Na Sala Au a Vakabulai Rawa Kina Mai na Veivakacacani ni Veiyacovi
Au a dau bulavoli ena tatadra rerevaki. Ia e muri, au sa vulica kina ni ena noqu gauna butobuto, au rawa ni nuitaka tiko na noqu iVakabula.
iTaba mai na Getty Images, vakayagataki me vakadroinitaki, vakaraitaki mai na dauivakaraitaki
A tekivu na noqu tatadra rerevaki niu se qai yabaki vitu ga ka sa vakawati tale o tinaqu. Keirau a taleitaka sara na tamaqu vou vakacabecabe. A tamata dauloloma ka sema vinaka sara mai ki na neitou vuvale. Au kila niu taqomaki niu tiko voliti koya. A vinaka sara na veika kece me yacova e dua na siga, ni sa osooso kece tiko na tamata, a qai vakacacani au vakaveiyacovi.
Au a sega ni kila na ibalebale ni ka a cakava vei au. Au a vakila na rere, veilecayaki, ka madua vakalevu. Ia au a rere vakalevu meu tukuna vua e dua. Au nanuma ni na vakacacana na marau vou ni noqu vuvale ka na sega ni dua ena vakabauti au mada ga. Au sa qai nanuma meu tiko lo ga.
A vakamavoataka na yaloqu ena gauna ga o ya, ia na vakanananu ni veivakacacani o ya sa dau bika tu ga na noqu vakasama. Sa mani yaco meu sa nuiqawaqawa vakalevu ni rawa vua e dua me na raica rawa na noqu rarawa ka vakatakila na noqu ka vuni niu a saga meu vunitaka na ka dina ena noqu via veitokani vinaka kei tamaqu vakacabecabe. E dau lomani au vakabibi o koya, kau sa tekivu taleitaki koya tale.
Ia sa qai tekivu me ca vakalevu na ka e vale. Ni sa tekivu cakacaka o Nana ena bogi, sa tekivu vakacacani au tale ena gauna eso o tamaqu vakacabecabe. Sa sega ni rawa meu cakava e dua na ka. Au sa vinakata meu tukuna, ia sa dau taleitaki vei ira na tamata o tamaqu vakacabecabe, kau nanuma ni ra na totaki koya. Ia ena bogi niu dau tiko taudua, au sa dau kerea na Kalou me vukei au meu maroroya na noqu ka vuni.
Tukuna Yani
Dua na siga sa mudu vakadua na veivakacacani oqo. Au a sega ni kila na cava na vuna. E dina ga ni sa sega tale ni vakalolomataki au, au dau vakila tikoga na noqu dukadukali kei na madua. Au sa cati au. Ena so na gauna au sa veidutaitaka ke sa rawarawa cake na mate mai na noqu bula tiko. Au se vinakata tikoga meu tukuna yani, ia au se rerevaka tikoga na cava ena cakava na ka dina.
Ia ena dua na Siga Tabu e valenilotu niu sa yabaki 14, au a vakarorogo ki na dua na lesoni me baleta na cakava na vakatulewa lelevu. A vakayaloqaqataki keimami na noqu qasenivuli me keimami lolo ka masu ka yalataka vua na Kalou me vaqaqacotaki keimami me keimami cakava na ka dodonu. Ni oti na Lotu, au sa vakasamataka tikoga na veika a kaya o koya. Au a vakataroga se kevaka me‘u na kerea, ena rawa beka me vukei au dina na Kalou meu na tukuna?
Ena siga ka tarava au a lolovaka meu yaloqaqa meu laki tukuna vei Nana me baleta na veivakacacani. Au a sega ni rawa ni vakarorogo vinaka ena gauna ni vuli niu sa vakasamataka tikoga na ka ena kaya o tinaqu. Ena gauna au sa yaco yani kina e vale, au sa tauvimate bibi sara ga. Au a masulaka tale meu vakaukauwataki, ia au se sega ga ni tu vakarau meu tukuna vua.
