Sa Rawa Mo Kunea Na Galala

O iko se e dua o lomana a coriti ena cowiri tiko ena caka cala, veivutuni, tuvatuva vou tale, ka caka cala tale? E vuqa na itabagone qasecake totoka au a cakacaka vata kei ira niu a se bisopi tu ni tabanalevu ni itabagone qase cake era a coriti ena mataqali cowiri vakaoqo. Ia e vuqa era a kunea na bula galala mai na Veisorovaki i Jisu Karisito. Na itukutuku me baleta na vakatotogani ena iwasewase ena vula oqo e solia na vakasama e veivuke sara vakalevu ena kena kunei na bula galala—ena vukumu kei ira tale eso.

Na ka bibi duadua e dodonu me da nanuma tiko o ya ni oi keda kece eda sa luvena daulomani na Tamada Vakalomalagi. E vakavulica o Elder Dieter F. Uchtdorf, “[Na Kalou] sega ni waraka me qai lomani iko ena gauna o sa vakamalumalumutaka rawa kina na nomu malumalumu kei na itovo ca. E lomani iko nikua ka kila vakavinaka tu na nomu veidredre. … E kila na nomu yaluma ena veigauna o yacokoso kina se sega ni rawata.. Ka sa lomani iko tikoga o Koya“ (”Bulataka na Kosipeli ena Reki,“ Liaona, Nove. 2014, 123; vakamatatataki).

Ena yasana kadua, ena tovolea ko Setani me vakauqeti kemuni ni ko ni sa mai taudaku ka na vakuwai mai na loloma nei Tamada Vakalomalagi kei na kaukauwa ni iVakabula me veisautaka ka vakasavasavataki iko. Ena tovolea o Setani me biuti iko tu ena dua na waitavikoviko ni madua kei na vorati iko vakaiiko, ia mo kakua ni vakabauta na nona lasu.

Ia, mo gole vua na Tamada Vakalomalagi. Kakua ni rere mo dolava na yalomu vei nomu bisopi se peresitedi ni tabana kei ira era lomani iko. Ni o wilika na italanoa ni inuinui maivei ira na qasecake tale eso era a vakacacani ena vakatotogani, mo cakacakataka sara na veivakauqeti o sa ciqoma. Mo toso vakamalua, nanuma tiko na kemu ituvaki vakalou, taura vakayadudua na siga yadua, ka vakabauta na kaukauwa ni veivakabulai nei Jisu Karisito. Ena vukei keda o Koya kei na vuqa na ivurevure meda rawa ni kunea na bula galala eda gadreva tu. Mo kakua ni guce.

Nomu itokani,

Richard Ostler

Mai vei ira na iLiuliu ni Lotu

“Nanuma dei tiko, ena veivuke ni iVakabula, ena rawa kina mo vagalalataki iko mai na vakatotogani. Ena rairai gaunisala balavu beka, ka dredre, ia na Turaga ena sega ni soro vakadua me baleti iko. Sa lomani iko o Koya. A vosota o Jisu Karisito na Veisorovaki me vukei iko mo veisau, me sereki iko mai na ivesu ni ivalavala ca.

“Na ka bibi duadua me da tovolea tikoga—ena so na gauna ena taura e vica na sasaga ni bera ni ra qai rawata na qaqa na tamata. Mo kakua kina ni soro. Kakua ni yali nomu vakabauta. Vakavolekataka na yalomu vua na Turaga, ka na solia vei iko ko Koya na kaukauwa ni veisereki. Ena vagalalataki iko o Koya.”

Elder Dieter F. Uchtdorf ena Kuoramu ni iApositolo Le Tinikarua, “O Moce Tiko Beka ena Gauna ni Veivakalesui Mai?” Liaona, Me 2014, 61.