ស្ត្រីពីជំនាន់ដំបូងនៃការស្ដារឡើងវិញ
ការទុកចិត្តលើព្រះអម្ចាស់
ដោយសារគាត់បានស្គាល់ព្រះអម្ចាស់តាមរយៈព្រះគម្ពីរ នោះសេចក្ដីជំនឿដ៏ជ្រាលជ្រៅរបស់ ម៉ារី អាន យ៉ង់ បានរក្សាអារម្មណ៍របស់គាត់ឲ្យ « ហាក់ស្ងប់ស្ងៀម ពេលឆ្លងកាត់ព្យុះភ្លៀងទាំងអស់ » ។១
រចនារូបភាពដោយ ថូនី អូកា
ម៉ារី អាន អេនជិល មានភ័ព្វសំណាងបានធំឡើងនៅក្នុងផ្ទះមួយ ដែលបានដាក់អាទិភាពលើការអានព្រះគម្ពីរ ។ គាត់ចូលចិត្តការបង្រៀនរបស់ព្រះអង្គសង្គ្រោះជាពិសេស ។២ គាត់បានរៀនកាលពីវ័យក្មេងថា គាត់អាចស្ដាប់ឮព្រះសូរសៀងរបស់ព្រះអម្ចាស់តាមរយៈព្រះគម្ពីរ ហើយអាចរកឃើញការធូរស្បើយផ្លូវចិត្តនៅក្នុងការបង្រៀនរបស់ទ្រង់ ។
គាត់បានឮដំំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទ បានផ្សព្វផ្សាយនៅឯ រ៉ូដ អាយស៍លេន សហរដ្ឋអាមេរិកនៅឆ្នាំ ១៨៣១ ហើយក្រោយពីបានអានព្រះគម្ពីរមរមន នោះម៉ារី អាន បានប្រែចិត្តជឿលើដំណឹងល្អ ។
គាត់បានផ្លាស់លំនៅទៅទីក្រុងខឺតឡង់ រដ្ឋអូហៃអូនៅប្រហែលឆ្នាំ ១៨៣៣ ជាទីដែលគាត់បានជួបនឹង ព្រិកហាំ យ៉ង់ ដែលគាត់បានរៀបការជាមួយនៅដើមឆ្នាំ ១៨៣៤ ។ រយៈពេល ៤៨ ឆ្នាំក្រោយមក ដោយឆ្លងកាត់ការផ្លាស់ប្ដូរទីលំនៅ និងការសាកល្បងជាច្រើន ម៉ារី អាន អេនជិល យ៉ង់ បានបន្ដស្ដាប់តាមព្រះអម្ចាស់តាមរយៈព្រះគម្ពីរ ហើយបានទុកចិត្តលើទ្រង់ដោយមិនវៀចវេរ ។
ឧទាហរណ៍ ស្វាមីរបស់គាត់បានចាកចេញទៅបេសកកម្មមួយនៅចក្រភពអង់គ្លេសនៅឆ្នាំ ១៨៣៩ នៅ ១០ ថ្ងៃក្រោយពីគាត់បានសម្រាលកូនស្រីរបស់ពួកគាត់ឈ្មោះ អាលីស ។ ក្នុងរយៈពេល ២០ ខែ បន្ដពីនោះ ម៉ារី អាន និងកូនៗទាំងប្រាំមួយនាក់របស់ពួកគាត់បានជួបការលំបាក ។ ពួកគេបានឈឺ ហើយរស់បានដោយសារតែនំប៉័ងធ្វើពីម្សៅពោត ទឹកដោះគោ និងបន្លែបន្ដិចបន្ដួចពីសួនបន្លែប៉ុណ្ណោះ ។៣ ម៉ារី អាន បានរកការងារធ្វើតិចតួចដើម្បីចិញ្ចឹមគ្រួសារគាត់ និងថែទាំដល់ខ្លួនគាត់ ព្រមទាំងកូនៗដែលឈឺរបស់គាត់ ។ ប៉ុន្តែព្រះអម្ចាស់បានជួយពួកគេឲ្យឆ្លងកាត់ការសាកល្បងទាំងនេះ ។ គាត់បានសរសេរសំបុត្រទៅស្វាមីរបស់គាត់ថា « នោះជារឿងដ៏អស្ចារ្យមួយដើម្បីទុកចិត្តលើព្រះអម្ចាស់ » ។៤
ដោយពឹងផ្អែកលើចំណេះដឹងខាងព្រះគម្ពីររបស់គាត់ ម៉ារី អាន ហាក់បានយល់ដឹងដោយការប្រែចិត្តជឿដ៏ជ្រាលជ្រៅមួយថា ព្រះអម្ចាស់បានគង់នៅជាមួយគាត់ជានិច្ច បានស្រឡាញ់គាត់ និងយល់ពីគាត់ ជាពិសេសក្នុងពេលគាត់មានការសាកល្បងជាច្រើន ។ « សូមឲ្យព្រះអម្ចាស់ដឹកនាំយើងក្នុងការណ៍ទាំងអស់ ហើយមានបន្ទូលលួងលោមចិត្តនៅក្នុងគ្រាដ៏ងងឹត និងពិបាកបំផុត » គឺជាការអធិស្ឋានរបស់គាត់ ។៥