សំឡេងពួកបរិសុទ្ធថ្ងៃចុងក្រោយ
សូមត្រឡប់មកវិញមក
ពេលយើងមានកូនបីនាក់ វ៉ាន់ណេសា បាននិយាយថា « យើងត្រូវការសាសនានៅក្នុងផ្ទះនេះ » ។
នៅពេលខ្ញុំមានអាយុ ១២ ឆ្នាំ បងប្រុសច្បងរបស់ខ្ញុំបាននាំអ្នកផ្សព្វផ្សាយសាសនាពេញម៉ោងមកផ្ទះយើង ហើយពួកគេបានណែនាំយើងឲ្យស្គាល់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ មិនយូរប៉ុន្មាន ម្ដាយរបស់ខ្ញុំចាប់ផ្ដើមនាំបងប្រុសពីរនាក់របស់ខ្ញុំ បងស្រីរបស់ខ្ញុំ និងរូបខ្ញុំទៅកាន់ព្រះវិហារ ។ យើងទាំងអស់គ្នាបានទទួលបុណ្យជ្រមុជទឹកបន្ទាប់ពីនោះមក ។
ប៉ុន្ដែ បន្ដិចម្ដងៗយើងឈប់ទៅព្រះវិហារ ។ ខ្ញុំតែងតែចូលចិត្តទៅព្រះវិហារ ប៉ុន្ដែពេលខ្ញុំអាយុ ១៧ ឆ្នាំ រឿងរ៉ាវក្នុងជីវិតខ្ញុំបានដឹកនាំខ្ញុំឲ្យទៅរកផ្លូវផ្សេងមួយទៀត ។ ខ្ញុំបានព្យាយាមធ្វើជាមនុស្សល្អម្នាក់ ហើយខ្ញុំមិនដែលមានបំណងអាក្រក់អ្វីឡើយ ។ ប៉ុន្ដែខ្ញុំបានវង្វេង ហើយចាប់ផ្ដើមរស់នៅតាមរបៀបលោកិយ ។ ដោយមិនបានដឹងខ្លួន នោះខ្ញុំបានធ្លាក់ជ្រៅទៅក្នុងពិភពលោកនេះ ។
បន្ទាប់មក ខ្ញុំបានជួបនឹង វ៉ាន់ណេសា ។ នៅថ្ងៃមួយ បន្ទាប់ពីយើងបាននៅជាមួយគ្នាបានមួយរយៈមក នាងបាននិយាយថា « យើងត្រូវការសាសនានៅក្នុងផ្ទះនេះ » ។ នៅពេលនោះ យើងមានកូនបីនាក់ហើយ ។
ដោយសារពិភពលោកនេះមានសភាពដូច្នេះ នោះយើងបានព្រួយបារម្ភពីទិសដៅខាងវិញ្ញាណដែលយើងនឹងផ្ដល់ដល់កូនៗរបស់យើង ។ ខ្ញុំបានគិតថា ប្រសិនបើខ្ញុំត្រឡប់ទៅរកសាសនាវិញ នោះខ្ញុំនឹងត្រឡប់ទៅព្រះវិហាររបស់ខ្ញុំ ។ ខ្ញុំបានចាំថា វាគឺជាកន្លែងមួយដែលមានមនុស្សល្អៗ ។
ខ្ញុំបាននិយាយទៅកាន់សមាជិកសាសនាចក្រម្នាក់ ហើយបានប្រាប់គាត់ថា ខ្ញុំគិតចង់ត្រឡប់មកព្រះវិហារវិញ ។
គាត់បាននិយាយថា « សូមត្រឡប់មកវិញមក ! »
