PARAU PORO’I A TE FEIĀ FA’ATERE O TE ĀREA
’Ia ha’apa’ohia tō ’oe hina’aro
’O te Fa’aora Iesu Mesia tō tātou hi’ora’a maita’i roa a’e i te vaiihora’a i te hina’aro o te Metua i te ao ra ’ia ’upo’oti’a. I roto i te ’ō nō Gesetemane, ’a pure ai te Mesia i tōna Metua, ma te rave i ni’a iāna i te mau hara, te mau māuiui, ’e te mau paruparu o te ao nei, e’ita ta’u e nehenehe e ha’amata i te hāro’aro’a i te māmae ’e te māinaina rahi o te vārua ’o tāna i māuiui ’a parau ai ’oia ē : « E tā’u Metua ē, i ti’a ra, e hōpoi ’ē atu i teie nei ’āu’a », ’e nō reira ’auē te here rahi ’e te ha’apa’o tāna i fa’a’ite ma te paraura’a ē, ’ia tupu rā tō ʼoe hinaʼaro, ʼeiaha tōʼu ».1
I te roara’a o te mau pāpa’ira’a mo’a, tē tai’o nei tātou nō te tahi atu mau pipi ha’apa’o maita’i ’o tei fa’a’ite i te hō’ē ā mana’o mai tō te Fa’aora ’e ’o tei fa’ati’a i te hina’aro o te Metua ’ia upo’oti’a. Hou tō te peropheta Abinadi natira’a i tōna ’itera’a pāpū i tōna ora, ’ua fa’a’ite itoito ’oia i te poro’i o te ’evanelia ’e ’ua poro ē : « E fa’aoti rā vau i tā’u nei parau… ’ei reira ’aita ō’u e pe’ape’a i te vāhi tā’u e haere ra, atira ïa ’ia ora vau ».2
Mai te reira ato’a nō Sadaraka, Meseka, ’e Obede-nego tei poro i te ari’i Nebukanesa : « ’Ia hina’aro ’oia iho, e ti‘a ïa i tō mātou Atua e ha’amori nei ’ia fa’aora ia mātou i te umu auahi ura ra, e ti‘a ïa iāna ’ia fa’aora ia mātou i tō rima, e te ari’i.
’Ia ’ore rā ’oia ’ia hina’aro, e ’ore â mātou e ha’amori i tō ’oe ra mau atua, ’ia ’ite mai ’oe, e te ari’i, e ’ore ho‘i e ha’amori i te ti’i auro i fa’ati‘ahia e ’oe ra ».3
’E ’o Amona, te tamaiti a te ari’i Mosia, ma te aumihi hōhonu nō « te poro atu i te parau a te Atua i teie feiā rata ’ore, ’e te ’ā’au ’eta’eta, ’e te taehae ra »,4 tōna hia’ai rahi tei ha’apotohia i roto i tāna pāhonora’a i te ari’i Lamoni : « ’Ē, e hina’aro tō’u ’ia parahi i rotopū i teie nei feiā i e taime ri’i ; ’oia ïa, e tae paha i te mahana e pohe ai au ra ».5
’Aita teie mau pipi itoito a te Fatu i paruparu i roto i tō rātou ’itera’a pāpū ’e mai te Fa’aora ho’i, ’ua vaiiho tāta’itahi rātou i te hina’aro o te Metua ’ia upo’oti’a i ni’a i tō rātou iho maita’i.
Tē ha’amana’o nei au i tō’u ’āpīra’a, i te fa’aro’ora’a i te ’ā’amu nō te fa’afāriura’a o tō’u metua tāne. I te vauvaura’ahia te ’Evanelia a Iesu Mesia i Hamoa, ’aita te reira i fāri’i-maita’i-hia. E rave rahi tei māta’u i teie ha’apa’ora’a ’āpī ’e ’ua ’aro atu i te reira ’e ’ua hāmani ’inohia te feiā tei mā’iti i te ’āmui atu i roto. E rave rahi mau ta’ata fa’afāriuhia tei tīahihia i tō rātou fare i te ’oire, ’e e rave rahi tei horo ’ē i te mau vāhi pūhapara’a. Tō’u nei pāpā, e taure’are’a hi’ohi’o haere ’oia ’e ’ua ’imi i te ’ite e aha tā teie ha’apa’ora’a ’āpī e ha’api’i nei. Nā roto i te tau, ’ua bāpetizohia ’oia i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei.
