TE MAU ’API NŌ PĀTIFITA

Tītau i te fa’arava’ira’a iāna iho i te pae mā’a i roto i te mau motu ātea nō Pōrīnetia farāni

Pū parau ’āpī

Tauturu i te mau ’utuāfare nō te mau motu ’ia tanu i tā rātou iho mā’a, e tuha’a ïa nō te fa’anahora’a ’āmui pāturuhia e te ’Ēkālesia.

I roto i te ta’ere ’o te mau motu nō Pōrīnetia farāni, e tuha’a nō te orara’a te vai natira’a te tahi ’e te tahi, a ora ai i te ātea. Fātata e 600 kirometera e fa’ata’a ’ē nei i te mau motu nō Takaroa ’e nō Takapoto i te ’oire pū nō Papeete, ’e tei ni’a tō rātou ti’aturira’a i te terera’a ’o te mau mā’a ’e te mau tauha’a nā ni’a i te pahī i rotopū i terā motu ’e terā motu. ’Ia tupu mai rā te ma’i pe’e COVID-19, e rave rahi ’o te reira mau motu tei tāpū-’ē-hia te tahi ’e te tahi, nō te mea ’ua iti mai te terera’a pahī, ’e, nō te tahi mau motu, ’ua ’ere roa rātou i te mā’a.

’Aita i maoro a’e nei, ’ua fārerei te mau ti’a fa’atere nō te reira mau motu i te feiā fa’atere o te ’Ēkālesia a Iesu Mesia i te Feiā Mo’a i te mau Mahana Hope’a nei i reira, nō te ’āparau i te mana’o ’ia fa’arahi i te fa’arava’ira’a iāna iho i roto i te reira mau motu.

I te ’āva’e ’ātete 2020, ’ua fārerei te feiā fa’atere ’o te titi nō Faa’a i te tāvana ’āpī nō te motu nō Takaroa, ’o Panaho Temahaga, ’ape’ehia mai ’oia ’e te mono tāvana nō te motu nō Takapoto, ’o Mack Maheahea.

«Ua ha’apāpū roa te ma’i pe’e ’e te ’ōpanipanira’a i te paruparu o te fa’arava’ira’a faufa’a o Pōrīnetia farāni, tei tā’aihia i ni’a i te hāponora’a i te fenua ’e’ē, ’e ’ua fa’a’ite pāpū mai i te paruparu o te mau motu ātea nō te mea ’aita e pahī », te parau ïa a Ahuura Parker, te ra’atira nō te ha’apararera’a parau nō te titi nō Fa’a’ā.

« Ua ’ite te tā’āto’ara’a i teie mau fifi ’e nō reira te mau tāu’ara’a parau i haere ai i ni’a i te parau nō te fa’arava’ira’a iāna iho i te pae nō te mā’a.

’Ua paraparau te mau ti’a fa’atere o te ’oire i te feiā fa’atere o te ’Ēkālesia i tā rātou mau fa’anahora’a ’e tā rātou mau hi’ora’a ātea ’e te mau māna’ona’ora’a. Hō’ē o te mau mana’o tumu, ’o te ’imira’a ïa i te mau rāve’a nō te tauturu i te mau ’utuāfare ’ia rava’i rātou ia rātou iho nō te mā’a, e nā roto i te reira, mai te mea ē, ’aita te mā’a e tae mai, e nehenehe te mau ’utuāfare e fa’a’ohipa i tā rātou iho mā’a. E rā ’ē te tau tō te ’Ēkālesia ha’api’ira’a i tōna mau melo i te faufa’a ’o te fa’arava’ira’a iāna iho, ’e te fa’aitoitora’a i te mau ’utuāfare ’ia ha’aputu i te mā’a nō te mau taime rū ’e te fa’ahotura’a i te mau fa’anahora’a nō te tauturu i te feiā Fa’a’āpu.

’Ua tano maita’i terā mau mana’o i ni’a i te mau ha’api’ira’a i ha’api’ihia mai i roto i te ’ōpanipanira’a, tei tūra’i i te fa’aterera’a hau fenua nō Pōrīnetia farāni ’ia fa’ariro i te fa’arava’ira’a iāna iho i te pae o te mā’a ’ei hō’ē ’o tāna mau ’ōpuara’a mātāmua. ’Ua fa’anaho te fa’aterera’a hau e fa’a’ohipa e 950 mirioni tārā marite i roto i te ’ohipa Fa’a’āpu i roto i nā matahiti hō’ē ’ahuru i muri nei i roto i te mau ta’a motu ato’a.