ការបារម្ភដ៏ធំបំផុតរបស់ខ្ញុំគឺថា កូនៗរបស់ខ្ញុំនឹងគិតថា ព្រះវិហារគឺគួរឲ្យធុញទ្រាន់ ហើយនឹងមិនចូលចិត្តទៅទេ ផ្ទុយទៅវិញពួកគេចូលចិត្តទៅព្រះវិហារណាស់ ។ កាលយើងបន្ដទៅព្រះវិហារ នោះវ៉ាន់ណេសាបានសម្រេចចិត្តថា ពុំមានអ្វីដូចជាសាសនាចក្រដែលជួយឲ្យក្រុមគ្រួសាររីកចម្រើនជាមួយគ្នានោះទេ ។ នោះគឺពិតជាអ្វីដែលនាងបានស្វែងរក ។ វ៉ាន់ណេសា និងខ្ញុំបានរៀបការ ហើយនាង និងកូនៗរបស់យើងបានទទួលបុណ្យជ្រមុជទឹក ។
ឥឡូវនេះ យើងកំពុងដើរលើផ្លូវនៃដំណឹងល្អជាគ្រួសារមួយ ។ គោលដៅរបស់យើងគឺដើម្បីបានផ្សារភ្ជាប់ជាមួយគ្នានៅក្នុងព្រះវិហារបរិសុទ្ធ ។
អំឡុងពេលនៃការសាងសង់ព្រះវិហារបរិសុទ្ធ រីអូ ឌឺ ជេណេរ៉ូ ប្រេស៊ីល ខ្ញុំបានដើរកាត់វាស្ទើរតែរាល់ថ្ងៃ ។ ខ្ញុំបានប្រាប់មិត្តភក្ដិរបស់ខ្ញុំថា « ថ្ងៃមួយ ខ្ញុំនឹងរៀបការនៅក្នុងអគារនេះ » ។
ពួកគេបាននិយាយថា « អើយ ឮតែឯងនិយាយពាក្យហ្នឹងដដែលៗរាល់ថ្ងៃ ! »
ខ្ញុំបាននិយាយពាក្យនេះរាល់ថ្ងៃ ដោយសារខ្ញុំដឹងថា ព្រះវិហារបរិសុទ្ធបានសង់ជិតរួចរាល់ហើយ ហើយខ្ញុំចង់រំឭកខ្លួនឯងឲ្យបន្ដធ្វើអ្វីៗដែលត្រឹមត្រូវ ដើម្បីគ្រួសាររបស់យើងអាចផ្សារភ្ជាប់ជាមួយគ្នាបាន ។ នេះគឺជាបំណងប្រាថ្នានៃដួងចិត្តរបស់ខ្ញុំ ។
ខ្ញុំដឹងថា កូនៗរបស់ខ្ញុំនឹងចាប់ផ្ដើមរៀនបន្ថែមទៀតអំពីពិភពលោកនេះ ហើយនឹងឆ្លងកាត់រឿងដដែលមួយចំនួនដែលខ្ញុំបានឆ្លងកាត់រួចហើយ ។ ប៉ុន្ដែនៅពេលខ្ញុំចែកចាយបទពិសោធន៍របស់ខ្ញុំជាមួយនឹងពួកគេ នោះខ្ញុំបាននិយាយថា « សូមកុំចង់ទៅក្បែរអ្វីដែលប៉ាបានធ្វើ ព្រោះវាមិនមានតម្លៃឡើយ » ។
ខ្ញុំលើកទឹកចិត្តកូនៗខ្ញុំឲ្យសិក្សាដំណឹងល្អរបស់ព្រះយេស៊ូវគ្រីស្ទ ហើយផ្ដោតលើការធ្វើជាអ្នកផ្សព្វផ្សាយសាសនានាពេលនេះ ដើម្បីពួកគេអាចផ្ដល់ពរជ័យដល់មនុស្សដទៃ ។ ពួកគេមិនយល់ពីអ្វីៗគ្រប់យ៉ាងនៅឡើយ ប៉ុន្ដែពួកគេកំពុងតែរៀនពីវា ។ នេះគឺជាអ្វីដែលខ្ញុំប៉ងប្រាថ្នាសម្រាប់ពួកគេ ។