’A parare noa ai te parau ’āpī nā roto i te ’oire ē, ’ua ’āmui atu tō’u pāpā i roto i te ’Ēkālesia, ’ua fa’aara mai te hō’ē hoa nō tōna ’oire, tei ha’ape’ape’a nōna ē, tē parauhia ra e tunu-ora-noa-hia ’oia i roto i te hō’ē umu, nō reira ’ua horo ’ē atu tō’u pāpā ’e ’ua pūhapa i’ō Malietoa Talavou Pe’a Fitisemanu ’e Alisa Fitisemanu. Noa atu tē ha’ape’ape’ahia ra tōna ora, ’ua natihia ’oia i tāna fa’aro’o ’āpī. Mai tā te Fa’aora i ha’api’i : « E ’ite ho’i ’outou ia rātou i tā rātou i fa’ahotu mai ».6 Te mau ha’amaita’ira’a nō te ’Evanelia tei fa’aho’i-fa’ahou-hia mai i roto i tō’u orara’a ’e tā’u vahine ’e tā māua mau tamari’i, ’e i roto i te orara’a o tā rātou mau tamari’i, ’o te tahi ïa o te mau hotu nō te fa’aro’o o tō’u metua tāne.
’Ua ha’api’i te peresideni Russell M. Nelson : « Te uira’a nō tātou tāta’itahi, noa atu te huru o te taura ta’ata, hō’ē ā ïa huru. E hina’aro ānei ’outou e vaiiho i te Atua ’ia upo’oti’a i roto i tō ’outou orara’a ? E hina’aro ānei ’outou e vaiiho i te Atua ’ia riro ’ei fa’aurura’a faufa’a roa a’e i roto i tō ’outou orara’a ? E vaiiho ānei ’outou i tāna mau parau, tāna mau fa’auera’a, ’e tāna mau fafaura’a ’ia fa’auru i te ’ohipa tā ’outou e rave i te mahana tāta’itahi ? E vaiiho ānei ’outou i tōna reo ’ia riro ’ei reo mātāmua i ni’a a’e i te tahi atu mau reo ? E hina’aro ānei ’outou e vaiiho i te mau mea ato’a tāna e hina’aro ’ia rave ’outou, ’ia nā ni’a a’e i te tahi atu mau hina’aro ? E hina’aro ānei ’outou ’ia horomi’ihia tō ’outou hina’aro i roto i tōna ? »7
’Ua māuruuru rahi au nō te hi’ora’a maita’i o tō’u metua tāne, i teie mau pāpa’i a te mau tāvini ha’apa’o maita’i a te Fatu ’e i te rahira’a o te mau pipi ’e feiā pe’e a te Mesia. Tē māuruuru nei au ē a muri noa atu nō te hi’ora’a maita’i roa a’e o tō tātou Fa’aora, ’o tei tu’u noa i tōna hina’aro i tō tōna Metua.
Ma te fāri’ira’a i te anira’a a te peresideni Nelson ’ia « mā’iti e vaiiho i te Atua ’ia upo’oti’a i roto i tō tātou orara’a »,8 e ’ite mai tātou iho ē, tō tātou Atua e « Atua ’o tē rave i te mau temeio ».9 Tē ti’aturi nei au i reira e nehenehe tātou e parau ma te hina’aro ’e te ’ā’au haeha’a, e te Atua, « ’ia tupu rā tō ’oe hina’aro, ’eiaha tō’u ».10