TE MAU ’API NŌ PĀTIFITA
2020 Hi’ora’a i « muri »
’Ua fa’ariro vau i te tua’ā’ai o te ’Ēkālesia mai ‘tō rātou tua’ā’ai’ ’e ‘tō rātou ’ā’amu’… ’eiaha tō’u !
’Ua fānauhia ’e ’ua pa’ari au i ’Āfirita nā te hō’ē metua tāne Peretāne ’e te hō’ē metua vahine nō Rhoda ’e Italia, ’aita roa tō’u hō’ē tā’amura’a i ni’a i te mau melo pionie mātāmua nō te ’Ēkālesia i Amerika. Terā ïa, ’ua fa’ariro vau i te tua’ā’ai o te ’Ēkālesia mai ‘tō rātou tua’ā’ai’ ’e ‘to rātou ’ā’amu’… ’eiaha tō’u !
Nō reira, ’a feruri na i tō’u māere rahi i te purara’a mai hō’ē parau poro’i nā roto mai ia FamilySearch i ni’a i tā’u ’api Facebook nō te fa’aara mai iā’u ē, e tupuna pionie tō’u ! ’Ua tupu ’oi’oi a’era i roto iā’u te hō’ē tū’atira’a i ni’a i te mau melo mātāmua ’o te ’Ēkālesia, ’e i taua iho taime ra, ’ua ’ite au iā’u iho i roto i te hō’ē ’ā’amu ’āpī roa.
’O Margaret Rebecca Bird tōna i’oa ; ’ei tamāhine 13 matahiti ’ua fa’aru’e ’oia ia Kanesville, i Indiana nā roto i te pupu pere’o’o a Wilford Woodruff nō te haere i te ’āfa’a rahi nō Roto Miti. ’Ua fa’aruru teie mau pionie i te hō’ē haerera’a rohirohi 120 mahana te maoro nā roto i te mau fa’a rarahi e tae atu i Roto Miti.
I teienei, ’ua rahi roa atu tō’u ’itera’a i te hō’ē tuha’a ’o te parau tohu a Malaki, ’oia ho’i, e fāriu te ’ā’au o te mau tamari’i i tō rātou mau metua1—tō’u mau huimetua i roto i te hō’ē fenua ātea.
E tē tāmau noa nei te mau ha’amaita’ira’a i te tae mai. E nehenehe tā’u e tai’o i teienei i roto i te buka « Les saints (Feiā mo’a) », e rave rahi mau ’ohipa tā te mau pionie i fa’aruru, ’oia te ’ā’amu ’o te ’Ēkālesia a Iesu Mesia i te Feiā Mo’a i te mau Mahana Hope’a Nei i te ’anotau hope’a. ’Ua oti a’e na te buka 1 ’e te 2 i te nene’ihia.
’Ua parau ’o Dale G. Renlund, nō te Tino Ahuru ma Piti ’āpōsetolo : « E mea faufa’a rahi te tua’ā’ai o te ’Ēkālesia nō te mau melo o te ’Ēkālesia ’e nō te Fatu ». 2 I te ’āva’e ’Ēperēra 1830, ’ua parau te Fatu : « Inaha, e vai te hō’ē buka i rotopū ia ’outou »3 ’e ’ua ha’apa’o ’o Olive Kaudere i te reira buka hō’ē matahiti te maoro.4 ’Ua pi’i a’era te Fatu ia Ioane Whitmer ’ia « ha’apa’o tāmau noa i te mau pāpa’a parau ’o te ’Ēkālesia i roto i te tua’ā’ai » ’e ’ua fāri’i ’oia i te parau fafau tā te fa’aa’o e hōro’a iāna « ’ia pāpa’i i te reira mau mea » ’ia ha’apa’o maita’i ana’e ’oia.5 ’Ua ha’api’i mai ’o John Whitmer ē, « e riro te tua’ā’ai ’ei maita’i nō te ’Ēkālesia ’e nō te mau u’i hoa rā e ti’a mai nei ». 6
’Ua fa’ata’a pāpū mai te Fatu nāhea ’ia ha’apa’o i te mau pāpā’a parau, i raro a’e i te arata’ira’a a te Vārua Maita’i.
’Ua ’ī te ’āpī o te buka « Feiā mo’a » i te mau ’ohipa parau mau ana’e nō roto mai i te mau ’ā’amu o te mau melo fa’aro’o tei fa’ahotu i te mau hōro’a mai tō te Mesia te huru, ’a fa’aruru ai rātou i te ’ati nō te orara’a rātou i te ’evanelia ma te maita’i roa e ti’a ia rātou. ’Ua parau ato’a ’o Elder Renlund : «Tei roto ato’a i te reira [Feiā mo’a] te mau ’ā’amu ’o te mau ta’ata tei hi’a i ni’a i te ’ē’a ’o te fafaura’a, terā rā, nā roto i te tāra’ehara a Iesu Mesia, ’ua ho’i fa’ahou mai ».
Nō te mau melo e hina’aro e tuatāpapa hōhonu atu ā i te mau ’ohipa tua’ā’ai, e rave rahi hānere rāve’a tauturu tei tāpurahia i te hope’a o te buka.
E mauha’a maita’i roa te ho’i-fa’ahou-ra’a i muri ; ’e ite au iā’u iho i te ferurira’a i tō’u hitimahuta i te taime a ’ite ’oi’oi ai au ē, ’ua natihia vau i tō’u mau huimetua pionie… ’e ’eiaha ia Margaret Bird ana’e iho, i te tā’āto’ara’a rā ’o rātou ! I te roara’a ’o teie matahiti 2020, ’ua ’itehia iā’u maoti FamilySearch ē, e rave rahi tō’u mau fēti’i pionie.
’Ua ha’api’i mai ’o Elder Renlund : « E fa’a’ohipa te Fatu i te mau ’ā’amu o te ta’ata hō’ē nō te ha’api’i mai ia tātou nāhea ’ia ha’afātata i pīha’i iho iāna, ’ia tātarahapa ’e ’ia riro hau atu mai iāna te huru. Tā tātou ïa ’ōpuara’a a haere mai ai tātou i te fenua nei, te ’ōpuara’a o te ’evanelia, ’e te ’ōpuara’a a te ’Ēkālesia a Iesu Mesia i te Feiā Mo’a i te mau Mahana Hope’a nei ».7
E māuruuru rahi tō’u nō tō’u ’utuāfare ’e nō te mau natira’a tā tātou e nehenehe e ha’amau ’a tere ai tātou nā roto i te tau ’e i te reva. Maita’i ē, i te hō’ē mahana, e tai’o tō’u huā’ai i tō’u iho ’ā’amu ’e e feruri ē, ’ua pāpa’i au i te mau ’itera’a faufa’a nō te tauturu ia rātou ’ia haere mai i te Mesia ra mai iā’u ato’a, e tāmata nei e ’ohipa i raro a’e i te arata’ira’a a te Vārua Maita’i.