ចូរមកតាមខ្ញុំ
ការឮអំពីលំដាប់នៃសិរីល្អទាំងបីជាលើកដំបូង
ថ្ងៃទី ៥–១១ ខែ កក្កដា
រូបគំនូរដោយ អានី ហែនរី ណេឌើរ
កណ្ឌទី ៧៦ នៃព្រះគម្ពីរគោលលទ្ធិ និងសេចក្តីសញ្ញាបញ្ជាក់ពីផ្នែកដ៏សំខាន់នៃផែនការនៃសេចក្ដីសង្គ្រោះ ដែលបានបាត់បង់ពីផែនដីនៅអំឡុងពេលក្បត់សាសនា ។ សម្រាប់មនុស្សជាច្រើន ការដឹងអំពីសេចក្ដីពិតដែលបានស្ដារឡើងវិញទាំងនេះជាលើកដំបូងគឺជាបទពិសោធន៍ដ៏គួរឲ្យចងចាំមួយ ។ បទពិសោធន៍នេះបានកើតឡើងចំពោះ ខូនី ជាអ្នកប្រែចិត្តជឿម្នាក់នៅទីក្រុងរិចមិន រដ្ឋវើរជីនៀ សហរដ្ឋអាមេរិក ។
នាងនៅចាំថា « ខ្ញុំតែងឃើញសេចក្ដីស្រឡាញ់របស់ព្រះជានិច្ច នៅពេលអានព្រះគម្ពីរប៊ីប ប៉ុន្ដែខ្ញុំរកមិនឃើញសាសនាចក្រណាមួយ ដែលបានបង្រៀនអំពីការណ៍នេះតាមរបៀបដែលខ្ញុំបានយល់ពីវាសោះ ។ នៅពេលខ្ញុំបានរៀនមេរៀនពីអ្នកផ្សព្វផ្សាយសាសនាអំពីផែនការនៃសេចក្តីសង្គ្រោះ នោះខ្ញុំបានមានអារម្មណ៍ថាត្រូវ ហើយទទួលបានសេចក្ដីសុខសាន្ដមួយដែលខ្ញុំមិនដែលមានពីមុនមក ។ ខ្ញុំគិតក្នុងចិត្តថា ‹ នោះគឺជាព្រះវរបិតាសួគ៌ដែលខ្ញុំស្គាល់ › ។ ការដឹងអំពីលំដាប់នៃសិរីល្អបានបើកចិត្តខ្ញុំយ៉ាងខ្លាំង រហូតដល់ខ្ញុំសឹងតែមិនអាចទប់ចិត្តរំភើបរបស់ខ្ញុំបាន ពេលរៀនបន្ថែមទៀត » ។
ឌេលហ្វីន អ្នកប្រែចិត្តជឿម្នាក់នៅទីក្រុងប៉ារីស ប្រទេសបារាំង មានស្ថានភាពគ្រួសារដ៏យ៉ាប់យ៉ឺនមួយ ដូច្នេះពេលពួកអ្នកផ្សព្វផ្សាយសាសនាបានបង្រៀននាងថា ក្រុមគ្រួសារអាចរស់នៅជាមួយគ្នាក្នុងនគរសេឡេស្ទាលបាន នោះនាងមិនប្រាកដចិត្តថា នាងចង់បានរឿងនោះឬអត់ទេ ។ ប៉ុន្ដែកាលពួកអ្នកផ្សព្វផ្សាយសាសនាបានបន្ដបង្រៀននាងអំពីលំដាប់នៃសិរីល្អទាំងបី នោះនាងទទួលបានការលួងលោមចិត្ត ។ នាងបានដឹងថា នាងនឹងរស់នៅជាមួយមនុស្សដែលនាងស្រឡាញ់ ដែលបានជ្រើសរើសដើរតាមដំណឹងល្អ ។ ដោយមានការយល់ដឹងដ៏ច្បាស់លាស់អំពីផែនការនៃសេចក្តីសង្គ្រោះ នោះនាងបានពោលថា « ខ្ញុំបានរកឃើញសេចក្ដីយុត្តិធម៌ជាច្រើនថែមទៀត ហើយការណ៍នោះបានរម្ងាប់ចិត្តខ្ញុំ » ។