Taro kei na Kena iSau

“Meu na dau vorata rawa vakacava na yalo galili?”

Veitaba o Kay Lynn Hodges

Vakatorocaketaka Na Nomu Taledi

Au dau ulabaleta rawa na yaloqu galili ena noqu vakatorocaketaka na noqu taledi, ena dua na iyaya ni vakatagi, dua na qito taleitaki, kei na kena tale eso. Oqo ena vukea me vagolea laivi mai vei iko na yalo galili, ka vakawasoma e na lako tani sara vakadua. Oqo ena muataki iko mo kunei ira na tamata ka ra wasea kina na veika o taleitaka.

Steven H., yabaki 12, e New Mexico, Amerika

Vakasaqara na Rarama

Au sa vakasaqara na veitokoni, veivakayaloqaqataki, kei na loloma ni Tamada Vakalomalagi kei na Yalo Tabu me solia vei au na vakacegu, na inuinui, kei na kaukauwa niu vakasamataka vakatitobu, masu, kei na wili ivolanikalou. E tukuni kina ena 3 Nifai 11:11, ni o Jisu Karisito “na rarama kei na vu-ni-bula kei vuravura.” A lako mai me kauta tani na butobuto kecega.

Andrea B., yabaki 18, Zulia, Venezuela

Dolele yani vei ira na itokani kei na matavuvale

Niu dau galili, au dau vinakata me‘u na dodoliga yani vei ira na noqu itokani kei na matavuvale; ni vakavuna sara ga vei au na marau. Au na raica mada na veivakalougatataki ki na noqu bula ka vakavinavinaka vua na Tamada Vakalomalagi ena vuku ni veika lelevu sa solia oti tu vei au!

Talli N., yabaki 16, Oregon, Amerika

Nanuma Tiko na iTuvatuva ni Kalou

Meda kila tiko ni mai na ituvatuva ni Kalou, eda sa ka kecega ia eda sega ni galili. Sa dau tiko kei keda na Yalo Tabu, ka sa kila tiko na Kalou na veika dredre eda sa sotava tiko. E a lako curuma na Turaga na veivakatovolei kei na dredre kece o sotava. E dua na ka bibi duadua ni veika eda vakila ena bula oqo sai koya na marau, ia eda sega ni rawa meda bula marau ke sega na rarawa (raica na 2 Nifai 2:11). Masu vua na Kalou ka kerea na veivuke; ena sega ni guce o Koya vua e dua vei keda.

Brock S., yabaki 17, Utah, Amerika

Nuitaka na Turaga

Na noqu biubiu mai vale meu mai kaulotu ki Brazil a ka dredre. Au a sega mada ga ni kila na nodra vosa! Ia au sa vulica ni kevaka e tiko na Yalo ni Turaga vei iko, o na sega vakadua ni galili. E kilai iko ka na dau vukei iko o Koya. Nuitaki Koya!

Elder Joseph Tolen, yabaki 20, Tabana ni Kaulotu e Brazil Campinas

“Na mosi ni galili sa vaka me tiki ni bula oqo. Ia ena Nona loloma cecere na Turaga sa mai vakarautaka meda kakua ni sotava duadua na bolebole ni bula oqo. … E sa yalataki vei keda na veitokani wasoma ni ikatolu ni Lewetolu Vakalou vakakina na dodonu meda ciqoma na ivakatakila me baleta na noda dui bula. Eda sa sega ni tiko duadua!”

Sheri L. Dew, daunivakasala e liu ena Mataveiliutaki Raraba ni iSoqosoqo ni Veivukei, “Eda sa Sega ni Tiko Duadua,” Liaona, Jan. 1999, 112.

Na Cava Na Nomu Nanuma?

“Na cava meu cakava kevaka au sa veivutuni ka sega ni rawa ni tarova na noqu vakasamataka tiko na veika cala au a cakava?”

Vakauta na nomu isaunitaro vakakina, ke gadrevi, e dua na itaba totoka sara ni bera na 15 ni Noveba, 2020, ena liahona.ChurchofJesusChrist.org (kiliki ena “Submit an Article or Feedback”).

Sa rawa ni moici na sausaumi ena kena balavu se kena matata. Na itukutuku era tabaki sa navuci me veivuke ka vakainaki, sega ni ra tukutuku dei ni vunau ni Lotu.

• Kena Dina