ចូរមកតាមខ្ញុំ
ការងារបម្រើដល់អ្នករួមដំណើរជាមួយយើង
គោលលទ្ធិ និង សេចក្តីសញ្ញា ៨១–៨៣
ថ្ងៃទី ១៩–២៥ ខែ កក្កដា
រចនារូបភាពដោយ ជេ ប៊េត ចិបសុន
« ចូរជួយអ្នកទន់ខ្សោយ ចូរលើកដៃដែលរោយ ហើយចូរចម្រើនកម្លាំងដល់ក្បាលជង្គង់ដែល ញ័រផង » ( គោលលទ្ធិ និង សេចក្តីសញ្ញា ៨១:៥ ) ។
ប្រធាន ថូម៉ាស អេស ម៉នសុន ៖ គំរូនៃការងារបម្រើ
អាយុពេលត្រូវបានហៅជាប៊ីស្សព ៖ ២២ ឆ្នាំ
ចំនួនសមាជិកវួដ ៖ ជាង ១០០០ នាក់
ចំនួនស្ដ្រីមេម៉ាយនៅក្នុងវួដរបស់លោក ៖ ៨៥ នាក់
អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានចែកចាយពីរបៀបដែលប៊ីស្សពម៉នសុនបានថែទាំដល់ស្ដ្រីមេម៉ាយទាំងឡាយ ៖ « មនុស្សជាច្រើនអាចបានដឹងថា ប៊ីស្សពវ័យក្មេងម៉នសុនបានចំណាយពេលវិស្សមកាលផ្ទាល់ខ្លួនរបស់លោកមួយសប្ដាហ៍រាល់រដូវកាលបុណ្យគ្រីស្ទម៉ាស ដើម្បីទៅសួរសុខទុក្ខស្ដ្រីមេម៉ាយទាំងប៉ែតសិបប្រាំនាក់នៅក្នុងវួដរបស់លោក ។ មនុស្សជាច្រើនអាចមិនបានដឹងថា ក្នុងរយៈពេលបីបួនឆ្នាំដំបូង អំណោយដែលលោកបានយកទៅជូនពួកគេគឺជា … មេមាន់មួយដែលលោកបានចិញ្ចឹម និងថែទាំដោយផ្ទាល់នៅក្នុងទ្រុងមាន់របស់លោក » ។១
ប៊ីស្សពម៉នសុនបានរំឭកពីរបៀបដែលលោកបានជួយគូស្វាមីភរិយាចំណាស់មួយគូ ដែលត្រូវលាបពណ៌ផ្ទះរបស់ពួកគេ ៖ « នៅពេលទទួលបានការបំផុសគំនិតមួយ ខ្ញុំបានហៅឲ្យសមាជិកគ្រួសារដែលរស់នៅតំបន់ផ្សេងទៀតឲ្យមកជួយកាន់ច្រាសលាបពណ៌ផ្ទះ មិនមែនទៅហៅកូរ៉ុមអែលឌើរ ឬអ្នកស្ម័គ្រចិត្តទេ ប៉ុន្ដែគឺស្របតាមក្បួនខ្នាតសុខុមាលភាពវិញ ។ កូនប្រសារប្រុសបួននាក់ និងកូនស្រីបួននាក់បានចាប់ច្រាស ហើយចូលរួមក្នុងគម្រោងនេះ » ។២ ការបំផុសគំនិតនេះបានជួយគ្រួសារនេះឲ្យទាក់ទងគ្នាឡើងវិញ ហើយថែទាំដល់គ្នាបានកាន់តែប្រសើរ ។
« យើងពិតជាមិនអាចស្រឡាញ់ព្រះបានឡើយ បើយើងមិនបានស្រឡាញ់អ្នករួមដំណើរនឹងយើងនៅលើដំណើរនៃជីវិតរមែងស្លាប់នេះផងនោះ » ។៣ —ប្រធាន ថូម៉ាស អេស ម៉នសុន