ចូរមកតាមខ្ញុំ

ត្រូវបានហៅដោយព្រះអម្ចាស់

ដូចជា យ៉ារេឌ ខារតើរ និង ស្ទេផាន ប៊ើរណែត ដែរ ( សូមមើល គោលលទ្ធិ និង សេចក្ដីសញ្ញា ៧៩ និង ៨០ ) ពួកអ្នកផ្សព្វផ្សាយសាសនាសម័យទំនើបក៏ត្រូវការសាក្សីមួយដែលប្រាប់ថា ពួកគេត្រូវបានហៅដោយព្រះអម្ចាស់ ។

ពួកអ្នកផ្សព្វផ្សាយសាសនារាប់ពាន់នាក់ត្រូវប្ដូរការហៅបេសកកម្មរបស់ពួកគេ ដោយសារតែវីរុសកូរ៉ូណា ។ ឧទាហរណ៍ ឃើទីស និង រ៉ាម៉ូណា មិលលើរ ត្រូវបានចាត់តាំងទៅកាន់បេសកកម្មថ្មីមួយដោយសារតែវីរុសនេះ ។ ពួកគេបានថ្លែងទីបន្ទាល់ថា « យើងមានទីបន្ទាល់ដ៏រឹងមាំមួយថា វាមិនមានបញ្ហាទេ ទោះយើងបម្រើនៅកន្លែងណាក៏ដោយ ប៉ុន្ដែយើងមានឆន្ទៈដើម្បីបម្រើ ។ នៅពេលយើងអនុញ្ញាតឲ្យព្រះហស្ដរបស់ព្រះអង្គសង្គ្រោះដឹកនាំជីវិតរបស់យើង នោះទ្រង់នឹងធ្វើឲ្យយើងមានភាពស័ក្ដិសមសម្រាប់កិច្ចការនេះ » ។

យ៉ារេឌ ខារតើរ ( ឆ្នាំ ១៨០១–៤៩ )

ត្រូវបានជ្រមុជទឹកដោយ ហៃរុម ស្ម៊ីធ នៅឆ្នាំ ១៨៣១ នៅទីក្រុងខូលស៍វិល រដ្ឋញូវយ៉ក ។
បានផ្សាយដំណឹងល្អនៅរដ្ឋអូហៃអូ ផែនសិលវេញ៉ា ញូវយ៉ក និងវើរម៉ុន នៅឆ្នាំ ១៨៣១ និង ១៨៣២ ។
បានទៅកាន់ភូមិហៃរាំ រដ្ឋអូហៃអូ ដើម្បីសួរយ៉ូសែប ស៊្មីធពីព្រះទ័យរបស់ព្រះអម្ចាស់ដែលមានសម្រាប់លោក ។
យ៉ូសែប ស៊្មីធ បានទទួលវិវរណៈមួយដែលណែនាំលោកឲ្យផ្សាយដំណឹងល្អម្ដងទៀតនៅសហរដ្ឋភាគខាងកើត ( សូមមើល គោលលទ្ធិ និង សេចក្ដីសញ្ញា ៧៩ ) ។

ស្ទេផាន ប៊ើរណែត ( ឆ្នាំ ១៨១៣–៨៥ )

ត្រូវបានជ្រមុជទឹកដោយ ចន មើរដក់ នៅឆ្នាំ ១៨៣០ នៅទីក្រុងវ៉ារិនស៍វិល រដ្ឋអូហៃអូ ។
ត្រូវបានតែងតាំងជាសង្ឃជាន់ខ្ពស់នៅអាយុ ១៧ ឆ្នាំ ។
ត្រូវបានចាត់តាំងឲ្យផ្សាយដំណឹងល្អជាមួយនឹង អេដែន ស៊្មីធ ( សូមមើល គោលលទ្ធិ និង សេចក្ដីសញ្ញា ៨០:២ ) ប៉ុន្ដែ អេដែន ស៊្មីធ បានធ្លាក់ខ្លួនឈឺ ។
បានចាប់ផ្ដើមបេសកកម្មរបស់លោកជាមួយនឹងឪពុករបស់អេដែនវិញ ដែលមានឈ្មោះថា ចន ស្ម៊ីធ ។

ឃើទីស និង រ៉ាម៉ូណា មិលលើរ

ពេលមើលជម្រើសទាំងឡាយនៅក្នុងគេហទំព័រអ្នកផ្សព្វផ្សាយសាសនារៀមច្បងរបស់សាសនាចក្រ នោះគូស្វាមីភរិយាមិលលើរបានជ្រើសរើសយកទីតាំងចំនួនប្រាំបី—ដែលភាគច្រើនស្ថិតនៅប៉ូលីនេស៊ី និងអឺរ៉ុប ។
ការហៅបម្រើរបស់ពួកគេក៏បានមកដល់ ដែលឲ្យទៅបម្រើនៅសាធារណរដ្ឋ ប្រជាធិបតេយ្យ កុងហ្គោ ។
ពួកគេត្រូវរៀនភាសាបារាំង ។
ក្រោយពីរយៈពេលបីខែកន្លះនៅអាហ្វ្រិក គូស្វាមីភរិយាមិលលើរត្រូវបានចាត់តាំងជាថ្មីឲ្យទៅបម្រើនៅរដ្ឋចចចា សហរដ្ឋអាមេរិក ដោយសារតែជំងឺកូវីដ-១៩ ។