Kevaka au sotava tiko na ibolebole ni mate ni vakasama, e se rawa tiko beka ga meu laki kaulotu?

Io. O ira kece era sa “gadreva mo dou qarava na Kalou … dou sa lesi ki na cakacaka” (Vunau kei na Veiyalayalati 4:3). Na vanua eda veiqaravi kina sa sega soti ni bibi mai na ivakarau eda veiqaravi kina. Kevaka e dua e vakasamataka tiko me laki veiqaravi vakadaukaulotu ena raici vakabibi taumada na nodra bula vakayago kei na vakasama.

Kevaka o sa gadreva tiko mo laki kaulotu, mo veivosaki kei nomu bisopi. Sa rawa me vukei iko o koya me tekivu na nomu ivola ni kerekere. E dua na tiki ni iwalewale oqori ena oka kina na veivosaki kei ira na vuniwai kei na so na kenadau vakaivola, ka vakakina o ira na iliuliu ni Lotu kei na itubutubu. Na veivakasalataki oqo e sega ni kena inaki me vakadikevi kina nomu “vinaka” me baleta na Turaga ia me vukea me vakadeitaki kina na digidigi vinaka duadua ni nomu veiqaravi.

Na veikacivi ni veiqaravi ena rawa ni yaco vua e dua e gadreva tu me veiqaravi. Na ilesilesi o ciqoma mo veiqaravi ena dua na vanua se ena sala digitaki ena rawa ni vakatau ena veika e vuqa. O ira na tamata era bolei tu ena veika dredre ni tiko bulabula (oka kina na bulabula ni vakasama) ena so na gauna era saga mera tarova na itukutuku oqo ena ivola kerekere, ni ra nanuma ni na vukei ira me ra ciqoma na ilesilesi era vinakata. Ia kevaka sa taucoko na nomu dina me baleta na nomu itukutuku vakavuniwai (oka kina na tiko bulabula ni vakasama), ena vakalougatataki iko na Turaga. E namaka tiko mo cakava na veika kece o rawata mo vakavinakataka kina na nomu bula. Ia e vuqa na veitokoni vakavuniwai o ciqoma mai vale e rawa ni vakayacori tikoga ena buturara ni kaulotu.