena veivakatarogi me baleta na cakacaka? Sa rawa mo wasea nomu vuku se kila-ka kevaka era taleitaka.

3. Sureta eso tale me ra mai tiki ni nomu bula torocake.

   E sega ni maroroi na torocake yadudua vei ira na gone kei na itabagone. Sa rawa mo vakaitavi ena parokaramu ni iko se cava ga na nomu yabaki ni bula. Ni ko vakayagataka na gauna me torocake kina na nomu bula vakayalo, veimaliwai, vakayago, kei na vuku ni bula raraba, o sa na vakavakarau vakavinaka kina mo veiqaravi yani ki na tamata yadua, se o cei ga o sotava. Ia, me vakataki Parofita mai Ghana, sa rawa mo vakalougatataki ira eso ena nomu sureti ira me ra vakaitavi vata kei kemuni, se ena vakarautaki na lesoni ni taba piano, lako ki na dua na kalasi ni veivakaukauwataki se vulica vata e dua na vosa.

4. Cakava na veiqaravi me dua na takete.

   Sa rawa mo vakayagataka na gauna ni veiqaravi ena veisiga yadua. Sa rawa oqo ena kena vakau na teks se veisiko vakalekaleka me laurai sa vakacava tiko na bula se tuvai e dua na kana vata. E rawa me okati kina na tuvai ena volanivula na veisiganisucu o ira o veiqaravi kina se vakamuri ira ena itukutuku raraba me kilai na veika era taleitaka se cava era sa cakava tiko. Ke lima mada ga na miniti nomu vakasamataka nodra gagadre eso sa na veimuataki ki na vakasama veivakauqeti e rawa ni caka veika vovou.

Vakayadudua

Dua na ivakaraitaki ni Nona Lotu dina ka bula tiko ni Turaga o ya ni na dau tuvai tu na sasaga ni veiqaravi kivei ira na luvena yadudua na Kalou kei na nodra dui matavuvale. Baleta ga ni sa Nona Lotu, oi keda sa Nona italai eda na qarava yani e dua, me vaka ga a cakava o Koya.”

Russell M. Nelson,“Veiqaravi ena Kaukauwa kei na Lewa ni Kalou,” Liaona, Me 2018, 69.

Wasea na Veika o sa Sotava

Vakauta mai na veika o sa sotava ena veiqaravi se sa qaravi kina. Gole ki na liahona.ChurchofJesusChrist.org ka kilikitaka na “Submit an Article or Feedback.”