Ena yakavi bogi oya, au a gole yani vei Nana ni sa vakasaqa vakayakavi tiko. Au sega ni kila na cava me‘u tukuna, ia ni’u raica yani na yaloka ni matana, au sa yaloqaqa sara meu sa tekivu vosa ga yani. Niu sa tekivu, na veika kece au a vunitaka tu ena veiyabaki o ya a ceburaki mai tuba.
O au kei tinaqu keirau sa qai dabe toka ga ena idabedabe ka veitagicaki. Ni oti o ya, keirau sa qai veitaratara yani vei neimami peresitedi ni tabana ka qirita na ovisa. Sa mai beitaki o tamaqu vakacabecabe ena veika a cakava vei au, ka sa yaco me soli vei au na veitaqomaki au a gadreva tu—sa sega tale ni gadrevi meu na raici koya.
Na Sala ki na Veivakabulai
Ena gauna oya, a dredre sara na nona tokaruataka na veika au sotava vei ira na iliuliu vakaitutu kei na nodra taroga na noqu itokani sa evei o tamaqu vakacabecabe, ia ena veitokoni ni noqu vuvale, sa sega tale niu tu taudua. Ena duavata, keitou sa mai umani vata ena dua na itoko vou ni vuvale: “Au sa rawata na ka kecega ena vuku i Karisito o koya sa vakaukauwataki au” (Filipai 4:13). Era sa lomani keitou talega mai na wekai keitou vakadra kei na veitokoni, ka yaco na gauna, me keimami sa veivakabulai vata tiko.
Keirau sa qai lako vakaveitinani me vakasalataki maivei ira na kenadau, ka sa veivuke vakalevu sara. O noqu daunivakasala sa kena sara ga au a gadreva tiko. A vukei au me‘u kila vakavinaka kece na ituvaki ni yalo au a vakila tiko ka vukei meu taqeya rawa na noqu vakanananu ca. Au a sega ni kila na levu ni mavoa ni yaloqu me yacova niu sa tekivu vakila niu sa taucoko tale tiko.
Au a sega ni nanuma ni na takali yani na mosi me baleta ga niu sa tukutuku, ia au a sega talega ni kila na levu ni gauna (kei na vosota) ena taura me yaco meu na vakabulai. Sa dua na gauna balavu, niu a vakila tu niu a tawayaga. Au a vulica tale meu lomani au mada.
Au kunea na vakacegu levu sara ni‘u sa mai gole ki na noqu iVakabula kei na Tamaqu Vakalomalagi. Niu sa kila ni Rau sa kila vinaka sara ga na veika au a vakila sa solia vei au na kaukauwa kei na inuinui. Au sa vakararavi kina ena veigauna butobuto duadua. Ni toso na gauna sa tekivu me seyavu yani na vakanananu o ya, kau sa vakila dina sara na vakacegu mai na loloma ni iVakabula.
E dua vei ira na tiki ni veidolei ni cakacaka ni veivakabulai o ya na kena kilai ni sa tu vei au na veisiga ni mataka rarama. Ena gauna au sa vakacacani tiko kina, sa sega mada ga ni rawa meu raitayalotaka e dua na ivakarau dina ni bula. Au vakila ni‘u sa kavoro vakadua. Ia mai na veivuke kei na veivakabulai, au sa raica rawa na veika meu na vakanamata kina. Au sa tekivu tukuna na noqu italanoa ki vua tale eso na goneyalewa sa mavoa tu na yalodra, kau sa mani lewa meu sa na kaulotu. Niu wasea na noqu ivakadinadina vei ira na tamata e dau vakaukauwataki au.
Au sa sega ni vakaituvakitaki donu ena veika a cakava vei au o tamaqu vakacabecabe. A veisautaka vakadua o koya na noqu bula, ia au sa digitaka meu vakayagataka na veika au a sotava meu vukei ira kina eso. Eso na siga e dau dredre mai, ia ena loma ni veika kece, sa vakaukauwataki au na Turaga, kau kila ni na tomana tikoga o Koya me vukei au. Au sa vakavoutaki mai na tamata a vakacacani ki na dua na tamata sa vakabulai.