Kevaka o sa Vakaleqai ena Veivakacacani

Na Cava na Veivakacacani?

Na veivakacacani sai koya na vakaweleweletaki se nodra vakalolomataki o ira na tamata (me vakataka e dua na gonelailai, dua na tamata qase, dua e vakaleqai tudei tu na yagona, se dua tale vakaoqo) ena sala e vakavuna na mavoa ni yago, yalo, se yago tabu vakatagane se vakayalewa. E sa veisaqasaqa kei na nona ivakavuvuli na iVakabula.

“Na itutu ni Lotu e sega ni rawa ni vosoti na veivakacacani ena kena ivakarau cava ga” (iVoladusidusi Raraba: Veiqaravi ena Lotu i Jisu Karisito ni Yalododonu Edaidai [2020], 38.6.2). Na veivakacacani e voroka na lawa ni Kalou ka na rawa talega ni na voroka na lawa ni vanua.

Na Veimataqali Veivakacacani

Na Veivakacacani Vakayago: Na kena nakiti na ivalavala e vakasaurara se kaukauwa mai vua e dua kivua e dua tale e yaco kina na mavoa ni yago.

Na Veivakacacani ni Veiyacovi: Na veicakacaka ni veiyacovi sega ni vinakati se veitaratara, maivei ira era vakayagataka na kaukauwa, veivakarerei, se taura vakailowa na dodonu ni dua na tamata era a sega ni solia na nodra veivakadonui. Na veicakacaka ni veiyacovi kece sara vei rau e dua na qase kei na dua na gonelailai sa oka me veivakacacani veitalia ga ke soli na veivakadonui.

Na Veivakacacani ena Vosa se Vakasama: Oqo e dua na ivakarau ni itovo ni dua na tamata e nakita ka wasoma nona valuta e dua ena sala e sega ni vakayago, me vakataka na vosa ca, veivakacudrui, veivakayarayarataki lawaki, se veivakamadualaki. Oqo ena vakavuna e dua na yalo e vakatorosobutaka na kena yaga se rakorako e dua. E dina beka ni sega ni vakayago, ia na mataqali veivakacacani oqo e vakamavoataka na vakasama kei na yalo ni bula raraba ni dua na tamata.

Na Sala ni Veivuke

Sa namaka tiko vei keda na Turaga meda cakava na veika kece eda rawa ni cakava me tarovi na veivakacacani ka taqomaka ka vukei ira era a vakaleqai ena veivakacacani. E sega ni dua e namaki me vosota tiko na itovo ni veivakacacani. Kevaka e sa yaco tiko oqo se a yaco ena dua na gauna sa oti, sa rawa mo raica na ivurevure me vukei iko ena abuse.ChurchofJesusChrist.org.