’Ua vauvau mai te fa’aterehau Tearii Alpha i tāna fa’anahora’a tumu nō 2021-2030 i roto i te hō’ē putuputura’a ’e te mau tāvana ato’a. « Tē hina’aro nei mātou ’ia riro te ’ohipa Fa’a’āpu ’utuāfare ’ei pou mātāmua, i reira ho’i te ’utuāfare tāta’itahi, te rahira’a, e ha’amata ai i te tanu i tā rātou i ’ite i te tanu ’e tā rātou e nehenehe e Fa’a’āpu. Te piti, tē hina’aro nei mātou ’ia ha’amata rātou i te fa’ahotu i te mau hotu maita’i roa o te fenua ’o tē nehenehe e hāpono i te ara.

’Ua fa’anaho te feiā fa’atere o te ’oire ’e o te ’Ēkālesia i te hō’ē fa’anahora’a tāhō’ē. E hōro’a mai te ’Ēkālesia i te mau huero mā’a rau, ’e nā te mau ’oire e hōro’a mai i te mau mauha’a rarahi nō te Fa’a’āpu nā roto i te hō’ē fa’anahora’a tauturu a te fa’aterera’a hau.

E tuhahia te tauturu a te titi i roto e toru tuha’a :

Fa’arava’ira’a te mau ’utuāfare ia rātou iho i te pae nō te mā’a : « hō’ē ’utuāfare, hō’ē ’āua Fa’a’āpu » ’e te mau Fa’a’āpu nō te ’atu’atu i te orara’a.
Rāve’a ’āpī nō te mā’a : fa’a’ohipara’a i te mau rāve’a Fa’a’āpu ’āpī, mai te Fa’a’āpu nō te tau roa, ’aita e repo, e pape ta’a ’ē noa te mā’a.
Fa’ahotura’a i te hō’ē ’ohipa fa’arava’ira’a faufa’a ’āpī : tauturu i te mau ’utuāfare ’ia tu’u i te moni i roto i te mau hotu maita’i nō te hāpono i te ara, mai te vānira, te re’a, te pitaia ’e te hinu ha’ari.

« I te mau taime ato’a ’ua riro ’o Takaroa ’ei motu ha’amaita’ihia », te parau ïa a te tāvana Temahaga. « ’Ua fārerei ’oia i te mau taime teimaha i te mau matahiti i ma’iri a’e nei, ’e e mea ti’a ’ia ha’amaita’i-fa’ahou-hia ’oia. Te ’ohipa mātāmua , e ho’i fa’ahou mai i ni’a i te Fa’a’āpu, e arai i te mau hotu ’o te nātura, nō te mau u’i hoa rā e ti’a mai nei. ’Ua fa’a’ite mai te ’ōpanipanira’a ia tātou i te faufa’a rahi ’o te fa’arava’ira’a iāna iho i te pae nō te mā’a. Terā te ’ē’a tā mātou e hina’aro nei e haere ».

Mai tei ha’api’ihia mai e te ’Ēkālesia, te faufa’a mau o teie ’ōpuara’a ’ua niuhia ïa i ni’a i te hōpoi’a a te mau ’utuāfare ’e te mau ta’ata ato’a ’ei mau ti’a’au, ’ia fa’a’ohipa ma te pa’ari i te mau rāve’a tauturu ’o te nātura tā te Atua i hōro’a mai ’ei maita’i nō tāna mau tamari’i i te fenua nei.

Tē parau ra te mau pāpa’ira’a mo’a a te feiā mo’a i te mau mahana hope’a nei : « Nā’u, nā te Fatu, i hōhora atu i te mau ra’i, ’e ’ua hāmani au i te ao nei, ’o tā’u iho ïa ’ohipa rima ; ’e nā’u iho te mau mea ato’a i roto i te reira. Nō te mea ’ua ’ī roa te fenua nei, ’e ’ua nava’i ’e ’ua toe mai ho’i ; ’oia ïa, nā’u i fa’aineine i te mau mea ato’a, ’e ’ua hōro’a atu ho’i i te tamari’i a te ta’ata nei ’ia riro rātou ’ei mea ti’amā ia rātou iho » (Te Parau Ha’api’ira’a ’e te mau Parau Fafau 104:14,17).

’Ua fa’a’ite mai ’o Harold Teivao, peresideni nō te titi nō Fa’a’ā : « Teie ’ōpuara’a ’ohipa, e rāve’a ïa nō te mau melo nō te titi ’ia fa’a’ohipa i te mau mea tā rātou i ’apo mai nō ni’a i te fa’arava’ira’a iāna iho, ’e ’ia tauturu i te ha’apa’arira’a i tō rātou mau ’oire ’e ’ia patu i te bāsileia o te Atua i ni’a i te fenua nei ».

’Ua fafau te huira’atira nō Takaroa, nō Takapoto ’e te titi nō Fa’a’ā ’ia rave ’āmui i te ’ohipa nō te fa’arava’ira’a iāna iho i te pae nō te mā’a nā te mau ’utuāfare.