ចូរមកតាមខ្ញុំ
ការយកឈ្នះលើការជំទាស់
គោលលទ្ធិ និង សេចក្តីសញ្ញា ៧១–៧៥
ថ្ងៃទី ២៨ ខែ មិថុនា–ថ្ងៃទី ៤ ខែ កក្កដា
រចនារូបភាពដោយ ដាន ប៊ឺ
វិវរណៈនៅក្នុង គោលលទ្ធិ និង សេចក្តីសញ្ញា ៧១ ប្រាប់ដល់យ៉ូសែប ស៊្មីធ និង ស៊ីឌនី រិកដុនឲ្យទៅផ្សាយដំណឹងល្អដើម្បីព្យាយាមកាត់បន្ថយអារម្មណ៍មិនរាក់ទាក់នឹងសាសនាចក្រ ដែលបានកើតឡើងដោយសារការរិះគន់ពីសមាជិកដែលបានបាត់បង់សេចក្ដីជំនឿរបស់ពួកគេ ។ ជាង ១០០ ឆ្នាំក្រោយមក អែលឌើរ ស្ពែនស៊ើរ ដបុលយូ ឃឹមបឹល ក្នុងកូរ៉ុមនៃពួកសាវកដប់ពីរនាក់បានមានបទពិសោធន៍ស្រដៀងគ្នានេះស្ដីពីការផ្សាយដំណឹងល្អដើម្បីការពារសាសនាចក្រ ។
ការធ្វើទស្សនកិច្ចរបស់អែលឌើរឃឹមបឹលទៅកាន់ប្រទេសអេក្វាទ័រ
អំឡុងពេលទស្សនកិច្ចនៅទីក្រុងអូតាវ៉ាឡូ ប្រទេសអេក្វាទ័រនៅឆ្នាំ ១៩៦៥ អែលឌើរឃឹមបឹលបានប្រាប់ពួកអ្នកផ្សព្វផ្សាយសាសនាឲ្យបង្ហាញព្រះគម្ពីរមរមនដល់ពួកជនជាតិដើមអូតាវ៉ាឡូ ។ ទោះយ៉ាងណា ពួកអ្នកផ្សព្វផ្សាយសាសនាបានប្រឈមនឹងការប្រឆាំង នៅពេលពួកជនជាតិអូតាវ៉ាឡូបានចាប់ផ្ដើមនិយាយពាក្យភូតភរអំពីពួកអ្នកផ្សព្វផ្សាយសាសនាទាំងនោះនៅភូមិក្បែរៗនោះ ហើយពួកអ្នកផ្សព្វផ្សាយសាសនាបានពិបាកនឹងយកឈ្នះលើរឿងមិនពិតទាំងនេះ ។
ពីរឆ្នាំក្រោយមក អែលឌើរឃឹមបឹលបានចូលរួមនឹងសមាជិកពីរបីនាក់ ព្រមទាំងពួកអ្នកផ្សព្វផ្សាយសាសនានៅក្នុងការប្រជុំមួយនៅក្បែរចំណតឡានក្រុងក្នុងមូលដ្ឋាន ។ កាលប្រជាជនក្នុងមូលដ្ឋាននោះបានចុះពីឡានក្រុង ពួកអ្នកផ្សព្វផ្សាយសាសនាបានអញ្ជើញពួកគេឲ្យមកស្ដាប់សាវកនៅរស់ម្នាក់របស់ព្រះយេស៊ូវគ្រីស្ទ ។ មិនយូរប៉ុន្មាន មានមនុស្សប្រហែល ២០ នាក់បានមកជុំគ្នា ។ កាលពួកអ្នកផ្សព្វផ្សាយសាសនាបានចាប់ផ្ដើមការប្រជុំរបស់ពួកគេ នោះហ្វូងមនុស្សបានកើនឡើងដល់ជាង ១០០ នាក់ ។
បន្ទាប់មក អែលឌើរឃឹមបឹលបានឡើងនិយាយ ។ លោកបានថ្លែងអំពីការយាងមករបស់ព្រះយេស៊ូវគ្រីស្ទនៅទ្វីបអាមេរិក ។ លោកបានចង្អុលទៅមេឃ ហើយបានថ្លែងអំពីសំឡេងតូចរហៀងមកពីស្ថានសួគ៌ ដែលបានប្រកាសពីការបង្ហាញព្រះកាយរបស់ព្រះរាជបុត្រានៃព្រះ ដូចដែលមានចែងក្នុងព្រះគម្ពីរមរមន ។ អែលឌើរឃឹមបឹលបានរំឭកថា « គ្រប់ទាំងភ្នែកបានមើលតាមដៃខ្ញុំចង្អុលទៅមេឃ ហាក់ដូចជាព្រះអង្គសង្គ្រោះពិតជាបានគង់នៅទីនោះមែន ដោយយាងកាត់ពពកដ៏ស្ដើងនោះ » ។១
បន្ទាប់ពីនោះមក ពួកអ្នកផ្សព្វផ្សាយសាសនាបានបន្ដព្យាយាមបង្រៀនពួកជនជាតិអូតាវ៉ាឡូ ។ ពួកស៊ីស្ទើរផ្សព្វផ្សាយសាសនាបានបង្រៀនបុរសម្នាក់ឈ្មោះ រ៉ាហ្វាអែល ថាបានហ្គោ ដែលបានជ្រមុជទឹកនៅថ្ងៃទី ១៤ ខែ កក្កដា ឆ្នាំ ១៩៦៨—ជាពួកបរិសុទ្ធថ្ងៃចុងក្រោយជនជាតិដើមអូតាវ៉ាឡូដំបូងគេបង្អស់ ។ ភរិយារបស់លោកឈ្មោះ ថេរ៉េស្សា ក៏បានចូលរួមក្នុងសាសនាចក្រផងដែរ ។ មិនដល់ ១៥ ឆ្នាំក្រោយមក ស្ដេកមួយត្រូវបានរៀបចំឡើងនៅទីក្រុងអូតាវ៉ាឡូ ហើយបងប្រុស ថាបានហ្គោ ត្រូវបានហៅជាលោកអយ្យកោដំបូងគេ ។